Ngoenzneix Vujcon hai Sanhgoh,

Duzdinz duzdoq mbin doengz mbin;

Song lwg Nazlez daeuj ok sing,

Naj youh mbouj nding lumj gaeqboux.

Song dou hwnj daiz daeuj aj bak,

Cukhoh daihgya ndang noh byau;

Bet goujcib bi mbouj suenq laux,

Bouxboux lwgsau mwh cibbet.

Ginghoh dangj raeuz gij ngoenzseng,

Lajmbwn gij va hai engq hoengz;

Goujcaet bi gvaqdaeuj gyoeng,

Yawjraen duzloengz(lungz) ok gyang haij.

Eu hot fwen ndeu danq dangj aen,

Laj mbanj gizgiz hwnj baenz laeuz;

Miz le banggungz caez daeuj maeuz,

Gwnz bya hwzdauz bienq gimngaenz.

Gvangjsih laebbaenz roekcib bi,

Ngoenzneix roegyuenq mbin doh biengz;

Beixnuengx guh’angq lumj gvaq cieng,

Vunzlai simhai ciengq mbouj dingz.

Ginzcung leih’ik cuengq youq senh,

Fuzbinz gunghgenh ca ndaej ndi(ndei);

Gaxgonq gungzhoj bienq fouqmiz,

Gvangjsih lingjdauj guh ndaej ak.

Cwngcwz vih minz daih doek daih,

Ranzranz ganq faiq ndaej baenzboengj;

Lwgmbwk lwgsai baenz diuzdoengz,

Gyoengqde dij ngaenz gvaq cien fanh.

Cunghyangh Ginhveij daeuj haucauh,

Lwgsau lwgmbauq doengz yangjying;

Seizneix doxsing bae dang bing,

Lajmbwn andingh cij miz ranz.

Bouxcoz dahsau doengz yungjyoz,

Bauqyauq guekcoj gihvei ndei;

Docih yinzminz gij ginhdui,

Ngoenzngoenz soujvei youq henzguek.

Aen guekcoj raeuz doengz gyaezgyoh,

Aen seizdaih moq swhsiengj moq;

Gyoengqraeuz riengz dangj byaij diuzloh,

Saedyienh loqsiengj bongh baenaj.