Ndwen 9 ngoenz 1 banhaemh, gaiq daihcib Guengjsae heiq comz- yienj daihhingz heiqmoeg Heiq- cuengh 《Baksaek Gijyi》 youq Namz- ningz Heiqciengz yienjok ndeiyawj. Heiqmoeg cingj it gaep bienheiq Lij Baujginz guh heiqmoeg bienheiq、guekgya it gaep daujyenj Gungh Yaujdungh caeuq Guengjsae Heiq- yienh yencangj Lungz Cen lienzhab guh daujyenj, youz bouxyienj maenhndei Guengjsae Heiqyienh cawjyienj.

Heiqcuengh 《Baksaek Gijyi》 yungh Baksaek Gijyi bi 1929 fatseng youq Guengjsae haenx guh sucaiz cauhguh baenz, dajcauh le gij yienghsiengq Dwng Siujbingz, Lij Mingzsui, Veiz Bazginz daengj haujlai bouxcijveih hoenx ciengq Baksaek Gijyi, hix dajcauh le gij yienghsiengq Veiz daxbuz daengj beksingq Guengjsae caeuq yah Dwng Siujbingz Cangh Sizyenz, yah Lij Mingzsui Loz Cauhyiz daengj vunz, bouh heiq neix gig miz gij sim gingq senhlez Baksaek Gijyi, danqhaenh gwzming senhlez vut mingh mbouj lau dai gouq guek gouq beksingq, danqhaenh beksingq Mbanjcuengh vih Cungguek gwzming guh ok gungyen hungloet, dauqyawj lizsij, dauqngeix seizneix, hemqheuh vunz daihneix dauqlaeb ngeixnaemj caeuq sinyangj.

Bouh heiq neix youq gwnz yisuz yungh le soujfap moq mbouj doengz heiq conzdungj, gij seiqgyaiq hoenz haujlai senhlez gapbaenz haenx caeuq seiqgyaiq yienhsaed gapbaenz song aen daizheiq seizgan caeuq hoenggan mbehai lwnhgangj, gyaep- gouz sijsihsing caeuq higising giethab, yienh moq caeuq biujyienh giethab, raiz caen caeuq raiz eiq giethab, gig miz swhsiengjsing、yisuzsing caeuq cangsinhsing, doiq saekhoengz daezcaiz cauhguh dwg baez damqra moq he, hix dwg baez cungbyoengq hungnaek he.

(Liz Yaujyij)