“Aiya ! Liux lo!”

Sawqmwh, miz sing dah iq he daj laj laeuz cienz daeuj. Gou fwt geiqndaej, aeu bae ciep dahlwg bae hag vehveh haenx lo.

Roengz laj laeuz le, gou cij raen dah iq he, miz caet bet bi baedauq, fwngz he gaem fuk veh, fwngz he cingq uet raemxda.

“Dahniq, mwngz daej maz?” Gou vah unq cam de.

“Haxbaenh mbouj siujsim, guh ndik maeg ningq he doek roengz mbaw dozveh bae, mbouj lengj lo.” De gangj sat youh siengj daej.

“O, seizneix ngamq haihag, dwg lauxsae heuh mwngz veh bae cang gyausiz lwi?”

“Mbouj dwg, baez saeh haenx youqgaenj lai lo——mbaw veh neix dwg gou siengj soengq hawj lauxsae guh saenzcingz, gvaq song ngoenz couhdwg cietlauxsae lo, song ngoenz neix gou youh gaen goengbuz bae ranzcoj, mbouj ndaej hoengq bouj veh……” De mbwnj bak dwk, song da yawj fuk veh de, sim’in dahraix.

Sim gou baez ndat: Dah neix baenz dwggyaez, youh baenz ndiep- gyaez lauxsae de, gou aeu siengj aen banhfap bang de cij ndaej.

Ndigah, gou sonyinx de naeuz:“Fuk veh mwngz caengz vaih, ndik maeg ningq neix hix dwg ndik ndwi. Mwngz yawj, gizneix veh aen daeng- ngoenz hoengzgywggywg he cingq- ngamj, eiqsei dwg gangj mwngz moix ngoenz caeuxcaeux couh bae hagdangz doegsaw lo…… Danghnaeuz lauxsae mwngz rox le, mbouj rox geijlai sim- angq. Mwngz gangj dwg lwi?”

Dah haenx sikhaek ngaekngaek gyaeuj, riuhehe hwnjdaeuj lo.

Gou hix onj sim hwnj ci, bae ciep lwg lo.

Youq gwnz loh, ndawsim gou fanfed mbouj dingz, dah neix hawj gou siengj daengz gij saeh seiziq gou, caen lumj gou.

Gou hix dwg dahlwg lajmbanj, mwh gou lij iq seiz, gou gig launyaenq, hagsib hix mbouj ndei geijlai, mizseiz lij vihliux bang bohmeh guh hongranz daengz gvaiz dem. Ndigah, youq ndaw da gyoengq lauxsae, gou cij dwg boux hagseng bingzciengz he, gyoengqde mbouj daiq leixlangh gou. Hoeng, gou hix caeuq gyoengq doengzhag dox- doengz ndiepgyaez lauxsae, muengh lauxsae hix gyaez gou. Mbouj gvaq, gou saedcaih launyaenq lai, moix baez gyoengq doengzhag cungj humx youq henz ndang lauxsae gangjsubsub seiz, gou cijndei ndonj haeuj gokgox gyausiz bae caegcaeg hozhaenz.

Moix daengz cietlauxsae, gyoengq doengzhag cungj haengj comz youq itheij, lwnh cawx maz doxgaiq bae soengq hawj lauxsae, gou hix geijlai siengj gaen gvaqbae, ndonj haeuj ndaw vunz bae caeuq gyoengqde caez doxlwnh ha. Hoeng, baez siengj daengz yaek youq doiqnaj baenzlai vunz gangj vah, gou cungj lau saenz bae, cijndei menhmenh byaij deuz lo.

Gou mbouj rox baenzlawz guh cij ndei, cijndei dawz gij gyaez haenx veh baenz dozveh bae, ndawde miz: Lauxsae gungj hwet son doengzhag sij cih, yienghsiengq gig unqswnh, hix miz lauxsae son dou ciengq go, vanzlij miz lauxsae caeuq dou guhcaemz, nauhyied dangqmaz……

Hoeng, gij dozveh neix, cig daengz haj nienzgaep, gou hix mbouj miz damj soengq ok saek fuk. Caen dahraix, gou itcig cungj mbouj ndaej hag gvaq vehveh, veh ndaej mbouj suenq ndei, gou rox gij doengzhag doiq gij veh neix cungj mbouj leix mbouj langh, gyoengq lauxsae haengjdingh engq yawj mbouj hwnjda lo. Ndigah gou cijndei dawz gij veh haenx guh baenz cek saw iq he gag yawj. Doengzseiz, gou hix daj ndawsim miz aen maqmuengh he: Ngoenzlaeng, gou itdingh aeu dang boux lauxsae he, caemhcaiq guh boux lauxsae ndei he.

