12 nyied 3 hauh, Gvangjsih Swhfan Yozyen Gaiq Daihngeih Doxdax Doeg Vahcuengh Biucinj youq Cangzgangh Yaugih gawjhengz. Miz ngeihcib haj boux siujyoz gyauyuz conhyez Cuengh Gun song vahsaw fuengyiengq doengzhag ginggvaq genjleh, camgya baez doxdax neix.

Aen doxdax neix, gyoengq doengzhag ndangdaenj buhvaq minzcuz, bak doeg Vahcuengh biucinj. Faenzcieng miz fwensei、sanjvwnz、gojbeij daengj, ndawde neiyungz miz goj ndawbiengz Bouxcuengh, miz gij gaisau conzdungj vwnzva Boux- cuengh, miz gij gingjsaek gyaeundei Mbanjcuengh, lij miz baenzlawz gvaq saedceij caeuq ciuhvunz singjrox daengj. Ginggvaq haenqrem doxdax le, 2016 gaep Cuengh Gun song vahsaw conhyez 3 ban Vangz Cingvwnz doeg《Seizcin》Vahcuengh biucinj、gamjcingz naekgywg、daihfueng swhyienz，dued ndaej daengx hoihciengz ceiq sang 98.32 faen.

Baez hozdung neix dwg Gvangjsih Swhfan Yozyen genjniemh hagseng siujyoz gyauyuz conhyez Cuengh Gun song vahsaw fuengyiengq hagsib Vahcuengh biucinj, hix dwg aen laex soengq hawj swcigih laebbaenz 60 hopbi.

(Yungz Liswh/熊利思 Vangz Li/黄莉 Huz Cing/胡静 Moz Lanzlanz/莫兰岚 Cinz Lingz/陈灵 Luz Yozdingz/卢学婷)