10 nyied 27 hauh， Aen Hoih Canghfanhoiz Saemjdingh Swz Moq Sawcuengh Bi 2018 youz Cunghgoz Minzcuz Yijvwnz Fanhyizgiz cawj- banh、 Gvangjsih Nanzningz Si Sang- linz Yen Minzcunghgiz bangbanh haenx youq Nanzningz Si Sanglinz Yen ciuhai. Song boux fugizcangj Cunghgoz Minzcuz Yijvwnz Fanh- yizgiz Lij Vanyingh、 Lij Yuzlen， boux fucujyin Gvangjsih Bouxcuengh Swcigih Minzyijveij Veih Yungj- hungz、 boux cujyin Nanzningz Si Minzyijveij Moz Swhhungz、 Boux fuyencangj Nanzningz Si Sanglinz Yen Vangz Ci daeuj camgya gaih- musiz. Aen hoih neix youz Lij Yuzlen cujciz.

Youq gwnz hoih， Lij Vanyingh giethab gij hingzseiq moq seizneix gaiq hong fanhoiz sawvah minzcuz bungzdaengz de caeuq gij cingzgvang aen hoih neix， daj Cibgouj Daih aen dangj raeuz doiq hong minzcuz miz maz ndabaij moq、 iugouz moq daengj fuengmienh， daezok sam diemj iugouz： It dwg aeu gij cingsaenz Cibgouj Daih daeuj doengjlamx， youq hingzseiq moq guhndei gaiq hong fanhoiz sawvah minzcuz. Ngeih dwg cinjdeng roxyiuj muzbyauh moq iugouz moq， hoiz ok gij Sawcuengh engq ndei engq lai hawj vunzlai. Sam dwg laebdaeb fazyangz cungj cingsaenz canghlig， hawj gaiq hong saemjdingh swz moq guh ndaej engq ndei.

Mwh Veih Yungjhungz gangj- vah， gangj daengz，Swcigih Minz- yijveij youq mwh caeuq Cunghgoz Minzcuz Yijvwnz Fanhyizgiz doxgap guh gij hong fanhoiz vwnzgen daengx guek “song hoih”、 banh aen ban son Cuengh hoiz Gun bi 2017－2018 caeuq gak hangh hongsaeh， cungj aeundaej le cingzyauq ndei， doengz- seiz naeuz baezlaeng yaek caez dazfwngz、caezsim guh， dawz gaiq hong fanhoiz Sawcuengh nyoengx baenaj dem.

Gwnz hoih， Cunghgoz Minzcuz Yijvwnz Fanhyizgiz soengq le 《Cunghgoz Gungcanjdangj Cangh- cwngz》《Cibgouj Daih Vwnzgen Gyoebbien》《Cunghvaz Yinzminz Gunghozgoz Yenfaz》 daengj cek Sawcuengh hawj Sanglinz Yen Yinzminz Cwngfuj.

Baez hoih neix， miz Baekging、 Gvangjsih、 Yinznanz daengj dieg 23 boux lauxhangz， faen guh song aen cuj， saemjdingh gij cwngci swz moq Sawcuengh ok laeng gij vwnzgen Cibbet、 Cibgouj Daih caeuq gij vwnzgen daengx guek “song hoih” geij bi neix youz Cunghgoz Minzcuz Yijvwnz Fanhyizgiz soucomz haenx.

Aen hanghmoeg gveihfan swz moq youz Cunghgoz Minzcuz Yijvwnz Fanhyizgiz daj bi 2010 haiguh， daengz seizneix， gaenq youq dieg Gvangjsih、 Yinznanz daengj hai le 9 baez， saemjdingh le gij swz baudaengz 22440 lai aen swz moq Sawcuengh. Baez hoih neix，ndaej sawj gaiq hong swz moq Sawgun hoiz ndaej engq gveihfan、engq dungjyiz caeuq engq byauhcunj，sawj gij saehnieb fanhoiz Sawcuengh engq ndaej gohyoz hwngfat， sawj daengx aen saehnieb fanhoiz sawvah minzcuz mboujduenh guh baenaj.

(Cunghgoz Minzcuz Yijvwnz Fanhyizgiz Funghranz Sawcuengh hawjgauj)