Cib Seiq

Aen singgiuz daihhaj geizheiq dangqmaz, doenghgij singgiuz ndawde, aen neix dwg aen ceiq iq. Gizneix dieg coq ndaej aen daengroen ndeu caeuq boux diemjdaeng ndeu youq ndwi. Lwgvuengziq guhlawz cungj naemj mbouj rox, aen singgiuz gyangmbwn neix, mbouj miz ranz youh mbouj miz vunz youq, aeu daengroen caeuq bouxdiemjdaeng miz gijmaz yungh.

De gag ngeix naeuz:“Boux diemjdaeng neix mbangj dwg geizheiq, yaekriu lai. Hoeng de ndei gvaq boux guekvuengz de bw, ndei gvaq boux luemjrog de bw, ndei gvaq boux cauxhuq de caeuq boux laeujgeq de bw, aenvih hong boux diemjdaeng neix lij miz di yungh, mbouj lumj hong gyoengqde mbouj miz saek di yungh. De baez diemjdawz daengroen, cix lumjnaeuz lai miz aen ndaundeiq ndeu roxnaeuz lai duj va ndeu, mizyinx raixcaix. De baez ndaep aendaeng, cix lumjnaeuz ndaundeiq roxnaeuz dujva ninz ndaek lo. Hong neix ndei dahraix bw, miz yungh dahraix bw.”

Lwgvuengziq baez daeuj daengz aen singgiuz neix, de cix aeueiq dwk dongx boux diemjdaeng:

“Gyanghaet ndei!—— Haxbaenh mwngz vihmaz ndaep daeng bae ne?”

“Gyanghaet ndei! ——Neix dwg mingling!” Boux diemjdaeng neix han naeuz.

“Gijmaz mingling ne?”

“Couhdwg ndaep daengroen bae! ——Gyanghaemh ndei!”

Boux diemjdaeng neix gangj sat coenz neix youh diemjdawz daengroen.

“Yienghneix mwngz vihmaz youh diemjdawz aendaeng baezmoq ne?”

“Neix dwg mingling!” Boux diemjdaeng han naeuz.

“Gou mbouj rox.”Lwgvuengziq naeuz.

“Mbouj miz maz aeu rox, ming- ling couhdwg mingling lo.”Boux diemj- daeng neix han naeuz, “Gyanghaet ndei!”

Gangj liux youh ndaep daeng bae lo.

De aeu mbaw reznaj nding ndeu okdaeuj uetuet najbyak.

“Hong gou dwglau lai. Gaxgonq mbouj dwglau geijlai, gou gyanghaet cix ndaep daeng, gyanghaemh cix diemj daeng, gyangngoenz ndaej- vangq gou cix yietnaiq, gyanghaemh ndaejvangq gou cix ninz.”

“Nyaenx doeklaeng mingling bienq bae, dwg lwi?”

Boux diemjdaeng neix naeuz: “Mingling mbouj bienq nauq, ngoenz doek ngoenz, bi doek bi, gyanghaet gou cix ndaep daeng, daengz gyanghaemh gou cix diemj daeng. Hoeng aen singgiuz neix yied baenq yied vaiq, danhseih mingling mbouj bienq, yienghneix cingq dwgrengz lai lo!”

“Doeklaeng baenzyiengh lawz ne?” Lwgvuengziq cam naeuz.

“Doeklaeng aen singgiuz neix faencung cix baenq hop ndeu, gou mbouj ndaej yietnaiq saek miuxcung. Faencung ndeu gou cix diemj daeng baez ndeu, ndaep daeng baez ndeu.”

“Mizyinx lai bw! Gizneix ngoenz ndeu cijmiz faencung ndeu ndwi.”

“Mbouj yinx saek di nauq!”Boux diemjdaeng neix han naeuz, “Song- raeuz gangjgoj gaenq ndaej ndwen ndeu lo!”

“Ndwen ndeu?”

“Wgo! Samcib faencung couh- dwg samcib ngoenz lobw! Gyang- haemh ndei!”

De youh diemj daeng baezmoq.

（18）