Minzsiuj gojgaeq lai, miz angq hix miz lag, langh mwngz ndaej- hoengq, gou caeuq mwngz gangjlwnh.

Youq ngoenz hwnjban banhaet he, gou caeuq bingzseiz doxdoengz, dangz yijvwnz sat le couh youq henz gyangjdaiz cingjleix gij cozyez godangz gyoengq hagseng ngamq gyau hwnjdaeuj haenx. Sawqmwh, miz geij daeglwg ngamq bae oknyouh ma gipgip muengzmuengz buet gvaqdaeuj lwnh gou nyi, gyoengqde youq ndaw congh diengzhaex yawjraen naed ngaenzdih gak cienz ndeu. Gyoengqde cingq gangj dwk, youh miz daeglwg ndeu gipgip muengzmuengz buet gvaqdaeuj gangj gij saeh de ngamq yawjraen haenx:“Cinz lauxsae…… Cinz lauxsae……Lij Suh dawz naed ngaenzdih gip hwnjdaeuj lo.”

Vah de ngamq gangj sat, Lij Suh gaenq fwngz gaem naed ngaenzdih haenx ndwn youq henz ndang gou lo. De hai ok faj fwngz iqet de, dawz naed ngaenzdih ndenq coh dangnaj gou. Gou couh hawj de dawz naed ngaenz- dih cuengq youq gwnz gyangjdaiz. Cingq youq seizneix, gyoengq hagseng humx youq henz ndang gou caezsing swenj hwnjdaeuj:“Naed ngaenzdih neix doek youq ndaw congh diengz- haex gvaq, haeungaungau, gaej aeu fwngz gaem dawz.”

Lij Suh dingq le gipmuengz gej naeuz:“Mbouj haeu, mbouj haeu, Cinz lauxsae, caen mbouj haeu. Gou gaenq yungh raemx suijlungzdaeuz swiq geij baez gvaq lo, swiq seuq gvaq, it di hix mbouj haeu. Mbouj saenq, mwngz couh nyouq mbat he……” De doq gangj doq ndenq gvaq naed ngaenzdih gaenq swiq ndaej moqsaksak haenx daengz dangnaj gou daeuj. Yawj faj naj oiqet de, caemhcaiq roxnyinh de simgip dangqmaz, gou sikhaek vih gij hingzveiz haxbaenh hawj de cuengq naed ngaenzdih youq gwnz gyangjdaiz roxnyinh naj ndat hoz nding. Gou yaek mbaetdai faenh cingz hagseng gyaezhoh gij ngaenz guekgya raeuz lo. Youq dangnaj daeg lwgnyez neix, gou roxnyinh cihgeij yaep ndeu couh bienqbaenz boux vunz iqetet ndeu, ndawsim gou cingq langh fanj rumz haenq.

Gou ciep dawz naed ngaenzdih Lij Suh ndenq gvaqdaeuj, menhmenh dawz daengz henz ndaeng nyinhcaen dwk nyouq le nyouq, riunyumnyum dwk doiq doengh boux hagseng humx gvaqdaeuj naeuz:“Gyoengq doengz- hag, naed ngaenzdih neix mbouj haeu, di he hix mbouj haeu, lij miz di heiqrang ne!”

“Lauxsae, hawj gou nyouq mbat he……” “Lauxsae, gou hix nyouq mbat he……” Gou nyi miz hagseng siengj nyouq, couh ndenq okbae lo. Boux hagseng haenx nyouq le couh gangj:“Caen dwg mbouj haeu, di he hix mbouj haeu!” De nyouq le youh cienz hawj lingh boux nyouq, ngaenzdih sikhaek youq ndaw faj fwngz iqet gyoengq hagseng cienz bae cienz dauq, gyoengq hagseng humx youq henz ndang gou yied daeuj yied lai, mwngz nyouq gou mup, nauhyied dangqmaz. Yawj gij cingzgingj neix, gou roengzsim lo, dauqdaej mbouj miz byawz caiq yiemz naed ngaenzdih neix haeu lo.

Lij Suh riu lo, hagseng wnq hix riu lo, gou hix daj ndawsim angqvauvau dwk riu lo. Gij riu lah haeuj ndawsim gizlaeg gou daeuj, hawj gou vuenheij.

“Gou youq henz maxloh, gip ndaej faen ngaenz ndeu, dawz de gyau haeuj ndaw fwngz daxau gingjcaz bae……” Souj go seiziq gingciengz ciengq youh youq henz rwz gou yiengj hwnjdaeuj. Lij Suh couh lumj lwgnyez ndaw go neix nei, baenzneix gyaez gij ngaenz guek raeuz, couhsuenq de cij dij gak ngaenz he, couhsuenq de doek youq ndaw congh diengzhaex gvaq. Hoeng, Lij Suh hix mbouj yiemz uq, gag gip hwnjdaeuj dawz bae swiq seuq le gyau hwnjdaeuj. Danghnaeuz gou mbouj nyienh nyouq naed ngaenzdih de ndenq gvaqdaeuj, aiq couh sienghaih daengz aen sim sienhsoh boeksaed de lo.

Guh boux siujyoz lauxsae, gou rox lauxsae gangj vah guhsaeh cungj dwg son hagseng. Dang lauxsae, mbouj dan aeu son hawj hagseng gij vwnzva cihsiz, lij aeu son gyoengqde rox baenzlawz bae guh saeh guh vunz. Doiq gak ngaenzdih neix, lauheiq bouxhung bouxlaux nyinhnaeuz mbouj miz maz, miz boux couhsuenq gak cienz neix doek youq dangnaj, de hix mbouj gungj hwet bae gip hwnjdaeuj. Lwgnyez sim’angq dwk gip hwnj- daeuj, mbouj dwg gip ndaej cienz sim’angq, dwg ndaej guh le gienh saeh ndei he roxnyinh simhai. Geiq ndaej yawj saw raen daengz coenz vah baenzneix: Boux hagseng mbouj miz cihsiz dwg cungj “huq yaez”, hoeng swhsiengj binjdwz mbouj caezcienz dwg “huq yiemj”. Gou nyinhnaeuz dang lauxsae, itdingh cungj maq- muengh gyoengq hagseng son gvaq haenx cungj dwg “huq ndei”, aeu son’gyauq hagseng seiz, cungj aeu bae louzsim gij swhsiengj hagseng, mbouj hawj swhsiengj gyoengqde seizbienh deng sienghaih, saeqsim hoh ndei gij sim moix boux hagseng, caemrwg caj va hai.