Dingz ci, couhdwg dawz gyaq ci dingz haeuj vihdingzci bae, youq neix dan gangj dingz gyauceh. Dingz ci dwg gienh saeh iqet ndeu, hoeng saeh iq hix ndaej rox vunz mbouj doengz vunz, aeu vahdoj gangj dwg cungj haeux ndeu ciengx bak cungj vunz.

Ndaw danhvei dou miz aen hongh ndeu, aen hongh neix mbouj hung, dingz ndaej cib lai gyaq gyauceh. Bingzciengz hwnjban roengzban cungj raen vunz dingz ci, raen lai le couh fatyienh gyoengqvunz dingz ci boux mbouj doengz boux: Saek boux dingz ndaej bienz lai、saek boux dingz ndaej manz dai、saek boux naemj daengz aeu nyiengh vunz、saek boux singjgaeh gvaq maz, lumjnaeuz caeghaw yaek gauz ci de…… Caj gou gangj saeh mizyinx vunz dingz ci seuq le, caiq gangj gou swhgeij dingz ci, gou dingz ci hix miz gojgaeq ndeiriu daengz aeu mwngz myaiz rih bae.

Gangjgoj boux daih’it gonq. Ngoenz ndeu haetromh, miz gyaq ci Sanghdaznaz hai haeuj gyanghongh daeuj. Gyaq ci neix gaenq gaeuqget lo, hai ci cungj yiengj ngutngut ngetnget. Gyaq ci gaeuq baenzneix, hoeng bouxdawzci ciuqyiengh hai ndaej bienz lai. Gou raen de doenq hai byaici haeuj aen vihdingzci bae dwg yienghneix guh: Faj fwngz ndeu doq baenq aen buenzfuengyiengq, lingh faj fwngz doq dawz ciem yaek heuj, aen vihdingzci youh gaeb youh nem ciengzhumx，de couh lumj lwgnyez guhcaemz yienghhaenx baenq song gien gyaq ci couh dingz ndei lo, dingz ndaej youh cingq youh nem ciengz.

Boux neix dwg boux cienmonz dawzci, gvaiq mbouj ndaej dingz ci bienz baenzneix. Haxbaenh de gwn faenj dauqma, doq yaek heuj doq dingz ci, heuj caengz yaek seuq couh dingz ndei lo. Haujlai vunz gwn gvaq le cungj aeu yaek heuj, bingzseiz youq gwnz haw gingciengz raen vunz gwn faenj imq le, ndaw bak gamz diuz ciemyaekheuj cungj sij mbouj ndaej gveng bae.

Gangjgoj boux daihngeih lo. Haemh ndeu, miz gyaq gyauceh gig bengz ndeu hai haeuj gyanghongh daeuj. Gyaq ci neix heuh guh Bauj- sizcez “Bajlahmijlah”, gangj Gun yungzheih gangj baenz vah ndeiriu “banajmohnaj”, gij eiqsei couhdwg “(mehmbwk) gyawz lau deng lumh couh lumh de giz haenx”. Aen coh neix ndeiriu lai, gou ngamq dingq gangj baez ndeu couh geiqmaenh lo. Gyaq ci dingz vang youq gyang loh, saek loh le ci vunz haeuj ok cungj mbouj ndaej. Aen ranzlaeuz banh- goeng haenx miz bouxlaux ndeu cigban, bouxlaux byaij gvaqbae heuh bouxdawzci haenx dingz ci ndei di, gaej saek loh vunz. Bouxdawzci dwg bouxcoz ndeu, de roengz ci le, ngiengx gyaeuj muengh gwnzmbwn bae, lumj- naeuz bouxlaux dwg duzfangz yiengh- haenx, vunzraeuz yawj duzfangz cungj yawj mbouj raen, yienghneix lij yawj goenglaux neix guh maz fangz?

Dingq bouxlaux cigban naeuz, bouxcoz haenx dwg lwg ranz fatcaiz, boh de youq ndaw singz guh ranzlaeuz gai, seizneix gai ranz canh cienz lai, gip cienz beij gip mbawfaex lij yungzheih. Seizneix, mizmbangj boux- coz ranz miz cienz lai couh nyinh- naeuz swhgeij siengj guh maz cungj ndaej, siengj caeuq dahsau lawz ninz hix cungj ndaej. Haemhhaenx, boux- coz couhdwg daeuj ndaw gyanghongh neix aeu yoek sau lengj ndeu. Siengj mbouj daengz, dahsau haenx mbouj leixlangh lwg miz cienz. Bouxlaux cigban riu naeuz:“Lwg miz cienz hix mbouj naengz siengj ninz sau lawz couh rag ndaej sau haenx hwnj mbonq ha.”

Gangjgoj boux daihsam lo. Boux neix dwg dahsau ndeu, gou raen de baez lawz dingz ci le, byaij roengz ci lij yawj gyaq ci dingz ndaej cingq lwi, danghnaeuz miz di cix roxnaeuz gyawj ci baihhenz lai, vunz aeu hai douci mbouj fuengbienh, de youh hwnj ci bae caiq doenq ci, miz saek seiz doenq ci song sam baez cij dingz ndaej ndei.

