Vah bouxbien: Geij geiz gonq, dou daengh le gij faenzcieng youq Vahcuengh Sawcuengh Suijbingz Gaujsi cunggaep ndawde sij ndaej ndei caemhcaiq ndaej faen sang okdaeuj, ndaej daengz vunzlai haenh ndei. Baenzneix, dou cix laebdaeb daengh gij faenzcieng youq gaujsi cogaep、gaugaep ndawde sij ndaej ndei okdaeuj, hawj caezgya caemh yawj.

Youq ndaw swnghhoz gou, miz haujlai saeh cungj lumz lo, hoeng, miz gienh saeh ndeu hawj gou nanzlumz.

Geiq ndaej miz baez seiznit banhaemh ndeu, miz boux lwgnyez sam seiq bi ndeu louzlangh daengz mbanj dou, lwgnyez daenj buhvaq uqaa, aiq dwg baenzngoenz mbouj gwn doxgaiq lo, byaij loh cungj mbouj miz rengz, ndang saenzdwddwd, hojlienz dangqmaz. Daxmeh gou raen le, ganjvaiq daiq lwgnyez neix maranz, raen lwgnyez uq lai, daxmeh couh vuenh buhvaq seuq hawj de daenj, aeu ngaiz hawj de gwn, lij ce de youq ranz gvaq haemh. Ngoenz daihngeih, daxboh lwgnyez neix daeuj ra lwgnyez, ra daengz ranz gou, raen lwgnyez de ndaej ciuqgoq baenzneix ndei, gamjdoengh dwk song hoq gvih roengz gwnzdieg, doiq daxmeh gou naeuz:“Mwngz caen dwg bouxvunz simndei ha! Vunz ndei miz bauq ndei!”

Daxboh lwgnyez lij naeuz soengq di doxgaiq caeuq ngaenz hawj daxmeh gou, hoeng, daxmeh gou baenzbaenz cungj mbouj aeu.

Gienh saeh neix yienznaeuz gvaq ndaej geijcib bi, aenvih gienh saeh neix cim ok daxmeh gou dwg boux vunz simndei ndeu, hix gyauyuz gou baenzlawz bangcoh vunz. Gou aeu yiengq daxmeh gou hagsib, hagsib de baenzlawz guh vunz ndei.