Siengj mbouj daengz baihlaeng, loeg nienzgaep seiz, bungqdaengz Liengz lauxsae. De gig maij riu, doiq guenjleix hagseng gag miz fuengfap de, miz ciengj miz fad, de lij gig haengj cazyawj moix boux hagseng miz gij fuengmienh daegbied.

De gangj govwnz engq yinxdaeuz, gangj maz cungj gangj ndaej miz feihdauh, lienz Daegbingz maij haengj guhluenh hix dingq ndaej gig nyinh- caen. De son doengzhag sij faenzcieng, mboujlwnh dwg yawj daezmoeg, rox- naeuz daezgang, cungdenj nanzdenj, de cungj gangj ndaej miz diuz miz leix, yienghyiengh son caez bae. Mizseiz de vanzlij son daihgya ciengq go dem. Ndigah, gyoengq doengzhag cungj gyaez de dangqmaz, daengx ban gij cingzcik cungj biusatsat hwnjbae. Mizseiz, de vanzlij heuh dou moix boux caen fwngz gag guh bauqceij. Ndawde gij faenzcieng dwg dou gag sij, gij dozveh dwg dou gag veh…… Gou couh dawz gij faenzcieng caeuq gij dozveh gaxgonq yo haenx caegcaeg aeu okdaeuj yungh. Ndigah, gij bauq gou cungj sij ndaej daegbied, gij dozveh veh ndaej gyaeundei. Mbouj- duenh ndaej Liengz lauxsae haenh ndei. Miz haujlai fuk vanzlij ndaej de aeu bae cang ndaw gyausiz “suenva hagsib” bae. Gou yied daeuj yied miz saenqsim bae hagsib, gij cingzcik gou couh ngoenz doek ngoenz bienq ndei, haujlai lauxsae、doengzhag cungj lingh da yawj gou.

Siujyoz yaek bizyez seiz, gou caeuq doengzhag bae ranz Liengz lauxsae, baezneix hix dwg gou baez daih’it bae ranz lauxsae soengq doxgaiq. Gij doxgaiq cij mbouj gvaq dwg gij bingzva、bitmaeg caeuq boicaz daengj gij huq saeq neix, hoeng, “laex mbaeu cingz naek”. Dou hix siengj bae hawj Liengz lauxsae soengq geij gawq vah hohfuk dem, docih de sinhoj son dou.

Mwh dou baenzbang ndwn daengz bakdou ranz Liengz lauxsae seiz, de cungj riu mbouj dingz, doq gotumj dou, doq angqvauvau ciep dou haeuj ranz bae naengh. De gig angqyangz, gig simnai, gij saenzcingz de daj ndawsim fat ok, nanz aeu cihsaw daeuj gangj ndaej ngamj. Saeh neix hawj gou ciuhvunz nanz- lumz……

Daengz seizneix, gou gaenq youq gwnz gyangjdaiz guh cibgeij bi lauxsae lo. Son saw son vunz dwg saeh dwgrengz, hix dwg saeh nanz byaij he. Youq ndawde, gou miz angqyangz gvaq, hix deng vei gvaq…… Hoeng, moix daengz son saw naet seiz, gou cungj haengj hai《Majhung Le, Gou Couh Baenz Mwngz》souj go neix daeuj dingq. Baez dingq, cungj hawj gou simmaez dahraix. Lumjbaenz fwt he cou gij ndaejgeiq gou caez bae, yaep he youh menhmenh cang rim dauq. Lumjbaenz dauq daengz seiziq, gij saeh youq hagdangz haenx youh menhmenh fouz hwnj da daeuj.