Gvangjsih Namzningz Si Vuj- mingz Gih miz goengq bya mizmingz ndeu heuhguh Byacwx.

Byacwx liz Namzningz miz 90 lai goengleix, bya raez miz saek 60 goengleix, gvangq miz saek 25 goeng- leix, lah daengz Sanglinz、Majsanh、Binhyangz caeuq Vujmingz 4 aen yienh gih.

Byacwx goengq byasoem ceiq sang heuhguh Byalungzdaeuz, sang miz 1760 mij, hix dwg Gveicunghnanz goengq bya ceiq sang. Gij va caeuq raemxgienghdat Byacwx gig okmingz.

Bi 2012 ndwencieng co’ngux dou bae youz Byacwx, seizde nit di, hix doek di fwn, daengx goengq bya heux rim mojlox. Miz roensuijniz daj laj bya hwnjbae daengz gwnz dingj, diuz roen van bae van dauq, miz- mbangj gvangq mizmbangj gaeb. Laj bya liz gwnz dingj gig gyaez, byaij 3 aen cungdaeuz cungj caengz daengz dingj, haici hwnjbae hix gig sinhoj.

Dou ngoenzde mbouj miz geij lai vunz bae youz, aiq dwg aenvih dienheiq mbouj ndei, seiqhenz cungj dwg mojlox, dou naengh youq ndaw ci, yawj mbouj raen maz gingjsaek. Gyang roen nanz mbouj nanz raen miz ci doxroengz, gyoengqde aiq dwg haemhgonq youq gwnz dingj bya gvaq hwnz, seizneix ngamq roengz bya.

Gyang roen mizmbangj dieg ndei youz, dou couh dingz roengzdaeuj yawjyawj. Rumz gig hung, boq ndaej mbawfaex yiengjsasa, dou laihnaeuz dwg raemxgienghdat dem.

Gwnz bya miz haujlai faex dijbauj raixcaix, mizmbangj gaenq laux, mizmbangj lij oiq, moix go faex gwnzde cungj hoij miz gaiq baiz ndeu, gwnz baiz sij miz gij coh gofaex caeuq miz maz yungh.

Gwnz dingj miz diegyouq, hawj vunz youz baeg ndaej yietnaiq, caen fuengbienh. Dingjbya miz vunz cawj haeux gai, gij byaek dingzlai cungj dwg byaekcwx, gwn hwnjdaeuj gig diemz, gij byaek neix youq ndaw singz nanz gwn ndaej ne. Lij miz geij aen dan gai doxgaiq gwn, lumjbaenz noh saz、lwgmaenz、soemj、faengx iq caeuq lwgbiek daengjdaengj. Youq gwnz dingj, cungj mbouj yungh you dungxiek mbouj miz huq gwn.

Gwnz dingjbya miz roen doeng daengz gak aen dieg lengj youz. Dou yaek bae yawj raemxgienghdat. Raemxgienghdat liz dingjbya gig gyae, gij roen dwg yungh rinbenj caep baenz, mizmbangj guh baenz mbaek- lae, mizmbangj cix gig lingqlangq, vunz daeuj youz hwnjhwnj roengz- roengz, yienznaeuz henz miz lanzgan, hoeng, youq gwnz yawj coh laj hix roxnyinh gig dwglau, itseiz ga fouz gyaeuj ngunh.

Bae yawj raemxgienghdat gyang roen hix miz haujlai gingjsaek gyaeundei. Gwnz bya faex gig lai, gij faex gaenq maj ndaej haujlai bi lo. Miz go faexge ndeu gaenq miz 200 lai bi lo, ndwn youq dingjbya, nyefaex raemhrwdrwd, yawj hwnjbae lumj aen liengj hung nei, youh lumj boux laux ndeu ndwn youq gizde.

Gwnz dingjbya miz va gig lai, dingzlai dwg va’ndokgengj. Bi daengz ndwen 4 ndwen 5, gij va gwnz bya couh doxciengj doxceng hai, gig ndeiyawj, dingqnaeuz moix bi cungj youq Byacwx banh aen ciet va- ndokgengj, gij vunz daeuj yawj caenxndaet lumj moed nei.

Vunz naeuz gwnz Byacwx miz 108 giz raemxgienghdat, ndawde ceiq hung dwg Raemxgienghdat Rieng- lungz, roengzdaeuj dwg Raemx- gienghdat Gvigim. Raemxgienghdat Gvigim liz gwnznamh miz 60 lai mij, gyang raemxmboq miz gaiq rin hung ndeu, yawj hwnjdaeuj lumj duzgvi nei, mboujlwnh youq henz raengz baih- lawz, cungj ndaej yawjraen gyaeuj “duzgvi” vix coh diuz roen wnq okbae, geizheih dangqmaz. Dou foenxfoenx youq gizneix ingj siengq guh geiqniemh.

Byacwx aenvih deihseiq labcab, dienheiq daegbied, doenghgo geq mbouj liux gangj mbouj caenh, bya miz goengq sang goengq daemq, doxca gig hung, ndigah seiq geiq gingjsaek mbouj doxdoengz, “seizcin va, seizhah raemxgienghdat, seizcou fwj, seiz- doeng nae” coenz vah neix couhdwg gangj gij gingjsaek Byacwx.