贵港市覃塘区蒙公镇高占小学五年级 Dwng Liengzyij/邓良宇

Guhvunz mboujndaej dam bienzngeiz,mboujne leixgyaq sieddaej.

Geiq ndaej bi’gvaq ciet “5.1”, gou caeuq Vangz Gangh lij miz daxboh gou bae Gveigangj Caehnanzsanh guhcaemz.Ngoenzhaenx rumz swnh ndit ndei. Dou sim’angq dwk daeuj daengz Caehnanzsanh, byaij haeujbae, couh yawjraen aen bouq nyingz cungq ndeu. Aenvih gou gig maij nyingz cungq, ngamqngamq gou hix daiq miz 40 maenz ngaenz. Sojyij gou couh byaij gvaqbae. Gou cam daxbuz:“Daxbuz, 10 maenz ngaenz ndaej nyingz geijlai naed bikmax?” Daxbuz riu gangj:“10 maenz ngaenz 20 naed bikmax.”Gou roxnyinh gig habsuenq, aenvih gizwnq 10 maenz ngaenz cij ndaej 5 naed bikmax. Gou caeuq Vangz Gangh couh boux hawj 10 maenz ngaenz, daxbuz hawj dou boux 20 naed bikmax, gou nyingz liux lo, daxbuz couh hawj gou aen vanzgi youq lajmbanj 5 gak ngaenz couh ndaej cawx ndaej haenx. Daxbuz gangj neix couh dwg ciengjlaeh. Gou muengh gij ciengj naemj: Neix couh dwg 10 maenz ngaenz vuenh daeuj, siedbonj lai lo. Baezneix lij ndaej lauz di bonj dauq, engq siedbonj lij youq doeklaeng ne.

Gou gaem ciengjbinj cam Vangz Gangh:“Raeuz seizneix bae gizlawz youz ne?” Vangz Gangh cienq gyaeuj baez yawj, yawj- raen aen faexgaq ndeu, angq dwk gangj:“Raeuz bae gizhaenx youz.”Gou cienq ndang baez yawj, yawjraen faexgaq cungq- gyang miz cih ‘ciengj’gig hung ndeu, gwnz cih miz diuz dietding, baihlaj miz 3 aen gek, sang daihgaiq 10 leizmae. Baihgwnz lij miz geij cihsoq, faenbied dwg 5 maenz、10 maenz、20 maenz、30 maenz、40 maenz、50 maenz. Gou couh byaij gvaqbae cam:“Daxgoeng, neix dwg gijmaz? Baenzlawz saj?”Daxgoeng riunyumnyum gangj:“Neix dwg aen danzgungh gihgi caeu ciengj, cijaeu mwngz beng aen danzgungh cienq baez ndeu, caiq cuengq hai, danz doiq aen giuz, aen giuz couh gaen gij gveijdau ringx, doeklaeng aen giuz dingz youq cihsoq lawz, couh ndaej geijlai maenz. 5 maenz ngaenz ndaej saj baez ndeu.” Gou ndaw sim naemj: Ndei ha, lauz dauq cienz ci hix ndei ha. Gou caeuq Vangz Gangh gak saj baez ndeu cungj mbouj ndaej saek faen ngaenz. Gou mbouj fug, baenzlawz song boux vunz cungj mbouj cungq, yienzhaeuh, gou caeuq Vangz Gangh mbouj fug, youh caiq cuengq cienz haeujbae saj, hix mbouj cungq. Doeklaeng, gou caeuq Vangz Gangh couh dawz cienz ndaw daeh cienzbouh dwk bae saj, yienghneix bonjcienz cungj mbouj ndaej dauq lo. Dou song vunz sim naiqnuegnueg dwk byaij deuz.

Seizneix, daxboh gou daeuj daengz lo.Gou couh dawz gij cingzgvang gangj hawj de dingq. Daxboh dingq le, hix cuengq cienz haeujbae saj baez ndeu, hoeng hix mbouj cungq. Daxboh rox gou caeuq Vangz Gangh cungj deng yaeuh lo, de gaem hwnj gij giuz yienghceij lumj binghbanghgiuz nei, yungh Vahcuengh gangj:“Raeuz deng yaeuh lo, aen giuz haenx dwg swzdiet, cijaeu raeuz baez naek aen nieng, giuz couh rox dingz youq giz dietding, haeuj mbouj daengz cihsoq cungqciengj lo. Sojyij mbouj gojnaengz cungqciengj. Baez neix couh hawj raeuz baez gyauyin lo.”

Daj baez neix hwnj, gou caiq hix mbouj dam bingzngeiz lo. Aenvih laj mbwn mbouj miz saeh bienzngeiz.

（lauxsae son’gyauq Cuh Veimingz/朱卫明）