Miz duz roegyengj ndeu heuhguh Giujgiuj, de gig coengmingz, haujlai saeh de baez yawj couh rox lo.

Baez ndeu, Giujgiuj yawjraen miz duz gaeqlwg ndeu, mwh de gwn doxgaiq, lienz naedsa hix doxcaez gwn roengzbae lo, de couh naeuz:“Gaeqlwg ha, mwngz daiq mbouj siujsim loba, gwn sa roengzbae yaek ngaiz dungx in bw.”

“Mbouj lau.” Gaeqlwg naeuz, “Gou gwn sa dwg vih le nganzyungz gijgwn, bangcoh aendungx siuvaq. Mbouj gwn sa dungx cij ngaiz in ne.”

Youh miz baez ndeu, Giujgiuj bae caeuq duz roeglaej guhcaemz, gyoengqde raen duzciengh aeu heujraez gyongz gaiq rin roengzdaeuj le, gingqyienz yungh aenndaeng raezraez de genj gij rinndaek haeuj bak bae gwn, duz roeglaej doeksaet liux, nyaenx mbouj ndaej cam naeuz: “Ya! Duzciengh vihmaz aeu gwn rin ha?”

Giujgiuj riu lo, naeuz: “Neix miz gijmaz geizgvaiq, de gwn rin dwg vih le muz soiq gijgwn.”

Duzciengh ndaejnyi le, ngauz gyaeuj naeuz:“Duz roegyengj iq ha, mwngz gangj loek lo. Gou gwn gij rin neix hamz miz gyu, ndang gou youh hung youh maengh, aeuyungh gyu lai lo.”

Doeklaeng, Giujgiuj caeuq duz roegdingdiuj bae henz haij guhcaemz, raen miz duzngozyiz ndeu cingq youq haenx gaemz hung dwk gwn rinndaek. Giujgiuj naeuz: “Mwngz mbouj rox loba, gou lwnh mwngz, ngozyiz gwn rin dwg vih le bouj gij gyu ndangdaej aeuyungh haenx.”

“Gyang raemxhaij hamzmiz baenzlai gyu,” duz roeg- dingdiuj naeuz, “De vihmaz lij aeu bouj gyu ne?”

Ngozyiz ngiengx gyaeuj hwnjdaeuz naeuz: “Dwg ha, gij gyu gwnzndang gou miz lai. Gou gwn rin dwg vih le ndaej youq gyang raemx youz ndaej bingzonj.”

Doengzyiengh dwg gwn rin, cix gak miz gak yunghcawq. Giujgiuj naemj: “Aen seiqgyaiq neix caen geizheih, gou aeu hag gij doxgaiq lij miz haujlai haujlai ne!”

(Lij Ningzcinh raiz Ouh Caijfangh hoiz)