Gou doeg daengz aen gojsaeh ndeu, ndawde gangj Goengmax bae haw, daengngoenz hwngq lai, de hozhawq raixcaix. Youq gwnz loh miz gomakfiengz ndeu, gyoengqvunz cungj bae mbaet makfiengz gwn, hoeng cij miz Goengmax gig lauxsaed, naengh youq laj yietnaiq. Vunz cungj riu de huk vihmaz mbouj gwn, Goengmax gangj:“Go makfiengz neix mbouj miz cawj, sim gou gag miz cawj.” Gawq vah neix caen hawj vunz ngeix lai, dwg ha, Goengmax yienznaeuz hozhawq raixcaix lij mbouj deng gij makfiengz yoekyinx, ndawsim de lij naemj guh boux vunz mbouj damsim, mbouj luenh dam doxgaiq bouxwnq. Cungj cingsaenz neix caen hawj vunz boiqfug. Bingzciengz lumj Goengmax boux vunz yienghneix gangj saenq- yungh gangj liengzsim caen mbouj genjdanh, raeuz wngdang yiengq de hagsib.

Youq aen sevei Cungguek raeuz, bouxboux cungj gangj vwnzmingz gangj saenqyungh dwg gienh saeh hawj vunz sim’angq ndeu. Cibbet Daih Dangj daez ok 24 cih seveicujyi hwzsinh gyacizgvanh, ndawde couh gangj lauxsaed gangj saenqyungh. Youq sevei youq swnghhoz youq gunghcoz, cungj liz mbouj hai souj saenqyungh. Danghnaeuz mwngz youq swnghhoz mbouj gangj saenqyungh, simdam, raen bouxwnq miz maz doxgaiq ndei couh siengj bae aeu, raen miz leih’ik couh gaijbienq bonjsim, mwngz couh deng vunz naeuz mwngz simyak, couh mbouj miz baengzyoux. Danghnaeuz mwngz youq gunghcoz mbouj gangj yenzcwz mbouj gangj bonjsim, mwngz couh yungzheih guh loek saeh, engqgya yungzheih dam caiz dam leih, bae guh gij saeh famhfap haenx, doengzseiz mwngz couh gag ienq mbouj dauq lo. Miz haujlai vunz riu Goengmax huk, hoeng Goengmax dwg boux vunz ceiq gvai ndeu, aenvih de iemzgek yauhgiuz cihgeij, mbouj deng bouxwnq yoekyau, dang cihgeij hozhawq dai cungj mbouj bae guh gij saeh gek liengzsim haenx. Aen makfiengz mbouj beij cihgeij liengzsim mingzdaeuz dijcienz, wngdang baenzlawz guh daihgya cungj rox, hoeng youq leih’ik baihnaj miz geijlai vunz nyaenx ndaej?

Miz boux dang guen ndeu, de gig roengzrengz gunghcoz, vihliux hawj swhgeij swngguen, de guh saeh gig siujsim, coengzlaiz mbouj luenh dam ngaenz guekgya, lingjdauj gyoengq- vunz cungj dwg yienh ndaej gig miz dungx miz bonjsim, hix rox bonjfaenh wngdang guh yienghndei, geijcib bi gvaqdaeuj, de yiemzgek yauhgiuz swhgeij, mbouj deng vunz yoekyau, ndawsim miz soq. Hoeng, miz baez ndeu, baihgwnz dawz gij cienz fuzbinz fat roengzdaeuj. Miz vunz siengj caegcaeg daj gij cienz cawjeiq, siengj heuh de luenh baecinj hanghmoeg dauq aeu gij cienz fuzbinz neix, de mbouj doengzeiq. Seizhaenx yah de cingq baenzbingh naek, yw gij bingh neix aeu cibgeij fanh maenz, de cingq simfanz mbouj miz ngaenz yw bingh, couh siengj daengz gij cienz fuzbinz neix. De siengj bae siengj dauq, nyinhnaeuz ciuh vunz neix mbouj guh maz saeh yak, mbouj guh maz doiq mbouj hwnj guekgya, danghnaeuz guh mbat he mbouj hawj vunz rox, hix doiq swhgeij mbouj miz yingjyangj. De couh gietdingh caeuq vunz caegcaeg aeu gij cienz fuzbinz, gvaqlaeng miz vunz gawjbauq gienh saeh neix, de deng dawz bae gyaeng, ienqhoij dangqmaz. Vihmaz mbouj nyaenx ndaej yoekyinx mbouj ciuq bonjsim bae guh saeh ne? Geijcib bi neix cungj guh ndaej daengz mbouj simdam, mbouj guh saeh loek, vihmaz seizneix couh guh loek ne? Ienq mbouj dauq lo.

Daj gienh saeh neix bae gangj, Goengmax dwg mbouj dwg boux vunz gvai ne? Dwg raixcaix, yienznaeuz dwg gienh saeh iq, hoeng raeuz guh vunz guh saeh itdingh aeu gangj bonjsim, gaej deng leih’ik yinx loek, gaej deng bouxwnq yoekyau, guh boux vunz gangj saenqyungh gangj liengzsim dwg ceiq ndaej hawj vunz boiqfug.