Dujva gyaez daengngoenz, duz- roeg gyaez mbwnlamz, duzbya gyaez raemxlaeg, cam gou gyaez gijmaz, gou naeuz gyaez Sawcuengh. Gij saedceij caeuq Sawcuengh byaij gvaq hawj gou nanzlumz.

1981 nienz, Sawcuengh youq hagdangz gou——Gingloz Siujyoz guh sonhag sawqdiemj. 1982 nienz, gou doeg it nienzgaep, faen youq aen ban Sawcuengh. Mwhhaenx, miz haujlai bohmeh cibfaen doiqdig Sawcuengh, mbangj dawz lwgnyez rag haeuj aen ban Sawgun, mbangj sikhaek daiq lwgnyez cienj bae lingh aen hagdangz doegsaw. Seizhaenx, ngoenzngoenz cungj miz vunz daengz ndaw hag nauh, gangj hag Sawcuengh miz maz yungh, couh lienz ok Datgauhfungh cungj nanz, engq mbouj yungh gangj ok Gvangjsih lo. Hoeng, bohmeh gou cix mbouj baenzneix siengj, gyoengqde hawj gou gag dawz cawjeiq. Gou couh menh ngeix, danghnaeuz Sawcuengh mbouj miz yungh, guekgya youh baenzlawz baenzneix caenhrengz doihengz? Gou couh dinghsim hag Sawcuengh, couh yienghneix gou caeuq Sawcuengh yied cug yied gaenj. Sam nienzgaep gou gaenq ndaej gaem 《Bauq Sawcuengh》 doeg bae doeg dauq. Haj nienzgaep, gou rox doeg Sawcuengh youh rox doeg Sawgun, Sawcuengh Sawgun cungj fungsou.

Siujyoz bizyez, gou daengz yienhsingz Minzcuz Cunghyoz doeg- saw, cawz liux caeuq hagdangz wnq hag gij yozgoh doxdoengz, lij ndaej laebdaeb hag Sawcuengh. Cunghyoz bizyez gaujsi, cingzcik okdaeuj lo, gou hix mbouj beij doengzban cij hag Sawgun ca. Seizhaenx, gou engqgya gyaez Sawcuengh, engq roxnyinh liz mbouj ndaej Sawcuengh, laebdaeb daengz Gvangjsih Sawcuengh Hag- dangz hag Sawcuengh.

4 bi sat le, gou dauq daengz Gingloz Siujyoz son saw, daj hainduj yamq hwnj gyangjdaiz guh lauxsae, gou caeuq Sawcuengh cingzngeih engq naekna. Itcig daeuj, gou gaenjgaenj heux gij fuengcim 16 cih fuengcim sonhag Sawcuengh ——“aeu Cuengh guh cawj, Cuengh Gun doxhab, aeu Cuengh coi Gun, Cuengh Gun cungj rox” daeuj hwnjdangz. Hagseng ndaej doeg youh ndaej sij, Sawgun cingzcik youq ndaw cin mbouj dwg daih’it couhdwg daihngeih. 1998 nienz, hagseng Vangz Libingz bien faenz- cieng 《Gueng Gaeq》 camgya gij doxdax daengx gih Sawcuengh faenzcieng ndaej it daengjciengj; doengzbi, hagseng Vangz Ciuhvaz bien faenzcieng Sawgun《Danghnaeuz Gou Dwg Go Faex Ndeu》camgya gij daxdax daengx gih “cozvwnz davangz” hix ndaej it daengjciengj,《Gienhsaeh Nanzlumz》《Mizyinx Singhgiz Roek》daengj faenzcieng youq 《Gvangjsih Minzcuz Bau》 ndaej daengh. 2008 nienz, gou cijdauj hagseng Vangz Yencih camgya gij doxdax daengx gih gangj gojgaeq, 《Gojgaeq Goq Hag Eufwen》 ndaej it daengjciengj.

Bingzseiz, gou hix gyaez doeg di bauqceij, sij di faenzcieng, eueu song hot fwen genjdanh, ngeixngeix baenz- lawz ca ndei Sawgun caeuq Saw- cuengh. Bien lunvwnz《Baenzlawz Leihyungh Sawcuengh Sonyinx Hag- seng Sijvah》ndaej gih lunvwnz ngeih daengjciengj, 《Lwnh Yozcenzban Sawcuengh Sonhag》 ndaej yienh lun- vwnz it daengjciengj. Vihneix, gou hix bingz ndaej haujlai ciengj, Sawcuengh sonhag gaenq buenx gou 16 bi lo.

2010 nienz daengz 2017 nienz, gou daengz lingh aen hagdangz son saw. Gou hix cien fanh baez youq ndawsim cam cihgeij: Biekliz Saw- cuengh hagdangz, Sawcuengh lij caeuq gou mizcingz lwi? Sawcuengh dwg mbouj dwg daj baezneix hwnj couh caeuq gou yied byaij yied gyae? Hoeng, haujlai baez gou youh gag dap cihgeij: Sawcuengh caeuq gou couh lumj mbaw caeuq ganj, rag laeg mbaw mwn, 33 bi doxbuenx youh baenzlawz lumz ndaej?

Doxbiek 7 bi, 2017 nienz 9 nyied, gou youh dauq Gingloz Siujyoz, laebdaeb son Sawcuengh caeuq Saw- gun, seizneix son Sawcuengh caeuq geij bi gaxgonq doxbeij, mbouj rox dwgrengz geijlai boix. Gaxgonq lwg- nyez seng okdaeuj couh rox gangj Vahcuengh, seizneix ngamq doeg youwzyenz couh rox gangj Vahgun sugsegseg, hoeng Vahcuengh mbouj rox gangj geij coenz. Vihneix, Sawcuengh sonhag couh lumj ndaw boengz caij oenciq daemdengjdengj nei.

Hawj gou geiq ndaej ceiqlaeg dwg son hagseng it nienzgaep yinhmeh “aeng”. Vihliux hawj gyoengqde geiq ndaej youh vaiq youh laeg, gou fwngz vix aenndaeng cam:“Neix dwg maz?” Daengx ban hagseng caezcup han naeuz:“鼻子。” Caiq cam hix dwg dap Vahgun “鼻子”. Gou cijndei aeu Sawgun “鼻子” daeuj son Sawcuengh “ndaeng”, gou sien son, daengz siujcuj doeg, caiq lumj hai hojceh nei doxlwnz doeg, youh doxdax doeg. Hoeng, mboujguenj gou yungh maz banhfap daeuj sonhag, hagseng cungj dwg mbwqmbangmbang, Sawcuengh sonhag couh lumj gaeqmeh gvax rongz baenqbanghbangh, hagseng mbwq lauxsae hix dwgrengz. Mboujgvaq, vihliux gij sonhag minzcuz, vihliux swnjcienz gij vwnzva minzcuz, dwgrengz sinhoj suenq maz, mbouj ginggvaq rumzfwn youh baenzlawz ndaej raen duzdoengz, caiq haemz caiq hoj hix aeu riengz hoj baenaj. Ndigah, gou couh dawz ok cien fanh naihsim, son baez ndeu mbouj ndaej, couh son song baez, laebdaeb son, son daengz rox cij dingz.

Ndigah, gaxgonq gou yiengh- haenx gangj, seizneix gou lijdwg yienghhaenx gangj: Cam gou gyaez gijmaz, gou naeuz gyaez Sawcuengh. Sawcuengh caeuq gou couh lumj bya caeuq raemx, cingzngeih naekna, buenx gou ciuhvunz! Gij saedceij caeuq Sawcuengh byaij gvaq hawj gou nanzlumz.