Youq Cungguek Gungcanjdangj lingjdauj baihlaj, guek raeuz gaijgwz hailangh gaenq ndaej 40 hopbi lo. Youq 40 bi neix gvaqdaeuj, gij ndaw singz lajmbanj raeuz bienqvaq gig hungmbwk.

Hawsingz bienq ndaej gyaeundei raixcaix, gyauhdungh seizneix bienhleih lai lo, bae daengz gizgyae cungj mbouj aeu geij nanz. Lumj gaxgonq bae daengz rogguek, roxnaeuz guek raeuz baihnamz baihbaek, cungj aeu geij ngoenz bae, hoeng gaijgwz hailangh le, guek raeuz fazcanj lo, caiq mbouj yungh baenz nanz bae daengz gizdieg lo.

Lajmbanj hix miz bienqvaq lo. Seizneix lajmbanj coih roen ndei lo, bae daengz ndaw yienh ndaw singz hix gig yungzheih. Lij geiq mwh gou lij iq, lajmbanj ranzranz gig hoj, mbouj miz geij donq noh gwn, lwgnyez mbouj miz geij geu buh, geu buh ndeu dahcej daenj mbouj hab le, youh hawj geij boux nuengx daenj. Ndwen mbouj ndaej daiq lwgnyez bae saek baez haw, couhcinj bae haw hix mbouj fuengbienh, gij roen lajmbanj cungj dwg gumzgumz gamxgamx, hoj byaij dangqmaz.

Hoeng, gaijgwz hailangh 40 bi gvaqdaeuj, beksingq swnghhoz bienq ndei lo, caiq mbouj lumj gaxgonq nei. Gou vih guek raeuz gaijgwz hailangh ndaej fazcanj cibfaen angqyangz.

Gaijgwz hailangh 40 bineix, guek raeuz hix bienq ndaej yied daeuj yied hungmbwk fanzyungz lo. Gaxgonq gohgi mbouj fatdad, cungj deng bouxwnq hangz. Doeklaeng guek raeuz haenqrengz gaenx guh bae hag, bae yenzgiu, cungj cauh ok baenzlai feihgih、daihbauq、hangzmuj、hojcen daengj gak cungj gak yiengh doxgaiq, caiq mbouj lau ciengzseiz deng vunz hangz lo.

Guek raeuz fazcanj baenz hung le, couh yied daeuj yied yawj naek gohgi hwng guek, yinzcaiz giengz guek lo. Bohmeh lij iq seiz geij beixnuengx cungj mbouj ndaej doegsaw caez, cij miz saek boux roxnaeuz song boux ndaej bae doegsaw, danhseih mbouj doeg ndaej nanz, cij doeg daengz siujyoz couh mbouj ndaej mbouj dauqma lo. Aenvih ndawranz gungz- hoj, mbouj miz ngaenz hawj doeg lo. Seizneix raeuz vuenyungz lai lo, bouxboux lwgnyez cungj ndaej doeg daengz gouj nienzgaep, danghnaeuz bouxlawz miz naengzlig, lij ndaej doeg daengz gauhcungh、dayoz caeuq engq sang dem.

Raeuz seizneix lwgminz swngh- hoz caen bienq ndei lo, bouxboux cungj caencaen yiengjsouh daengz gij ndeicawq gaijgwz hailangh lo, gou gyo’mbaiq gou seng youq guek raeuz seizneix, caemh gyo’mbaiq dangj raeuz caeuq guek raeuz, muengh guek raeuz yied daeuj yied hwngvuengh fanzyungz!