Ndwen 11 ngoenz 20 banhaet, aen yizsi hainduj ciet vwnzva fapceih gaiq daihseiq Liujcouh Si nem “fwen ciengq fapguek” vwnzyi yienjok youq Liujcouh Si Yizfungh Gunghyenz hainduj, caemhcaiq hainduj le aen hozdung baenzdauq ngoenz fapguek guekgya guh ndwen ndeu haenx.

Mwh hozdung, gyoengq cangh- fwen yungh fwen doengsug rox ngaih cienzciengq senhconz fapguek, 《Fwen Bouxcoz Nyezrauh Ciengq Fapguek》《Sam Coenz Buenq·Dwkcawz Seiqlig Simnduk》《Fapceih Cungguek Caezgya Ciengq》 daengj fapceih vwnzyi cezmuz ndaej daengz bouxyawj yienhciengz angqcoux, siminz youq mwh angqyangz ndaej daengz fapceih gyauyuz seng- doengh.

Youq yienhciengz, bouxguhhong lij laeb le aen daiz senhconz fapceih, fat 《300 Hot Fwen Bujfaz》《Faplwd Manva》《Anqlaeh Diemjhingz Gungh- minz Ei Fap Hen Gienz》 daengj huqlaex senhconz fapceih 600 lai faenh hawj vunzlai yienhciengz, ndaej daengz vunzlai haenhndei.

Ciuq cam rox, vih engq ndei leihyungh fwen cienzdoh faplwd cihsiz, fatyiengz fapceih vwnzva, bineix ndwen 9, Liujcouh Si cujciz 5 boux sijcej yungh fwen cienzdoh fap cauhguh le Liujcouh Si cek nduj 《300 Hot Fwen Bujfaz》, caemhcaiq yaenq 5000 cek fat hawj siminz mbouj aeu cienz, baenz le cek saw ndei vunzlai hagfap.

(Fu Yungjsinh Linz Lanzfwnh Veiz Cinhcuh)