Miz baez ndeu, bouxlaux cigban haenx raen de dingz bae dingz dauq, couh riunyumj naeuz:“Ca mbouj lai couh ndaej lo.” Dahsau doq riu doq nyinhcaen han naeuz:“Gou faeqheiq di mbouj youqgaenj, raeuz mbouj ndaej gaz vunz nw!”

Dingq bouxlaux cigban haenx naeuz, dahsau neix guh saeh naemj daengz vunz lai, de youq ndaw danhvei hix dwg yienghneix guh vunz, gyoengq doengzdoih cungj haenh de vunz ndei.

Caiq gangjgoj boux daihseiq lo. Boux neix dwg bouxvunz nguxcib lai bi lo, de dingz ci miz di mbouj doengz vunz: Baez lawz dingz ci, de cungj lingh aeu fag suj raezrangrang suj aen buenzfuengyiengq maenhmaenh bae, lumjnaeuz miz duz maz fangz yaek caeg ci de. De singjgaeh baenzneix geizgvaiq lai lo: Ndaw gyanghongh gingciengz dingz miz ci bengz, lumjnaeuz ci Bwnhciz caeuq Baujmaj, youh dijbauj youh bengz gvaq gyaq ci de lai, vunz cungj mbouj suj buenz- fuengyiengq. Caiq gangj, ndaw hongh dauqcawq ancang miz sezsiengdouz gamyawj, lienz duz roeglaej mbin haeujdaeuj ra gwn cungj deng ingj- siengq louz ndaw dennauj, duz lawz daeuj caeg ci couhdwg ra dai lo.

Miz baez ndeu, gou raen boux vunz neix dingz ci ndei le, de ngamq byaij haeuj aen ranzlaeuz banhgoeng, sikhaek dingqnyi yiengj “dihdih” song sing, couh lumj homh caeggeq yiengh- haenx buet okdaeuj. De laihnaeuz gyaq ci swhgeij deng caeg lo, song lwgda de baenqlulu nebra caeggeq, muengh bae muengh dauq cungj mbouj raen miz duz fangz lawz gyawj ci de. De youh caiq heux gyaq ci byaij hop ndeu, cungj ra mbouj raen gizlawz deng vunz yoek gvaq le, cij cuengqsim bae hwnjban.

Gvaqlaeng dingq vunz naeuz, de baenzngoenz lau miz fangz caeg ci de, dwg aenvih gaxgonq de deng caeg gvaq dahraix: Seizgonq vunzraeuz caengz miz ngaenz lai cawx ci gyauceh, seizhaenx ranz lawz cawx ndaej gyaq cimohdoz couhdwg ranz miz ngaenz youh miznaj lo. De rom haujlai bi le cij miz ngaenz cawx ndaej gyaq cimohdoz, hoeng miz ngoenz ndeu, de naengh mohdoz bae haw, daengz haw nyouh gaenj le couh dingz ci haeuj diengzhaex bae ok nyouh, siengj mbouj daengz ok gong nyouh le ci lengj de mbouj raen lo……

Ok gong nyouh sied gyaq ci bae, gong nyouh neix bengz dai bae, seizdaih haenx mohdoz dijbauj lumj gyauceh seizneix. De deng fangz hwnj ndang baezneix le, baezlaeng dingz ci cungj ngeiz miz fangz yaek caeg ci de……

Gangj bae gangj dauq, aeu vunz daeuj gangj riu doh le, baezneix gou aeu gangj swhgeij dingz ci yienghlawz yienqsiq lo.

Miz baez ndeu, gou hai ci bae aen yienh ndeu ra baengzyoux guhcaemz. Ranz baengzyoux ndawde miz aen gyanghongh gig gvangq, danhvei de ranzranz cungj miz vihdingzci, baihndaw hongh lij miz aen giuzcangz gvangqlangh ndeu, bingzseiz mbouj miz vunz dwk giuz, laemzseiz dingz cibgeij gyaq ci cungj ndaej. Ngoenzhaenx, gou gag boux dog dingz ci haeuj giuzcangz bae, hax- baenh gangj gvaq, giuzcangz dingz cibgeij gyaq ci cungj ndaej, hoeng gou couh lumj deng fangz hwnj ndang yienghhaenx, seiz doenq ci haeuj giuzcangz, doenq gvaqdoh lai bungq deng lohdaeng henz giuzcangz, diuzdongh lohdaeng hung lumj goekga mehmbwk haenx deng gou bungq “bung” sing ndeu raek lo.

Gvaqlaeng, baengzyoux nai gou naeuz:“Gvaiq mbouj ndaej mwngz ha, sou youq ndaw singz hung hai ci saek ci gvenq le, saek ci lai dauq haeujsim hai ci, youq neix hai ci mbouj miz vunz gaz le dauq mbouj siujsim ha.” Gou mbouj rox gangj maz ndei, gag riumbw lo: Swhgeij hai ci miz cib lai bi lo, hai gvaq haujlai loh lingq loh gaeb cungj mbouj deng gvet gvaq saekdi, baezneix dauq youq aen giuzcangz gvangqlangh bungq raek dongh lohdaeng.

Mehyah gou dauq singjsag lai, de naeuz gou youq giuzcangz hai ci bungq deng dongh lohdaeng dwg “goenglaux neix ngoengqngwt lo”!

Mehyah yienghneix gangjvah, gou guhsing mbouj ndaej lo: Gou gaenq nguxcib lai bi le, dwg goeng- laux ngoengqngwt dahraix lo.