Geiq ndaej haujlai bi gaxgonq, ngoenzhaenx, aen mbwn banringz mongmoekmoek, mbouj miz saekdi rumz. Fwj goemz roengz daemqdetdet, lumjnaeuz yaek doek fwn. Couh lumj boux vunz ndeu yaek ae, hoeng, youh ae mbouj okdaeuj, mbaet youh nanz- souh raixcaix.

Gou simcingz mbouj sangj, ndawsim ceiq fanz cungj dienheiq neix bae okcai. Aenvih dwg baez daih’it bae ndaw singz hung camgya beiz- yinbanh hagsib Sawcuengh, swhgeij youh mbouj rox baezneix bae hag ndaej maz doxgaiq, gangj gij vah mbouj soh, lienz Sawcuengh dwg maz cih gou hix mbouj rox saek aen. Mboujguenj baenzlawz, cungj gihvei neix nanz miz, gou couh naengh ci bae hagsib lo.

Liz hai ci seizgan lij miz diemj lai cung, gou seizbienh swyouz cwxcaih menh byaij youq gwnz gvangjcangz, baenzneix muz seizgan.

“Goeng’au, hojlienz hojlienz gou ya, faen di ngaenz hawj gou ba.” Aen sing he ciuyinx gou. Aen simhoz gou riengz sing muengh bae, yawjraen baihnaj goeng’au haenx miz laeq lwgnyez daenj buh leqlaengq he, faj fwngz ndaemndwt lumj nyauj yiuh nei iet okdaeuj. Goeng’au haenx daenj geu buh cingh he, geu buh hausisi, vaq luemj yaebyaeb, de gipmuengz byaij roen, lau faj fwngz ndaemndwt lwgnyez dongj buh de uq bae.

“Hojlienz hojlienz gou ba, gou sam ngoenz mbouj miz doxgaiq roengz dungx gvaq le, hawj maenz he hix goj ndaej.” Ngeix daengz ndek mbouj doek laeq lwgnyez neix, goeng’au haenx cienq laeng hawj de geij coenz:“Deuz! Deuz! Deuz! Baenzneix iq couh rox okdaeuj guh seng’eiq!” Laeq lwgnyez haenx daengx roengzdaeuj, saetmuengh raixcaix.

Raen daengz neix, ndawsim gou gag ngeix naeuz: Dingqgangj seizneix cienmonz miz bang vunz baengh baenzneix liemx ngaenz gvaq ndwen- ngoenz. Gyoengqde itcig leihyungh boux vunz miz doengzcingz, bik lwgnyez guh yiengh nyapnyuk cang gaujvaq daeuj yaeuh cienz. Gangj mbouj dingh gyoengq vunz neix cingq ndwn youq gizgyawj yawj laeq lwgnyez neix, byawz rox gyoengqde dwg mbouj dwg bohmeh laeq lwgnyez neix. Danghnaeuz lwgnyez liemx mbouj ndaej cienzngaenz cuk, dauqma aiq deng hut deng dub dem. Mboujguenj baenzlawz gangj, laeq lwgnyez neix caen hojlienz, aen nienzgeij neix bonjlaiz wngdang bae hagdangz doeg- saw, nyinhcaen hagsib, hoeng…… Gyoengq bouxlaux sim doeg lai, mbouj soengq lwgnyez bae doegsaw hag cihsiz, hawj de daengzcog baenz boux vunz doiq sevei miz yungh ndeu.

Gou cingq ngeixngvanh, laeq lwgnyez byaij daengz baihnaj gou, mbe song faj fwngz ndaemndwt okdaeuj cam gou:“Dahcej simndei, hojlienz hojlienz gou ba, gou sam ngoenz mbouj miz naed haeux he roengz dungx gvaq, mwngz hawj maenz he hix baenz.” Mboujguenj laeq lwgnyez neix caen dwg saedceij gungzhoj, roxnaeuz dwg yaeuh vunz, ndawsim gou nanzgvaq baenzmaz. Gou dawz maenz ngaenz he okdaeuj, ndenq haeuj ndaw fwngz de bae. “Docih mwngz! Dahcej simndei! Hoh mwngz vunzndei seizheiq hix ndaej ndei!” Laeq lwgnyez neix byoem ndaem song da ndongqliklik, aen bak de caen rox gangj vah, hojsik aen ndang de uqnoeknoek, gou naemj de swhgeij hix lumz baezgonq swiq caemx dwg seizlawz lo.

