Veiz Yenbingz dayoz bizyez le youq ndawsingz ra ndaej faenh hong ndeu, bouxgvan de hix youq ngaenzhangz yingzyezsoj guhhong, song gvanbaz souhaeuj mbouj siuj, Veiz Yenbingz couh siengj dawz daxboh Veiz Yiz daj ndawmbanj ciep okdaeuj caeuq songde caemh youq. Hoeng, daxboh de baenzlawz cungj mbouj nyienh, doiq neix, Veiz Yenbingz gig nyapnyuk. Daxboh de boux ndeu gag youq ranz, ndang youh ciengz miz bingh, gwndaenj cibfaen mbouj fuengbienh, danghnaeuz miz maz saeh liuh mbouj daengz, mbouj miz vunz ciuqgoq, baenzlawz banh ne?

Mbouj geij nanz, gij saeh hawj Veiz Yenbingz yousim caen fatseng lo. Ngoenzhaenx, Veiz Yenbingz sawq- mwh ciep daengz ranznden dwk daeuj aen dienhvah ndeu, naeuz daxboh ndaej binghgip, caeklaiq fatyienh gibseiz, cijndaej ciengjgouq duetnanh. Veiz Yenbingz gipmuengz ganj daengz yihyen seiz, raemxda couh doek- byoegbyoeg. Veiz Yenbingz daj iq daxmeh couh gvaqseiq, daxboh boux ndeu sinsin hojhoj dawz de ciengx daengz hung. Seizneix, yawjraen daxboh baenzbingh nyieg baenz yienghneix, baenzlawz mbouj hawj de siengsim raemxda doek ne?

Veiz Yenbingz naemj, daxboh ginggvaq baez bingh neix le, itdingh dapwngq caeuq de bae ndawsingz caemh youq. Hoeng, daxboh baenz- lawz hix mbouj dapwngq bae caeuq de caemh youq, youh doiq Veiz Yenbingz naeuz:“Gou rox gij hauqsim mwngz lo, danghnaeuz mwngz caen dwg doiq daxboh ndei, couh moix ndwen geiq lai di ngaenz ma hawj gou.” Raen daxboh baenzneix gangj, Veiz Yenbingz doeksaet dwk naeuz:“Boh, gou moix ndwen mbouj dwg geiq hawj mwngz 500 maenz la, lij caengz gaeuq ya?” Dingq ndaej gij vah neix, Veiz Yiz fatheiq lo, sing hung naeuz:“Boh mwngz yungh di ngaenz lij aeu coh mwngz veibau caez ya?” Veiz Yen- bingz raen daxboh de fatheiq lo, couh gip gejnaeuz:“Couh yienghneix ba, moix ndwen hawj mwngz geiq 800 maenz.”

Veiz Yenbingz siengj mbouj daengz, daxboh mboujdanh mbouj riengz de bae ndawsingz caemh youq, lij aeu de lai hawj di ngaenz, de roxnyinh geizheih, daxboh de baenz- lawz ne? Dwg mbouj dwg miz maz saeh raen mbouj ndaej vunz?

Aenvih hong nyaengq, youh mbouj youq henz ndang daxboh, Veiz Yenbingz mbouj ndaejhonegq siengj gij saeh neix, seizgan couh baez gvaq daengz nienzdaej lo. Dienheiq cugciemh bienq nit lo, Veiz Yenbingz couh hawj daxboh cawx di buhvaq seizdoeng, vanzlij cienmonz yungh 500 maenz ngaenz hawj daxboh de cawx gouh haiz mingzbaiz naeng caen ndeu, doenghyiengh neix geiq daengz lajmbanj hawj daxboh de gvaqdoeng.

Daengz haemhndaep, Veiz Yen- bingz ma daengz ranz caeuq daxboh gvaq ciet, yawjraen daxboh vanzlij daenj gij buhvaq gaeuq doenghbaez haenx, roxnyinh gig doeksaet, cam naeuz:“Boh, baezgonq hawj mwngz cawx buhvaq moq haiz moq, baenzlawz mbouj raen mwngz daenj ne?” Veiz Yenbingz doq gangj doq haeuj ndaw rug daxboh bae ra gij buhvaq moq haiz moq, bouxlawz rox, fan bae fan dauq caenh raen miz geij geu buhvaq gaeuq ndwi. Veiz Yenbingz youh cam daxboh:“Boh, baezgonq cawx hawj mwngz gij buhvaq moq haiz moq gvaq gizlawz bae lo?” Daxboh de caem yaep ndeu cij dap naeuz:“Aeu……Aeu bae gai lo!” Veiz Yenbingz dingqnyi le, gikheiq ndaej ca mbouj geijlai couh yaek ngunh gvaqbae.

Daxboh boux ndeu youq laj- mbanj, moix ndwen yungh 800 maenz ngaenz mbouj gaeuq, hawj Veiz Yenbingz ndaw uk naemj ok aen siengjfap ndeu, dwg mbouj dwg daxboh youq diegrog ciengx miz saek boux mbwkyoux ne? Daxmeh gvaqseiq ndaej caeux, daxboh boux vunz ndeu youq ranz…… Yienghneix baez siengj, Veiz Yenbingz couh rox gij saeh neix dwg caencaen cingqcingq miz lo.

Ndwenlab haemhndaep ngoenz gaxgonq, Veiz Yenbingz caeuq doengzdoih bae yienzsingz cawx huq gvaq nienz. Veiz Yenbingz dangseiz simcingz gig ndei, de byaij youq gwnz gai, raen boux hauxseng ndeu baij dan gai gij dangzrwi duzrwi gag ciengx canj, Veiz Yenbingz baez ngonz boux hauxseng neix couh doeksaet lo, yawjraen gij da naj de lumj daxboh nei, doengzseiz youh raen de daenj gouh haiz gij yienghceij lumj baezgonq de cawx hawj daxboh.

Veiz Yenbingz goq mbouj ndaej baenzlai, de couh haibak cam:“Daihgo ya, gouh haiz naeng caen mwngz caen ndei yawj, youq gizlawz cawx ne?” Byawz rox, boux hauxseng neix yawj miz boux vunz ndeu gwq yawj de, seizneix lij cam gij coenz vah neix, engqgya simvueng, ganjgip byaij lo.

Youq gwnz roen maranz, Veiz Yenbingz itcig cungj naemj, boux hauxseng haenx caeuq daxboh baenz- neix doxlumj, dwg mbouj dwg lwgndai daxboh ne? Gouh haiz naeng caen haenx gangj mbouj dingh couhdwg daxboh soengq hawj de ne! Daxboh moix ndwen lij cungj heuh de geiq baenzlai ngaenz, dwg mbouj dwg hix dawz daeuj hawj daeg hauxseng neix ne? Veiz Yenbingz yied siengj, couh yied sim nyapnyuk, daengz ranz le, mbouj caeuq daxboh de gangj saek coenz vah couh hwnj congz bae ninz.

Couh yienghneix, bohlwg youq caemrwd ndawde gvaq le haemh- ndaep. Nienz co’ngeih, Veiz Yenbingz yaek dauq ndawsingz, Veiz Yiz hix mbouj naeuz maz, de itcig ndwn youq bakdou da yawj dahlwg okdou byaij gyae.

Veiz Yenbingz byaij ndaej yaep ndeu, Veiz Yiz couh ganj haeuj rug bae cagaenj suek gij huq Veiz Yenbingz cawx ma, yaek soengq bae hawj vunz. Hoeng, mbouj liuh daengz, Veiz Yiz baez okdou mbouj geij nanz, couh miz vunz riengz laeng de.

（caengz sat）