Haenh lajmbanj caen gyaeundei! Neix dwg gaijgwz hailangh hawj gou gamjsouh ceiq hung.

Geiq ndaej caengz gaijgwz hailangh seiz, mbanj gou gij roen haenx youh iq youh boengz, cungj dwg namhhenj bu youq gwnz roen. Lij miz haex vaiz haex max bu youq gwnz roen, baez daengz doek fwn, gij roen haenx couh lumj ndaw rek cawj souh, youh yungz youh gwg, gij din cungj mbouj rox yamq youq gizlawz bae lo. Seizneix daj gaijgwz hailangh, gaenq bienq baenz lohsuijniz lo, bingzbwdbwd, gvangqlanghlangh lo, song bien loh bangxhenz ndaem miz haujlai vava nywjnywj, haujlai go faex, gij va haj saek gig gyaeundei, doxdax hailangh. Gij nywj heuswdswd, baez doek fwn gvaq, gij nywj couh yienh ndaej engq heu lo. Gij go faex youh soh youh sang, lumj boux sauqbing ndwn youq henz souj. Baez daengz banhaemh, song henz lohdaeng cungj rongh hwnjdaeuj lo, ciuq ndaej aen mbanj ronghsagsag, sim’angq dangqmaz.

Caengz gaijgwz hailangh seiz, lajmbanj mbouj miz saek boux vunz rox diuqfoux, miz saek boux vunz diuqfoux hix mbouj gamj bae diuq, lau dwg bouxgvan bouxyah gangj. Gaijgwz hailangh le, gyoengqvunz ngoenz- naengz bae guhhong, haemh daengz gwn caeuz gvaq le, couh mwngz iu gou, gou iu mwngz bae gvangjcangz diuqfoux lo. Gvangjcangz gij daeng ronghsagsag, lumj banngoenz nei. Gvangjcangz cungqgyang miz aen densi ndeu, lij miz aen DVD, gyoengqvunz couh riengz ndaw densi diuq hwnjdaeuj lo. Mboujlwnh dwg lwgnyez roxnaeuz bouxcoz, mboujlwnh dwg mehmbwk roxnaeuz bouxsai, cungj diuq hwnjdaeuj, bouxboux riuhaha, sim’angq raixcaix.

Lajmbanj raemx sawdikdik, cingh caen dahraix. Mbanj gou miz boux Buzsam, dwg boux dog. De nienzgeij geq lo, hengzdoengh mbouj bienh, hwet youh gungj lo. Ndaw mbanj gij vunz cungj bae bang de sauq ranz、guh saeg. Miz bouxlaux daiqdaeuz, gou gij lwgnyez neix hix bae bang de guh hongranz. Baez daengz seiz gvaq ciet, bouxboux cungj heuh Buzsam bae ranz bonjfaenh gvaq ciet, Buzsam cungj gamjdoengh ndaej gangj mbouj ok vah. Seizneix, gaijgwz hailangh lo, guekgya bang Buzsam hwnj ndaej ranz moq lo, ronghsagsag. Doek fwn haenq seiz, caiq hix mbouj lau ranz doemq roengzdaeuj daenz dai vunz lo.

Caengz gaijgwz hailangh seiz, lajmbanj gou cungj dwg ranz vax, cienz dwg yungh namhhenj cuk baenz. Baez daengz doek fwnraq, gij vax cungj roh fwn, cungj aeu aen doengj aen bat daeuj do raemx. Gaijgwz hailangh lo, gij ranznamh gaenq mbouj raen lo, ranzranz cungj dwg ranzlaeuz, cang ndaej ndeindwtndwt、rongh- sagsag, caiq hix mbouj lau doek fwnraq lo.

Gaijgwz hailangh lo, gyoengq- vunz cungj yiengjsouh daengz gij ndeicawq gaijgwz hailangh. Daegbied dwg lajmbanj gyaeundei raixcaix. Gaijgwz hailangh lo, Cungguek yinz- minz cungj gvaq hwnj gij saedceij vuenyungz lo.

Haenh lajmbanj caen gyaeundei!