Bi 1978 ndwen 12, dangjcunghyangh hainduj sizhingz cwngcwz gaijgwz hai- langh, daengz bineix gaenq ndaej 40 bi lo. 40 bi neix daeuj, guek raeuz bienqvaq vaiqvwd, caiq mbouj raen gwn mbouj imq, daenj mbouj raeuj lo. Aeu mbanj dou daeuj lwnh, gij bienqvaq de gangj geij hwnz geij ngoenz cungj gangj mbouj liux.

Gou lij iq seiz, ndaw mbanj caengz miz roensuijniz. Haetromh, dou daj ranz byaij bae hagdangz, gwnz roen vunz byaij, duzvaiz byaij, duzmou duzgaeq dauqcawq buet, nyapnyaj dauqcawq vut, youh foenq youh uq. Baez daengz fwn doek, diuz roen naeznodnod, hoj byaij raixcaix. Aen gyausiz lij dwg ranzvax, seiz mbouj seiz lij roh fwn. Gyoengq hagseng sam seiq boux naengh aen daiz ndeu, doengzcaez yawj bonj saw ndeu. Seizhaenx vunz ndaw mbanj cienzbouh guh hongnaz, bouxboux cungj nyaengq, souhaeuj cix noix, ngamqngamq gaeuq gwndaenj.

Hoeng, seizneix danghnaeuz mwngz daeuj mbanjranz gou youz, couh raen bienqvaq daiq lai lo. Roensuijniz guh dwk mbanjmbanj doeng liux, lij miz boux- dajsauq ngoenzngoenz baujhoh, gwnz roen seuqsatsat. Gaijgwz hailangh le, guek raeuz gunghcangj lai lo, vunz ndaw mbanj mizmbangj bae dajgoeng, hag ndaej gisuz ma le, caiq gag guh di seng’eiq. Gohyoz gisuz yied daeuj yied maenh, gyoengq- vunz dajndaem hix yied daeuj yied fungsou. Geij bi neix, haujlai vunz ndaem mak ndaem faex fatcaiz lo, bouxboux cungj hwnq ranzlaeuz, cang ndaej gyaeundei raixcaix! Lwgnyez hix mbouj caiq aenvih mbouj miz cienz mbouj ndaej doegsaw lo, bouxboux cungj naengh youq ndaw gyausiz hausaksak ronghsagsag, lij miz dohmizdij gyauyoz ne! Deng lo, danghnaeuz mwngz daeuj mbanjranz gou, mbouj lau mbouj miz giz youq, giz dou hai haujlai nungzgyahloz, ndaej bae yawj gij gingj gyaeundei lajmbanj, ep bya、gaeb bit、gaeb gaeq, ndaej cimz dwzcanj Bouxcuengh, hawj mwngz daeuj le mbouj siengj ma!

Mbanjranz gou bienqvaq daih, mbouj ndaej liz dangj raeuz dazyinx fueng- yiengq deng. Daegbied dwg gaijgwz hailangh le, raeuz engq yienh da raen ndeicawq lo. Gyoengq vunzlaux ciengz- seiz naemh lwglan naeuz:“Gietsim gaen dangj byaij, gaenx guh gaenx hag, mbouj loek!”

Mbanjranz gou caen ndei! Angqcoux mwngz ciengzseiz daeuj guhhek!