Youq ndaw ndoengfaex ndeu, miz aen vangzgoz doenghduz hungloet ndeu. Youz saeceij guekvuengz guenjleix, gyoengq doenghduz cungj gwnyouq ndaej gig hab’eiq. Hoeng duzciengh dauq baenz ngoenz mbwngyauyau, aenvih de miz aen nyienhmuengh lienz saeceij guek- vuengz cungj saedyienh mbouj ndaej ndeu.

Yienzlaiz ya, duzciengh siengj bae gwnz ronghndwen guhcaemz, hoeng de mbouj miz fwed, ndigah aen nyienhmuengh neix hawj duzciengh roxnyinh nyapnyuk raixcaix.

Ngoenzneix doengxhaemh, duz loqgveijmaj daengz ndaw ranz duz- ciengh soucomz gij loq de. Hoeng de baez haeuj rug, fatyienh duzciengh cix mbouj ninz. Caenh raen de song fwngz doxhab, naengh youq gwnz congz, song da laeplet, ngiengx gyaeuj coh ronghndwen. Gvaq yaep he, duzciengh cengqhai lwgda, doiq ronghndwen naeuz: “Gou maqmuengh ndaej did fwed okdaeuj, yienghneix couh ndaej mbin daengz gwn ronghndwen bae lo.” Duz loqgveijmaj dingq daengz gijneix, cuengq roengz aen swxgoeb yungh daeuj soucomz gij loq haenx, mbin daengz dangqnaj duzciengh. Duz- ciengh baez yawj, doeksaetyat. Duz loqgveijmaj ganjmuengz naeuz: “Gaej lau, gou ngamqngamq ndaejnyi mwngz siengj bienqbaenz duxciengh miz fwed ndeu, gou ndaej bangcoengh mwngz saedyienh aen nyienhmuengh neix, caenh dwg…… “Caenh dwg gijmaz?” Duzciengh gipgaenj cam. “Caenh dwg cungj fapswd neix cij ndaej yungh haemh ndeu, hix couh dwg naeuz ngoenzcog mwngz hwnqcongz seiz, mwngz gaenq ma daengz deihmienh lo, mwngz dapwngq lwi?”

“Dapwngq, caenh aeu ndaej hawj gou did ok fwed daeuj, dajdingh cij miz haemh ndeu, gou hix dapwngq!”

“Hainduj lo!” Duz loqgveijmaj doq naeuz doq dawz faexfangz baez vad, doiq fwed hunghung hauhau ndeu couh okyienh youq raeblaeng duzciengh lo.

Duzciengh haenqrengz vad fwed, de mbin le haujlai nanz, doeklaeng mbin daengz gwnz ronghndwen lo.

Gyoengq ndaundeiq caeuq ronghndwen hawj duzciengh diuqfoux, ciengqgo……Duzciengh sikhaek deng haeujyinx lo.

Doq dingq doq dingq, duzciengh siengj ninz lo, hoeng duzciengh ngeix youq gwnz ronghndwen ninz, mbouj miz denz ya, mbouj youqgaenj, gyoengq ndaundeiq aeu gij rok ronghndwen hawj duzciengh daemj fan denz ndeu.

Duzciengh ninz youq fangzhwnz- loq diemsubsub.

(Liuz Yinzveij raiz Goenggen hoiz)