Ngoenz singhgiz roek, gou caeuq geij boux baengzyoux byaij loh bae aen mbanj moq ndeu lauh.

Byaij daengz bak mbanj, goreiz hungmbwk ndwn youq bak mbanj gig yienjda, nga laj hung lumj aendoengj, nye gwnz baenz lumj gengoenh, goekdoenj gwnz namh lumj aen buenzswiq faex nei hung. Gij mbaw mwncupcup, daj gyae yawj bae couh lumj aen liengj heu youh nduen youh hung gang youq bak mbanj vih vunzlai raemh ndit dangj fwn. Song da yawj haeuj mbanj bae, yawjraen ranzranz cungj dwg ranzlaeuz iq miz song sam caengz nei, faq ciengz baihrog cungj bae ndaej hausaksak, hawj vunz sim sangj hoz feih. Gij ranz baizlied ndaej cingjcingj caezcaez, loh suijniz bingzbwdbwd raih gvaq ranz, aen mbanj rangh ndaej doengngaungau.

Aen daizheiq youq cauhcangz gvangqlangh youh gyaeundei. Cauh- cangz faen baenz sam aen lanzgiuz- cangz, seiqhenz miz geij aen daiz binghbanghgiuz youq laj gofaex heuloeg, hawj gyoengqvunz ndaej- hoengq seiz yamq ok dou couh ndaej lienhndang. Byaij gvaq diuz loh iq ndaw hongh, seiz mbouj seiz yawjraen doengh boux mehmbwk yahlaux sam boux guhdoih haj boux baenzbang, miz boux doq gangjgoj doq dinq byaek, miz boux lau ngamq guhhong dauqranz daengz byongh roen, gaem gvak gonz doengj ndwn dwk hix aeu gangj song sam coenz.

Mbwn rengx naz hawq, ndaw naz gij haeuxhenj gaenq gvej maranz dak youq gwnz deihdangz, ndigah benq naz henz mbanj cij raen gij fiengz baenz boengj baenz boengj daengj youq ndaw naz, lumjbaenz gyoengq bya iq soemsetset nei. Henz boengj fiengz mbouj gyae miz geij duz vaiz youq henz din naz bupdat bupdat gaet rum ngenj doenj fiengz diemz- soebsoeb. Yawj gij yiengh gwn gyoengq vaiz fouz you fouz mbaengq caemhcaiq cwxcaih gag angq, hawj vunz ndawsim roxnyinh lajmbanj caemdingh dahraix.

Gyoengqdou ei din mbanj byaij bae naj, henz loh raen miz gij va saek henj saek lamz hai ndaej hoengh- hwdhwd, miz vacaz vagut, lij miz gij va heuh mbouj ok mingzcoh. Gou ndawsim ngeixvaeg naemj: Haeuj cou lo, seizdoeng yaep da couh yaek daengz lo, gyoengq va henz loh baenzlawz mbouj rox aen seizciet yaek bienq, caemh youq neix haenq langh ne? Yawj dwk gij va henz din baenz nyumq baenz nyumq, caen lumj faj naj lwgnyez dwggyaez dwk cingq coh dou riuhehe! Byawz naeuz seizcou cij miz rumz nit mbawfaex doek, seizneix yawj daeuj caen dwg ndit cou raeuj beij cin ne, mboujnex baenzlawz fanh va ceng hai.

Gou yienzbonj laihnaeuz, boux- vunz dwg gwnz mbwn baij daeuj gwnzbiengz aen gingj ceiq gyaeu, caezgya doxraen roxnaj, doxyouq doxcaemz, angqangq yangzyangz doh seiqvunz. Hoeng ngoenzneix bungz raen gyoengq va henz loh, gyoengqde bingzciengz ndaej mbouj yienhda, neix baenzlawz youh mbouj dwg aen gingjsaek gyaeundei ne? Gyoengqde daeuj gizneix, aiq dwg vih le bouxvunz lawz, caeuq bouxde doxiu ndei ciuh- neix daeuj doxraen doxlienh. Lumj- naeuz gyoengq dou caengz daeuj gizneix gvaq, cijdwg baez he it seiz sim hoengq vunz mbwq, doeng byaij sae byaij yamq daengz gizneix, cij bungz raen gij va neix. Gou sieng- saenq, moix baez doxbungz, couhdwg cungj yienzfaenh, wnggai insik moix baez doxbungz, aenvih byawz hix gangj mbouj dingh baez daihngeih caiq raennaj youh dwg mwhlawz, mizseiz raen gvaq baezneix ciuhneix aiq couh mbouj miz gihvei caiq raen lo.

Byaij daengz gyaeuj mbanj, raen mbouj miz maz ndei lauh, dou couh cienqndang byaij doxdauq. Youh ginggvaq goreiz bak mbanj, dou mbouj aeu iu cungj doengzcaez dawz ok soujgih, ingjsiengq hwnjdaeuj. Mbouj- danh ingj gij gingj gyaeundei lumj diegsien lajmbanj, lij ingj siengq vunz dem.

“Gaca, gaca”, dou gag boux ingj le youh guhdoih ingj, sing riu sing ingjsiengq hawj laj goreiz nauhyied dangqmaz.