Dwg bae ranz duzma iq ra de guhcaemz ne? Roxnaeuz bae caeuq duznoucoengz iq doxcaez bae mbaet makcwx ne? Roxnaeuz caeuq duzmeuzraiz iq doxcaez bae henz dah ep bya ne? Doenghgij neix cungj mbouj gvaqyinx, gou lij dwg bae cuengq yiuhrumz ba.

Duzmui iq dawz duz yiuhrumz dwg- gyaez ndeu, ciengq gij go angqyangz, okdou lo. Duzmui iq daeujdaengz giz diegnywj gvangqlangh ndeu, sim siengj: Giz dieg neix caen ndei, couh youq gizneix cuengq lo. Duzmui iq yamqdin buet yaep ndeu, yiuhrumz gig vaiq couh mbin hwnj gyangmbwn bae lo, duzmui iq sim siengj: Gou lij hawj de mbin engq sang dem ndaej bw! Yienghneix duzmui iq laebdaeb buet hwnjdaeuj, buet ha buet ha, duzmui iq roxnyinh baihlaeng miz gijmaz rengz itcig beng duzyiuhrumz, duzmui iq ngeux gyaeuj baez yawj, naeuz:“Dai lo, duzyiuhrumz deng gaz youq gwnz gofaex lo.”

Couh youq seiz duzmui iq gip dwk itcig daemh din, duzma iq daeuj lo, duzmui iq baez raen duzma iq daeuj lo, sim’angq raixcaix, sim siengj boux bang daeuj lo, couh naeuz:“Duzma, duzma, mwngz bang gou aeu duzyiuhrumz roengzdaeuj ndaej lwi?” Duzma iq naeuz:“Gou daemq gvaq mwngz, gou hix mbouj rox benz faex, guhlawz bang ha!” Duzma iq gyaeuj hix mbouj ngeux couh byaijdeuz lo.

Gvaq yaep he le, duznoucoengz iq daeuj lo, duzmui iq doiq duznoucoengz iq naeuz: “Noucoengz, mwngz rox benz faex, mwngz bang gou aeu duzyiuhrumz roengzdaeuj ndaej lwi?” Duznoucoengz iq naeuz: “Duz- mui, doiq mbouj gvaq lo, gou aeu bae mbaet makcwx, mboujnex seizdoeng gou couh mbouj miz haeux gwn lo.” Gangj liux, duznoucoengz iq couh diuqyegyeg byaijdeuz lo. Bungzdaengz gij cingzgvang baenzneix, duzmui iq siengsim lai, daej lo.

Couh youq seizneix, duz loeghozraez daeuj lo, gvansim dwk cam:“Muiiq, mwngz baenzlawz la?” Duzmui iq naeuz: “Duz yiuhrumz gou gaz youq gwnz gofaex lo.”“Gou bang mwngz aeu roengzdaeuj ba!” Loeg- hozraez iet hoz baez duengq, duzyiuhrumz couh mbin roengzdaeuj lo. Baezneix, duzmui iq sim’angq dwk riu lo, dauqdaej miz vunz bang de lo.

Duzmui iq daj gienh saeh neix rox daengz aen dauhleix ndeu: Gij baengzyoux youq seiz ceiq yungyiemj bang bonjfaenh haenx, cij dwg baengzyoux caencingq.

(Sam nienzgaep Yangz Sinhyenz raiz Dahdingz hoiz)