Daj haiguh hong vut gungz gunggeng doxdaeuj, Fungsanh Yen dawz canjnieb banggungz dangguh fwngzgaem, gonqlaeng cingjhab ngaenzcienz 2 ik maenz, bangfuz hwngfat daegsaek canjnieb, guh- baenz faexsamoeg、youzcaz、batgak、hwzdauz、ywdoj caeuq laj gofaex dajciengx、gosangh nonsei daengj daegsaek canjnieb gwzgiz, cuknet le gij giekdaej vut gungz gunggeng.

Aen yienh neix gonqlaeng yinxhaeuj Luegvanhsou、Yindaz Guh Yw、Hangz Mak Bozlungz daengj giyez, youz giyez doengjit gung gomiuz、gung liuh、gung dinfwngz, baugyaq soudauq、gyagoeng、siugai, doicaenh sam cungj canjnieb yungzhab hwngfat. Doengzseiz, yawjnaek dajcauh binjbaiz, “gaeq Luegvanhsou” doenggvaq swnghdai dieg ok nduj baujhoh doxgaiq nyinhdingh, ndaej senj haeuj 2017 Guengjsae dwzcanj gai daengx guek haedsim binjbaiz mingzloeg;“haeuxcid Fungsanh”“haeuxsuen Fungsanh” ndaej gij doxgaiq baujhoh geiqhauh deihleix guekgya.

Seizneix, daengx yienh ndaem faexsamoeg 43 fanh moux、youzcaz 30 fanh moux、batgak 22 fanh moux、hwzdauz 33 fanh moux、ywdoj 2 fanh moux、gosangh 3.3 fanh moux, laj gofaex dajciengx gaeq hwzdauz 700 fanh duz、moudoj 2 fanh duz、yiengzbya 2.8 fanh duz、cwz 1 fanh duz, bi canjciz mauhgvaq 10 ik maenz.

(Yangz Siufu)