Vah bouxbien: Ndwen 8 ngoenz 13, gij cingzcik bi 2018 Sawcuengh Vahcuengh suijbingz gaujsi okdaeuj lo. Ciuq Swcigih Minzyijveij naeuz, gaujsi faen cogaep、cunggaep、gaugaep 3 aen daengjgaep, cogaep miz 57.5% vunz gizgwz, cunggaep miz 40.9% vunz gizgwz, gaugaep miz 19.5% vunz gizgwz, ndawde miz haujlai vunz gauj ndaej faen sang, caemh miz haujlai bien cozvwnz sij ndaej maenhndei. Seizneix dou dawz gij faenzcieng youq gaujsi cunggaep sij ndaej ndei caemhcaiq ndaej faen sang daengh okdaeuj, hawj caezgya caemh ngonz.

Miz vahsug gangjnaeuz: Va nding baengh daengngoenz, vuenyungz baengh miz dangj. Gou lij doegsaw couh dingqnyi gij vahsug neix lo.

Mbouj miz gungcanjdangj couh mbouj miz Cungguek moq. Mbouj miz gaijgwz hailangh, couh mbouj miz vuenyungz swnghhoz ngoenzneix.

Ndaw mbanj gaxgonq lij caengz ndaej doeng ci, daeh doxgaiq okbae gig mbouj fuengbienh. Vunz ndaw mbanj cungj gangj: Gik mbouj dai hix hoj, doj mbouj dai hix ndoq. Ndigah bouxboux gaenx guhhong, hoeng, couhsuenq baenzneix, gaenx guh bi daengz byai, haeux hix mbouj gaeuq gwn.

1978 nienz, Cunghgoz Gungcanjdangj daezok youq guek raeuz sizhingz gaijgwz hailangh, daj seizhaenx hwnj, gij yiengh singz mbanj guek raeuz bienqvaq hungloet. Haw singz gyaeu lo, lajmbanj bienq seuq lo. Lwgminz cungqvunz cungj caencaen yiengjsouh daengz gij ndeicawq gaijgwz hailangh.

Daj guh mbanjmbanj doeng goengloh le, gaxgonq roennamh gumzgumz gemxgemx gaenq bienqbaenz roensuijniz bingzbwdbwd. Seizneix, boux ndaw mbanj bae haw gig fuengbienh.

Gaijgwz hailangh le, gij cizlieng yinzminz swnghhoz ndaej daezsang lo, ranzranz miz ranzlaeuz, youh miz haujlai gyahgi, miz binhsiengh、densigih、gunghdiuz daengj gyahden, lij miz haujlai saejdaeuz gwn.

Gyauyuz fuengmienh, guek raeuz sizhingz gouj bi yivu gyauyuz, ranz lawz miz lwgnyez cungj aeu bae hagdangz doegsaw hagsib, cijmiz nyinhcaen hagsib, cij ndaej baenzcaiz. Cihsiz dwg doengh- yiengh ceiq ndei ndeu. Mbouj miz cihsiz vwnzva couh nanz gaemguenj gisuz bae gaijgwz guek raeuz.

Seizneix, nungzminz gvaq ndaej gig ndei, guh reihnaz haujlai cungj aeu gihgi daeuj guh, yienghneix, nungzminz couh mbouj yungh baenzlai sinhoj lo. Doengh naz naj mbanj baengzyoux gou caen gvangqlangh, yawj mbouj raen hamq. Baihlaeng ranz de miz song go makmaenj、sam go makdauz, bibi cungj fungsou.

Youq gwnz haw, miz haujlai doxgaiq daj rogguek daeh haeujma, raeuz mbouj yungh bae rogguek couh ndaej cawx gij doxgaiq rogguek lo.

Gaijgwz hailangh ndeicawq miz haujlai, yinzminz guek raeuz swnghhoz yied daeuj yied ndei. Vuenyungz baengh miz dangj, docih Cunghgoz Gungcanjdangj!