Vih haeujlaeg gvancez doeksaed gij cingsaenz Cibgouj Daih dangj, angqcoux Gvangjsih Bouxcuengh Swcigih laebbaenz 60 hopbi, caenh- itbouh gvancez doeksaed gij cwngcwz vahsaw minzcuz dangj caeuq guekgya, doicaenh hagsib saw vah guekgya doeng’yungh caeuq saw vah minzcuz vunznoix, doicaenh vwnzva minzcuz haeuj hagdangz, gikfat gij yiedcingz gyoengq cungh siuj hagseng hag yungh Vahcuengh, swnjcienz caeuq hwngfat gij vwnzva conzdungj maenh- ndei Bouxcuengh. Ndwen 9 ngoenz 30, Bingzsiengz Si gaiq daihngeih cungh siuj hagseng yienjgangj Vah- cuengh doxdax youq Bingzsiengz Si Daih’it Cunghyoz banh. Baez doxdax neix youz Bingzsiengz Si Minzyijban、Bingzsiengz Si Minzcuzgiz caeuq Bingzsiengz Si Gyauyuzgiz lienzhab cawjbanh, youz Bingzsiengz Si Daih- it Cunghyoz ciepbanh, caemhcaiq ndaej daengz Swcigih Minzyijveij haenqrengz haeujcoengh dem.

Baez doxdax neix gungh miz 22 boux senjsouj daj Bingzsiengz gak cungh siuj hagdangz daeuj haenx camgya. Gyoengq senjsouj camgya doxdax haenx cungj yungh Vah- cuengh bonjdieg yienjgangj, boux- cujciz yungh Cuengh Gun song vahsaw guh cujciz. Mwh doxdax, gyoengq senjsouj yungh Vahcuengh raeuzrwd lwnhgangj gij gojgaeq fatseng youq mbanjranz、hagdangz bonjfaenh, danqhaenh Cungguek Gungcanjdangj hungmbwk——Gaij- gwz hailangh 40 hopbi daeuj, Bingzsiengz gak cuz beksingq youq Cungguek Gungcanjdangj lingjdauj lajde doxgiet baenaj、haenqrengz buekguh, gvaq hwnj ndwenngoenz ndei, langhbaij le gij cingsaenz yienghsiengq Bingzsiengz hagseng gak minzcuz gyaez guekcoj、gyaez mbanjranz、gyaez minzcuz.

Doenggvaq baez yienjgangj Vah- cuengh doxdax hozdung neix, gikfat gij yiedcingz bouxcoz nyezrauh hag Vahcuengh, fatyiengz gij vwnzva conzdungj maenhndei Bouxcuengh, doicaenh vwnzva minzcuz haeuj hagdangz, gyagiengz hwnjguh ndaw- hag huzndei, coicaenh lai cungj vah huzndei minzcuz doxgiet.

(Vangz Meijcinh Suh Veidauh)