Haemhneix caen dwg mok lai, hix caem raixcaix, daengx mbanj gaenq deng gyanghaemh laep homh hwnj, couh youq henz dah gvangq vanzlij yawj ndaej raen geij aen daengrongh myox ruzdwkbya.

Seizneix, ranzranz laep daeng, bouxboux ninz ndaek, boux mehmbwk ndeu cix youq sokruz simgaenj yaekdai. Ruzdoh gaenq dingz guhhong, bouxcauhruz hix caeuxcaeux roengzban, boux lwgnyez ndaw rungj mehmbwk haenx deng rumzliengz ci ndiu. Aen baksok neix lumj aen liengzdingz nei, rumz gyanghaemh ndaej seizbienh ciemqfamh gizneix. Mehmbwk mbouj siengj lwgnyez iq ngamq ninz ndei youh daej hwnjdaeuj, gizneix liz mbanj hix mbouj gyae. De youh cingjleix ndei mbuk lwgnyez, gaeuz roengz hwet de, yungh ndang hoh dwk gyaeuj lwgnyez, umj ndaej engq maenh, ndaw rungj engq raeuj. Din doq saenz, bak doq lox, lwgnyez cijndaej youh ninz bae.

Youq ndaw rumz gaenq caj gig nanz, yienghneix yawj daeuj, ruzdoh wnggai mbouj rox caiq daeuj lo. Danhseih daengrongh gwnz dah haenx yinx hwnj le de louzsim. De siujsim sisi umj dwk lwgnyez youh yiengq sokdwkbya baihgwnz dah haenx byaij bae.

Youq seizneix gvaq dah couh lumj roegenq mbin bae namz nei, doiq mehmbwk neix daeuj gangj dwg gienh saeh hung ndeu. De faj fwngz got maenh lwgnyez, roengzrengz vad dwk fwngz wnq de, cix mbouj gamj heuh gok. Aen ngaeuz ndang iq neix youq henz dah lumj dwg go faex iq nei, caeklaiq miz aen ruzdwkbya lumj dwg fatyienh le gyoengqde. Daeng ruzdwk- bya haenx yied daeuj yied rongh, sing’yaem cauh ruz lij yied ndaej cingcuj. Mehmbwk lumj youq ndaw doek nae ndaej soengq danq nei cuengqsoeng roengzdaeuj. Yawj dwk faj naj ndeigyaez lwgnyez ndaw rungj de, mehmbwk loh ok najriu.

Ruz yaek daengz, mehmbwk couh sim’angq heuh:“Giz, gizneix, boux- laux, ndaej bangbang dou mehlwg lwi? Dou aeu gvaq dah, lwg gou bingh lo, yiemz raixcaix, muengh mwngz ndaej bang baez！Docih lo.”

Bouxcawj ruz neix dwg boux canghdwkbya laux, hix dwg boux vunz yiedsim ndeu, yunghrengz cauh baez dep daengz haenzdah, yaep couh diuq roengz gyaeujruz, cug ndei cag ruz, yiengq mehmbwk haenx byaij bae. Hoeng canghdwkbya rangh neix dwg ciengznienz henz dah dwk bya ciengx bya, gwnz ndang boux ok dah dwk bya haenx cungj miz di haeusing. Boux mehmbwk neix lij ngeizvaeg baez he, got gaenj lwgnyez ndaw rungj. Cangh- dwkbya byaij daengz baihnaj meh- mbwk, yawj dwk boux lwgnyez deng duk ndaej gaenjmaed lai haenx, cam:“Mwngz dwg bouxlawz? Baenzlawz youq gyanghwnz lij umj dwk boux lwgnyez okdaeuj ci rumz ne?”

“Bouxlaux, gou heuh Bwz Li, song bi gonq haq daeuj mbanj laeng ndoi, mwngz aiq mbouj roxnaj gou. Lwg gou baenzbingh, aeu gvaq dah bae yihyen yawjbingh. Ruz- doh gaenq dingz, seizneix couh maq- muengh mwngz ndaej bang mehlwg dou baez he lo!” Mehmbwk cingjgouz naeuz le, youh gaeuz hwet gyo’mbaiq.

Lwgnyez dwg aen bauj ndaw ranz. Caiqnaeuz ranz de hix miz boux lwgnyez ndeigyaez ndeu, gienh saeh gvaq dah neix couh deng canghdwkbya sikhaek dapwngq roengzdaeuj. Canghdwkbya ciep song mehlwg neix hwnj ruzdwkbya, ra aen dieg seuq hawj gyoengqde naengh, naeuz:“Naj lwg mwngz loh okdaeuj ba, yienghneix rox doiq de ndei di.”

“Mbouj lo, rumz gwnz dah engq liengz engq hung, couh lau binghcingz deng gya laeg ha.”

“Couh lau mwngz yienghneix got ndaej gaenj lai, doiq lwgnyez diem- heiq engq mbouj ndei bw! Ndaej loh ok saekdi daeuj, hawj de fuengbienh diemheiq couh ndaej lo.” Cangh- dwkbya buek gangj.

