bouxraiz Swng’aihgwzsuhbeilij bouxhoiz Luz Fwncangz

圣埃克苏佩里 著 卢奋长 译

“Gou gvaqngoenz genjdanh lai.” Duznyaenma naeuz, “Gou gaeb duzgaeq, vunz gaeb gou. Duzgaeq cungj doxlumj liuxliux, vunz goj doxlumj liuxliux. Yienghneix, gou mbwqlinlin gvaq. Langhnaeuz mwngz gunx gou le, gou gvaqngoenz cix vuenyungz dahraix lo. Gou rox ndaej ok sing’yamqdin mwngz, cungj sing’yamqdin neix mbouj lumj sing’yamqdin wnq. Gou baez nyi sing’yamqdin wnq cix ndot deuz ndoj hwnjdaeuj, hoeng sing’yamqdin mwngz cix lumj singfwen nei, gou ndaej nyi liux cix ndonj ok congh daeuj. Mwngz yawj vei! Mwngz raen gaiq nazmieg baihde lwi? Gou mbouj ngah gwn mienhbau, haeuxmeg doiq gou daeuj gangj, mbouj miz saek di yungh. Nazmeg caeuq gou goj mbouj miz nanangq saek di. Hoeng, byoemgyaeuj mwngz henjrwkrwk. Langhnaeuz mwngz gunx gou le, cix ndei lai lo. Haeuxmeg goj henjrwkrwk, gou baez yawjraen de cix ngeix daengz mwngz. Mbangjbaez, gou lij gyaez gij singrumz nazmeg dem……”

Duznyaenma cim Lwgvuengziq nanznanz bae.

“Mwngz daeuj gunx gou vei!” De naeuz.

“Gou goj yaek gunx mwngz dahraix ne.” Lwgvuengziq han naeuz, “Hoeng gou mbouj ndaejvangq geijlai, gou yaek bae ra baengzyoux, lij yaek roxyiuj lailai doenghyiengh dem.”

“Vunzlai roxyiuj gij doxgaiq de gunx gvaq haenx cix ndaej lo.” Duznyaenma naeuz, “Vunzlai mbouj ndaej vangq bae roxyiuj gijwnq lo. Gyoengqde bae ranzbouq cawx doxgaiq yienhmiz. Hoeng lajmbwn neix mbouj miz ranzbouq lawz cawx ndaej baengzyoux, yienghneix vunz cix mbouj miz gijmaz baengzyoux lo. Langhnaeuz mwngz yaek aeu boux baengzyoux ndeu, mwngz cix daeuj gunx gou vei!”(28)