Geij bi neix daeuj, Hozciz Si nyinhcaen gvancez doeksaed gij minzcuz cwngcwz aen dangj, haenq- rengz fatyiengz vwnzva minzcuz, gaenxmaenx haiguh hozdung angqhoh ngoenzciet minzcuz, baujhoh caeuq hwngfat aenmbanj miz daegsaek minzcuz vunznoix, aeu vwnzva minzcuz vunznoix caeuq lajmbanj lijyouz dox giethab, cingzyauq yienhda.

It dwg yungh hozdung vwnzva angqhoh ngoenzciet minzcuz hwngfat lajmbanj lijyouz, coicaenh deihfueng ginghci demmaj. Hozciz Si cungdenj dajcauh “sam nyied sam” Bouxcuengh、cietcuzcu Yauzcuz、cietfaenlungz Mauznanzcuz daengj hozdung angqhoh ngoenzciet hung minzcuz haenqrengz hwngfat lajmbanj lijyouz.

Ngeih dwg gyagiengz hwnjguh aenmbanj miz daegsaek minzcuz vunznoix, guh hung gij giekdaej lajmbanj lijyouz. Geij bi neix daeuj, Hozciz Si gyagiengz hwnjguh aenmbanj miz daegsaek minzcuz vunznoix, gonqlaeng 2 baez cujciz caeuqfaenh aenmbanj miz daegsaek minzcuz vunznoix Cungguek ancoh. Seizneix Hozciz Si miz 10 aen aenmbanj miz daegsaek minzcuz vunznoix ndaej Guekgya Minzveij ancoh, gij soq youq Guengjsae baiz vih daihsam. Doiq moix aen mbanj mbouj doengz swyenz diuzgienh caeuq swhyenz gijndei vwnzva minzcuz, haenqrengz hwngfat daegsaek nungzyez canjnieb caeuq vwnzva lijyouz canjnieb, mboujduenh gya’gvangq gij giekdaej lajmbanj lijyouz, yinx haujlai bouxhek daeuj caeuqfaenh minzcuz hozdung、yawj- ngonz、 youqndwi.

Sam dwg yawjnaek haifat gij canjnieb lijyouz vwnzva minzcuz vunznoix, doidoengh lajmbanj lijyouz onjyamq hwngfat. Hozciz Si baengh gizdieg daegsaek dajcauh “gyaeunanz、swnghdai、minzcuz、saeknding” seiq aen vwnzva lijyouz canjnieb binjbaiz. Gungganq dajcauh binjbaiz “dieg gyaeunanz swnghdai·singz vwnzva Samcej” cingzyauq yienhda. Dieg saedniemh baujhoh swnghdai(Hozciz) vwnzva aennyenz guekgya、dieg lijyouz gozci ciengxndang gyaeunanz Bahmaj daengj gak hangh hwnjguh onjyamq doicaenh.

(Veiz Dunghcwngz)