Mehmbwk dingj mbouj gvaq, vihliux ndaej caeux di gvaq dah, ciuq vah de got soeng di, loh ok di naj lwgnyez daeuj. Canghdwkbya yawj le, cauh ruz gvaq dah. Gwnz dah ci hwnj rumz hung, ruzdwkbya couh lumj mbawfaex youq ndaw rumz nei, caih deng langhdah ci ngauz daeuj vangh bae. “Daeuj rumz hung lo! Raeuz vanzlij menh di cauh ruz ba, yiengh- neix engq ancienz dem!” Cangh- dwkbya dingz menh ruz, roengzrengz gaemdawz dwk bingzyaenx caeuq fuengyiengq. Mehmbwk haenx hix mbouj luenh cak, muengh rumz caeux di dingz ruz caeux di daengz haenz doiqnaj.

Mbouj nanz rumz dingz ruz maenh, gwnz dah youh ndaej fuk dauq caemrwd. Canghdwkbya lumj yungh sat rengz nei, song fwngz riuj mbouj hwnj gaiqcauh, ndaw bak hix baeg dwk heiq. Hoeng, dah gvangq ruz nanz gvaq, seizneix liz haenz doiqnaj lij miz buenq lai.

“Vunz laux lo, rengz mbouj doh, ndaej caj gou yiet yaep lwi? Seizneix rumz bingz langh caem, mbouj miz maz saeh, couh mazfanz mehlwg sou aeu caj yaep he lo.”

“Yienghneix? Couh yienghneix ba!” Mehmbwk mbouj miz banhfap, hix mbouj gamj gangj lai, cij ndaej deq lo.

Gvaq le duenh seizgan, cangh- dwkbya fuk dauq rengz, naeuz:“Ndaej lo, raeuz bae lo bw!” De youh yungh- rengz cauh hwnjdaeuj. Mehmbwk hix soeng le baez heiq. Da yawj haenzdah couh youq baihnaj, canghdwkbya youh gangjgoj hwnjdaeuj, naeuz:“Lwg mwngz dwg baenzbingh maz? Baenz- lawz couh mwngz gag ok ranz dawz lwg bae yawjbingh, boh de ne?”

“Bingh maz gou hix mbouj cingcuj, couhdwg youq ranz gyaeuj ndat dangqmaz. Boh de mbouj youq ranz, vunz ranz gou hix gaenq ninz ndaek, mbouj siengj caiq cauz ndiu gyoengqde lo.”

“O, yenzlaiz dwg yienghneix.” Canghdwkbya hix mbouj caiq gyaep cam, cienzsim cauh ruz. Ruz yied daeuj yied vaiq, baksok laep baihnaj haenx deng daeng ruzdwkbya ciuq ndaej miz saekdi rongh hwnj- daeuj, ruz yaek daengz haenz lo.

Ruz daengz, mehmbwk umj lwg sikhaek roengz ruz, couh yaek lizbae. “Mwngz couh yienghneix bae lo?” Canghdwkbya cam.

“Seizgan youqgaenj, baihnaj miz vunz ciep dou, bae gonq lo.” Mehmbwk cacoemj yaek liz, mbouj siengj youq gizneix nguh seizgan.

“Lijdwg aeu dou daeuj soengq mwngz baez ba!” Baihlaeng mehmbwk neix cienz daeuj aen sing’yaem gok, ciepdwk, geij boux gingjcaz daj henz baksok neix roemx okdaeuj.

“Sou……” Mehmbwk foengx lo.

“Vangz Lingzlingz, mwngz gaenq deng dou homh hwnjdaeuj lo, mwngz deuz mbouj okbae lo. Doengzhuj mwngz gaenq deng gaeb bae, maz cungj gangj lo.” Gyoengq gingjcaz gaenq homh maenh de. Mehmbwk siengj dauq gwnz ruz, ruz cangh- dwkbya gaenq lizhai baksok lo, de miz fwed nanz mbin. Gig vaiq, gingjcaz ceihfug le boux mehmbwk neix. Lwgnyez ndiu hwnj fouz saeh, boux gingjcaz ndeu umj dwk.

Mehmbwk deng daiq hwnj gingjceh, canghdwkbya cauh ruz dauqma. Boux gingjcaz umj lwgnyez naeuz:“Laux Hoz, baezneix gyo’mbaiq mwngz yungh soujgih gibseiz daezhawj dou cingzbauq dijbauj neix, dou cij ndaej gaeb dawz song boux cangh- gvaijvunz neix. Dandwg mwngz youh baenzlawz rox mehmbwk haenx dwg boux canghgvaijvunz?”

Canghdwkbya daj fwngz gingjcaz umj gvaq lwgnyez, lox le lox, han naeuz:“Boux vunzseng ndeu gyang- hwnz umj dwk lan gou aeu gvaq dah, gou baenzlawz mbouj ngeiz mbouj you mbouj lau! Gou hix aeu docih sou gibseiz okfwngz ha!”