Gaxgonq, aenvih gou dwg youq ranz mehdaiq majhung, sojyij gou laihnaeuz daxmeh gou mbouj gyaez gou. Doeklaeng, daxmeh gou guh yiengh saeh ndeu, hawj gou raemxda rihnangnang.

Seizde, gou ngamq miz lwg, daxmeh daeuj goq gou. Lwgnyez lij iq, de vihmiz daej, vihmaz riu, dwg mbouj dwg dungx iek roxnaeuz gizlawz mbouj ndeiyouq, dou cungj mbouj rox. Ngoenzde, lwgnyez youh daej lo, daxmeh guh ndaej ngaiz couh heuh gou gwn, gou siengj cij lwg gonq menh gwn. Daxmeh naeuz:“Mwngz gwn gonq, gou daeuj yawj iq. Yaep ndeu byaek gyoet couh mbouj ndei gwn lo. Mwngz dungx iek mbouj baenz.”

Coenz vah neix hawj gou sim raeujrub. Lwgnyez daej gou cungj dwg cij lwg gonq menh goq lajndang, daxmeh gou couh mbouj dwg yienghneix guh. Gou goq lwg gou gonq, daxmeh gou couh goq gou gonq, aenvih gou dwg lwg de. Mbat siengj daengz gienh saeh neix, raemxda gou couh doek roengzdaeuj.

Seizneix, daxmeh menhmenh geq lo, gou miz di ienqhoij. 30 lai bi cungj mbouj goq gvaq de, liz de gyae’gyae, gou naemj daxmeh itdingh siengsim lo. Seizneix gou rox daxmeh gyaez gou lo, gou hix yaek aeu gyaez de, maij de, doiq de ndei di, hawj de angqyangz.

Gienh saeh neix youq ndawsim gou haujlai nanz lo, seizneix gou gangj okdaeuj, couhdwg hawj lajndang mbouj lumz, gij gyaez naek daxmeh.