Duzbid youq gwnz gofaex heuh- getget, dienheiq youh aeng youh ndat, lumj aen rae naengj ngaiznaengj nei. Gou mbouj nyienh bae ndaw cehcan caj ci, couh byaij haeuj aen diemqgaiva bae. Gou bingzciengz youq aen diemq neix cawx doxgaiq gvaq, dahgaiva roxnaj gou, gipmuengz gvaqdaeuj dongx gou. “Mwngz ndei, baezneix mwngz yawj maz?” Dahgaiva roxsoq youh sing unq cam gou, de mbouj gangj “cawx maz”, mienx ndaej yaek gaemh vunz cawx doxgaiq.

Seizneix, youq baihrog youh byaij haeuj daeuj boux vunz ndeu, gou raen boux vunz haenx cingq dwg laeq lwgnyez haxbaenh. De gig nyinhcaen dwk genj bog va gyaeundei. “Mwngz yaek yawj maz?” Dahgaiva riunyumnyum cam naeuz, aiq de soqlaiz ngeix mbouj daengz laeq lwgnyez uq rox daeuj cawx va.

“Aeu bog vagut henjngingnging he!” Laeq lwgnyez neix hai bak naeuz.

“Yaek aeu dou soengq bae hawj byawz?”

“Mbouj yungh, mwngz youq mbaw gaj baenzneix sij ‘soengq hawj boux vunz gou ceiq gyaez’. Baihlaj sij ‘hoh daxmeh ngoenzseng haengjheiq’ couh baenz.”

“Itgungh 20 maenz ngaenz.” Dahgaiva doq sij doq gangj.

Laeq lwgnyez neix daj ndaw daehbuh dawz aen daeh iq okdaeuj, boeg coq gwnz daiz, gij ngaenzdiq cungj muz ndaej ronghliklik. De geq ok 20 maenz okdaeuj, ngednged song fwngz ndaemndwt, caiq menhmenh ndenq hawj dahgaiva. Doeklaeng ciep aeu bog vagut henjngingnging hoij miz gaj sij saw, cienq ndang lizhai aen diemq gaiva byaij lo.

Laeq lwgnyez neix lij rox cawx va bae hoh daxmeh de, neix dwg gou baenzlawz cungj ngeix mbouj daengz.

Yaek daengz seizgan fat ci lo, gou ok diemqgaiva daeuj, baihrog cingq doek fwn, gwnz roen mbouj miz geij boux vunz byaij loh, miz gak cungj gak yiengh ci baebae dauqdauq. Sawqmwh, gou muengh raen laeq lwgnyez haxbaenh, raen de gawqyienz mbouj goq ndang deng fwn rwed, ndaw fwngz rop bog vagut, siujsim yupyup baez yamq baez yamq menhmenh byaij dwk. Ndang iqetet de engq yienj ndaej nyieg, bog vagut henjngingnging ndaw fwngz de lumj youq ndaw fwnrumz engq henj lo.

Gou hwnj ci lo, ci yied hai yied vaiq, bak aek gou hix lumjnaeuz deng maz doxgaiq dub baez he nei, lwgda gou yawj mbouj raen cingcuj lo.

Gvaq baezhaenx le, gou moix baez okcai dauqma ranz, ngeih vah mbouj gangj, couh bae haw cawx doxgaiq bae ranzdaiq yawj daxmeh gou. Geiq ndaej bineix ngux nyied co’ngux, gou cawx duz gaeq cug he bae ranzdaiq yawj daxmeh gou, caemhcaiq hai soujgih okdaeuj hawj daxmeh gou caeuq dahnuengx youq Gvangjdungh guhhong sibinz gangjgoj, gou yawjraen faj naj daxmeh gou hai lumj duj va lengj nei, gwnz naj de youh lai gya miz geij sai nyaeuq lo. Gou ndomq ndaej baenzneix cingcuj, daxmeh laux lo, seizneix ndaej raen lwgnyez beij dawz ngaenz hawj de lij vuenyungz.