Siujloz doeg ngeih nienzgaep lo, cingzcik haemq ndei, de miz di launyaenq, vah noix.

“Hoh mwngz ngoenzseng vaiqvued, hoh mwngz ngoenzseng vaiqvued……” Moix baez yawjraen bouxwnq hawj lwgnyez swhgeij gvaq ngoenzseng ciengq souj go neix seiz, Siujloz couh cibfaen hozhaenz. Daegbied dwg yawjraen doenghgij baengzyoux iq haenx ing youq ndaw rungj bohmeh, gwnz naj yienh ok gij saenzcingz vaiqvued youh vuenyungz, Siujloz couh engqgya siengjmuengh caeuq hozhaenz lo.

Siujloz moix bi mizseiz hix gvaq ngoenzseng, hoeng dingzlai cungj dwg daxgoeng daxbuz buenx de gvaq, cijdwg cawj vanj mienh caeuq song aen gyaeqgaeq ndwi. Mbouj miz dangauh daeuj angq hoh, gijneix lainoix hawj Siujloz ndawsim miz di saetmuengh caeuq hojsik. Hoeng mizseiz de hix naemj ndaej doeng, okseng youq liggaeuq ndwen loeg, gyoengqvunz guhhong nazreih dajsou dajndaem nyaengqfoedfoed, daxboh youh bi daengz haemh cij haeuj ranz, daxgoeng daxbuz guhhong le ndaejhoengq cawj vanj mienh caeuq gyaeqgaeq couh ceiq nai sim vunz lo.

Youq ndawsim Siujloz, daxboh ciengxlwenx lij dwg yienghhaenx, gij yienghceij daxmeh gaenq di he hix geiq mbouj ndaej lo. Siujloz ngamq ndaej song bi seiz, bohmeh de couh doxliz lo.

Meh Siujloz dwg vunz ndaw bya baihhaenx, haq hawj boh Siujloz seiz ngamq ndaej 20 bi, youh dwg dahlwg dog he, bohmeh gyaez de lai, bingzseiz cungj mbouj hawj de guh hong maz. Caeuq boh Siujloz doxaeu baenz ranz le hix mbouj miz maz gaijbienq, lij dwg lumj gaxgonq nei. Boh Siujloz beij meh Siujloz nienzgeij hung di, beizheiq mbouj daiq ndei, caeuq meh Siujloz doxdoengz hix miz di gik. Bouxgik caeuq bouxgik caemh ranz youq, songde seiz mbouj seiz vih gij saeh saepsoiq doxceng. Saeh lawz cungj doxdoengz, miz baez daih’it couh miz baez daihngeih, songde yied ceng yied haenq, doeklaeng lij doenghfwngz moeb hwnjdaeuj dem.

Seizhaenx hainduj moix baez doxceng, meh Siujloz couh aemq Siujloz baema ranzdaiq gaijheiq. Moix baez boh Siujloz youh bae coux ma, bohda mehdaiq cungj ndaq meh Siujloz can he. Bae lai le, bohda mehdaiq hix mbouj naihfanz baenzlai lo, songde caenh ndaq boh Siujloz, mbouj caiq ndaq dahlwg swhgeij. Mizseiz lij caegcaeg yo meh Siujloz hwnjdaeuj, mbouj hawj boh Siujloz raen naj.

Nauh ndaej ceiq haenq couhdwg baezhaenx, song gvanbaz mbouj rox vih saeh maz youh ceng hwnjdaeuj lo, boh Siujloz lij ndatheiq foedfoed nyoengx meh Siujloz laemx youq gwnznamh. Mbatneix meh Siujloz caiq hix goq mbouj ndaej baenzlai lo, vut roengz Siujloz, gag boux ndeu gig ndatheiq dwk deuz lo.

Boh Siujloz rox mehyah youh bae ranzdaiq lo, couh aemq Siujloz bae ra. Bin gvaq geij goengq bya, youh byaij gvaq geij diuz lohgemh, mwh boh Siujloz hanh lae rim ndang, caengz yamqdin haeuj bakdou, gyae’gyae couh dingqnyi mehdaiq fok hwnjdaeuj:“Mwngz ndaek ma neix youh ma neix guh maz? Ranz mwngz gungzndoq dangqmaz dahlwg dou haq hawj mwngz gwn hoj couh suenq lo, lij doiq de mbouj ndei dem, bingzseiz mbouj dwg ndaq couhdwg moeb, baezneix caen mbouj nyiengh mwngz lo!”

Boh Siujloz gag rox leix vi, sing mbaeu naeuz:“Gou, gou……” Aen bak aj dwk cix gangj mbouj ok saek coenz vah.

Mehdaiq Siujloz raen boh Siujloz najhoengz rwz dit ndwn youq gizhaenx, couh engq ndatheiq lo, gij vah yakdingq haenx lumj diemj foengq bauqrengh nei daj ndaw bak de mboujdingz mboujduenh raix okdaeuj:“Miz bonjsaeh couh gaej yamqdin ma neix lo, yawjyawj daeglwg iq neix, daenj geu vaq neix mbouj dwg ndwengonq gou ngamq cawx hawj ha, uengjfeiq gou gyaez lwg mwngz mwngz cix mbouj gyaez lwg gou!” Caengz caj boh Siujloz naemj gvaqdaeuj, gangj sat mehdaiq couh cung gvaqbae gaemhdawz song dinvaq Siujloz couh haenqrengz duet okdaeuj lo.

Siujloz seizhaenx cij ngamq ndaej bi lai,