Mbwk:

Gaeng angq vunz engq angq,

Bak caengz gangj sien riu,

Dangj hai loh gyaq giuz,

Raeuz baenzciuh mbouj gungz.

Sai:

Gyoengqvunz youq ndaw bya,

Ok dou ga bin dat,

Lumj duznou duzsap,

Raih cag gvaq baengxciengz.

Mbwk:

Gyoengqvunz youq ndaw rungh,

Gyauhdungh mbouj bienhleih,

Moix mbat ok dou bae,

Raih cag lae ndaw fwj.

Sai:

Dangj fuzbinz roengzma,

Bag bya hai roenloh,

Vih raeuz mbouj caiq hoj,

Son raeuz doq giuzgim.

Mbwk:

Dangj fuzbinz roengzma,

Ranzhaz bienq ranzlaeuz,

Saenzsien daj mbwn daeuj,

Haenh ranz raeuz caen ndei.

Sai:

Dangj hawj raeuz bouxhoj,

Doq giuz gvangq youh moq,

Bag bya hai daihloh,

Doeng bae doh lajmbwn.

Mbwk:

Dangj hawj raeuz vunzmbanj,

Cang ndei guh laeuz moq,

Fwjva guh yiemzhoq,

Goengloh daengz bakdou.

Sai:

Heiqci daemx bakdou,

Lienz duzmou hix angq,

Bae haw naeuz bae mbanj,

Gangj riu yaep couh daengz.

Mbwk:

Ndaw singz miz gauhdez,

Bouxgeq maij bae youz,

Gyanghaet youq Gvangjcouh,

Haemh Hangzcouh sai laeuj.

Sai:

Diegraeuz mbwn rengx lai,

Gwn raemx daiq dwgrengz,

Raemx beij gim lij bengz,

Miz eng fouz maz coq.

Mbwk:

Sam ngoenz mbouj roengz fwn,

Ra raemx gwn mbouj meiz(miz),

Haeuxyangz dai ndaw reih,

Gaeng dai veih(vih) hozhawq.

Sai:

Seizneix youq ndaw bya,

Raemx gag ma daengz ranz,

Gwn lumj van gvaq dangz,

Rengx nanz naz mbouj hawq.

Mbwk:

Seizneix caen mbouj hoj,

Swnghhoz bienq ndei gvaq,

Lwgnyez daenj buhva,

Beij duzmbaj lij lengj.

Sai:

Moix baez haeuj ranz ma,

Miz bya cien ndaw deb,

Lwgloux rox gag ceg,

Hek daeuj gacak heuh.

Mbwk:

Doenghbaez coz ndaemnaz,

Neix naj nyaeuq yex lan,

Caemz baeg couh maranz,

Andingh gvaq bigeq.

Sai:

Doenghbaez haw gaujvaq,

Mbouj bae ra gouz gwn,

Mbouj raemj faex gai fwnz,

Cienz cwn guh seng’eiq.

Mbwk:

Seizneix daenj engq ndei,

Daenj buhsei ndaemnaz,

Doxbungz mbouj roxnaj,

Doxcam gvaq youh riu.

Sai:

Seizneix yienghyiengh miz,

Hoengq cix bae diuqfoux,

Sam haet youh bae youz,

Ra baengzyoux guh fwen.

Mbwk:

Mwngz eu gou hix eu,

Beuz cehgim did ngaz,

Dawzaen lumj lwgraz,

Geq ndaej da raizva.

Sai:

Goyangz yienznaeuz sang,

Mbouj van beij dangzoij,

Dangj hawj beixnuengx doih,

Baenzciuh boiz mbouj caenh.

Mbwk:

Gvaq giuz mbouj lumz dwngx,

Gwn raemx mbouj lumz cingj,

Dangj hawj raeuz aencingz,

Dingh fanh daih mbouj lumz.

Sai:

Bae haw mbouj lumz loh,

Gwn noh mbouj lumz mou,

Dangj vih raeuz couzmouz,

Bouxboux cungj mbouj lumz.

Mbwk:

Raeuz sai laeuj caez hoh,

Guekcoj engq fouqgiengz,

Lwgminz engq miz cienz,

Beij saenzsien vaiqvued.

Sai:

Beij saenzsien lix fouq,

Bouxboux gyaez eu fwen,

Cien bi guh mbouj yuenz,

Guek giengz minz lij fouq.（sat）