《Saw Gyoebbien Mingzdeih Vah- cuengh Dieg Vunz Youq Lajmbanj Hawsingz Gyanghcouh Gih》 mboengq- neix cingqsik oksaw, neix dwg gij gyoebcomz swhliu vwnzyen Cungzcoj Si Gyanghcouh Gih bouh daih’it hidungj cienzmienh yenzgiu、gaisau mingzdeih Vahcuengh dieg vunz youq lajmbanj hawsingz, doiq fatyiengz gij vwnzva conzdungj maenhndei Gyanghcouh Gih, coicaenh vwnzva Cungzcoj hwngfat hoenghvuengh gig miz yiyi gaenxmaenx.

Bouxcuengh dwg aen minzcuz vunznoix guek raeuz gyaeujvunz ceiq lai, miz lizsij gyaeraez caeuq vwnzva ronghlwenq, mingzdeih yungh Vah- cuengh ancoh gig miz vwnzva neihanz fungfouq, fanjwngq le gij lizsij faen- bouh、daegdiemj ngeixnaemj caeuq guh hong fuengsik beksingq Bouxcuengh, dwg gij geiqhauh Bouxcuengh daj ciuhgeq daeuj youq giz neix、gaijcauh swhyienz、cauh vwnzmingz. Daengz seizneix, Gyanghcouh Gih lij baujlouz 1000 lai aen mingzdeih Vahcuengh dieg vunz youq. Vih hawj gyoengqvunz lai roxyiuj gyoengqvunz Bouxcuengh Gyanghcouh Gih sengsanj daihlaeng、goekgaen senj dieg, bi 2013 doxdaeuj, Gyanghcouh Gih cingj lauxhangz bae yanghcin、mbanj, doenggvaq hai hoihnaenghdamz、haeuj ranz cam cunz、cazyawj swhliu daengj hingzsik, roxyiuj mingzdeih laizyouz、doegyaem dang- dieg、fungsug sibgvenq beksingq daengj cingzgvang, soucomz、cingjleix mingz- deih caemhcaiq yungh Sawcuengh guh biumingz, youq bi 2017 cingjleix bien ok ceksaw 《Saw Gyoebbien Mingzdeih Vahcuengh Dieg Vunz Youq Lajmbanj Hawsingz Gyanghcouh Gih》. Cek saw neix souloeg le ca mbouj geijlai 1000 aen mingzdeih Vahcuengh dieg vunz youq lajmbanj hawsingz Gyanghcouh Gih, moix aen mingzdeih Vahcuengh cungj geiq gij laizyouz lizsij、gojgaeq、doxgaiq deihleix daengj neiyungz, moix aen mingzdeih Vahcuengh cungj biumingz Vahgun gyoepyaem、gozci yaembiu(doegyaem dangdieg) caeuq Sawcuengh.(Veiz Veigenh)