Bonjbauq siusik(gicej Cau Dwzfeih Vangz Hauyinz) Ndwen 7 ngoenz 31 banhaet, Gvangjsih Boux- cuengh Swcigih Saujsu Minzcuz Yijvwnz Gunghcoz Veijyenzvei youq Namzningz hai aenhoih fatbouh saehmoq 《Diuzlaeh Hong Vahsaw Minzcuz Vunznoix Gvangjsih Boux- cuengh Swcigih》(baihlaj genjdanh heuh 《Diuzlaeh》). Swcigih Yinzda Cangzveijvei Fazci Gunghcoz Veij- yenzvei fucujyin Gu Cunghdungh, Swcigih Yinzda Cangzveijvei Minz- cuz Gunghcoz Veijyenzvei fucujyin Vuz Mubungz, Swcigih Minzcuz Cunghgyau Swvu Veijyenzvei cujyin、Swcigih Saujsu Minzcuz Yijvwnz Gunghcoz Veijyenzvei cujyin Hoz Cauzgen, Swcigih Saujsu Minzcuz Yijvwnz Gunghcoz Veijyenzvei fucujyin Yi Siz、fusinzsiyenz Yiz Feih camgya aenhoih fatbouh caemhcaiq gangjvah roxnaeuz dap gij vwndiz gicej. Swcigih Saujsu Minzcuz Yijvwnz Gunghcoz Veijyenzvei fucujyin Veih Yungjhungz cujciz aenhoih fatbouh.

Aenhoih fatbouh doeg le gij goenggauq Gvangjsih Bouxcuengh Swcigih Yinzda Cangzveijvei, 《Diuzlaeh》 gaenq youq bi 2018 ndwen 5 ngoenz 31 youz Gvangjsih Bouxcuengh Swcigih Daihcibsam Gaiq Yinzminz Daibyauj Davei Cangzvu Veijyenzvei Aenhoih Baez Daihsam doenggvaq, seizneix goeng- bouh okdaeuj, daj bi 2018 ndwen 8 ngoenz 1 hainduj hengzguh. Riengz dwk, Swcigih Yinzda Cangzveijvei Fazci Gunghcoz Veijyenzvei、Minzcuz Gunghcoz Veijyenzvei caeuq Swcigih Saujsu Minzcuz Yijvwnz Gunghcoz Veijyenzvei daengj gvendaengz bouxfucwz faenbied gaisau le gij laebfap beigingj、ginggvaq caeuq cujyau neiyungz 《Diuzlaeh》， caemh- caiq daezok hagsib gvancez yigen, dap le gij vwndiz gyoengq gicej.

Aenhoih fatbouh iuheuh, Gvangjsih gak dieg gak bouhmonz aeu daj gij dohsang daengxbuenz henhoh minzcuz doxgiet caeuq gaijgwz hwng- fat onjdingh, cungfaen roxyiuj gij youqgaenjsingq gvancez doeksaed《Diuzlaeh》, dawz haeujlaeg hagsib senhconz、gvancez doeksaed 《Diuzlaeh》 caeuq hong saedsaeh bonj dieg bonj bouhmonz gaenjndaet giethab hwnjdaeuj. Gak gaep dungj- can、minzcuz、minzyij bouhmonz aeu roengzsim cujciz hagsib senhconz 《Diuzlaeh》, cinjdeng hag rox gak hangh iugouz 《Diuzlaeh》, baujmaenh sugrox dawzndei、cinjdeng yungh, haenqrengz cauh’ok gij vanzging yizlun ndei caeuq heiqfaenh ndawbiengz naekgywd hag yungh saw vah minzcuz vunznoix. Aeu youq gwnz giekdaej laegdaeuq roxyiuj gij youqgaenj yiyi caeuq gohyoz neihanz 《Diuzlaeh》, nyinhcaen dingh’ok fueng’anq saedhengz 《Diuzlaeh》, ciengzsaeq doeksaed banhfap, laeb- guh laebndei boiqdauq cidu; cienz- mienh gyagiengz hwnjguh guhhong ciznwngz gak bouhmonz hag yungh saw vah minzcuz, dinghmingz guh- hong cizcwz yinvu; cietsaed gyagiengz cujciz lingjdauj caeuq dukcoi genjcaz, laebguh laebndei guhhong hezdiuz gihci, baujmaenh hong saw vah minzcuz vunznoix netsaed mizyauq haiguh.