“Guh lai di, mbouj yungh goenx nywj gueng.” Coenz vah neix dwg daxmeh gou gangj gvaq, de gangj gvaq coenz vah neix ngamq gvaq bi lai couh gvaqseiq lo.

Daxmeh gou gvaqseiq miz 40 bi lo, de gvaqseiq seizhaenx gou ndaej cib lai bi, daengz seizneix gou gaenq 50 lai bi lo, hoeng daxmeh gangj coenz vah neix gou baenz seiqvunz cungj ndaejgeiq.

Coenz vah neix dwg gangj gijmaz? Haujlai vunz dingq gou gangj le cungj mbouj rox. Gou daengz laeng aeu lwnh daihgya rox, seizneix gangj di saeh wnq gonq.

Vunzraeuz gvaq cieng, itbuen cungj aeu gvaq ndwencieng cibngux le cij suenq gvaq cieng caez. Hoeng seizneix seizdaih bienq lo, miz haujlai vunz aeu bae gyae guh hong, mizmbangj vunz caengz gvaq cieng caez couh okdou bae lo.

Daeglwg gou couhdwg yiengh- neix, de youq aen singz hung ndeu guh hong, cieng caengz gvaq liux couh deng bae hwnjban lo. Daengz ndwen- cieng cibngux ngoenzhaenx, youq gyae lai mbouj ndaej dauqma ranz gvaq ciet.

Ndwencieng cibngux haemh- haenx roengzban le, gou caeuq meh- yah bae aen bouqlaeuj gwn ngaiz. Haemhhaenx bouxhek rim bouq, gyoengq hek bouxboux cungj angq- vauvau gwn song cenj gvaq ciet. Gou caeuq mehyah aeu song aen byaek, song cenj caz, caiq aeu vanj dang- yuenz le, caengz gwn couh siengj daengz daeglwg, mbouj rox seizneix de ndaej gwn caengz? Gou aeu veihsin cam de:“Lwg ha, ndaej gwn haemh caengz?”

Dou di ndeu cungj siengj mbouj daengz, daeglwg naeuz de seizneix lij deng gyaban.

Gou caeuq daxmeh de cungj doeksaet lo: Gvaq ciet lij deng gyaban, vihmaz ne?

Mehyah bak lai, de mbouj gvaq uk couh gangj vah neix okdaeuj:“Gyaban miz song cungj, cungj ndeu dwg naengzganq lai le deng guh lai di, lingh cungj dwg guh saeh ngaiznyed lai le deng gyaban.”

Daeglwg dwg cungj yienzaen lawz deng gyaban, gou caeuq mehyah cungj mbouj gamj cam lwg, aenvih dou lau de dwg cungj vunz daihngeih couh cuet lo.

Dou song gyaeujyah cungj sim- nyap mbouj rox gangj maz ndei. Seizneix, aen veihsin gou yiengj lo. Baezneix dwg bouxcoz danvih dou ra gou, de seizneix lij youq ranzbanh- goeng gyaban. Laxlawz, haetneix danvih baij de nem bouxdaeuz baih- gwnz roengz yieng, gyanghaet bae gyanghaemh ma, baedauq gungh 200 lai goengleix, ma daengz le baeg lai lo, bouxdaeuz baihgwnz daengq de daengz ranz le gvaq ciet gonq, hoeng de gag gyaban aeu guh hong sat cij maranz. De raiz ndaej bien baugau roengz yieng le, couh daj veihsin fat hawj gou yawj. Gou youq ndaw danvih dwg bouxgeq, bouxcoz raiz faenzcieng maij ra gou bang yawj.

Bouxcoz neix gyaban, mbouj yungh gangj cungj rox, de dwg boux naengzganq gag aeu guh lai di.

Caiq gvaq yaep he gwn imq le, mbouj miz maz saeh gou yawj baengzyouxgien veihsin guhcaemz, sawqmwh raen ndawde lij miz bouxcoz ndeu naeuz de hix deng gyaban. Bouxcoz neix dwg dah vaihseng gou, de youq Gveilinz Si aen yihyen ndeu guh canghyw. Dah vaihseng youq ndaw baengzyouxgien baenzneix raiz naeuz:“Gangjbya ra raen lo, hoeng baenzlawz cij nep ndaej okdaeuj ne?”

Mehyah gou hix dwg youq yihyen guh hong, de raen dah vaihseng raiz gij neix le, gaenjcieng daengz yaek diuq hwnjdaeuj, sikhaek couh aeu daj dienhvah gvaqbae cam dah vaihseng.

Gou naeuz:“Guh saeh gaej vueng lai, raeuz daj veihsin cam de gonq, yawj dwg saeh maz cij gangj.”

Gou daj veihsin cam dah vaih- seng, de fat aen biujcingz guhriu gvaqdaeuj le cij naeuz:“Bohnax meh- nax gaej you gou, miz boux vunz gvaq ciet gwn bya deng gangj gaz hoz, youq ranz gag dawz mbouj ndaej okdaeuj, gou gaenq bang de nep okdaeuj lo.”

Laxlawz, ndwencieng cibngux dah vaihseng bouxdog cigban, aen gohsiz de dwg yw bingh aen bak caeuq conghhoz vunz, gvaq cieng gvaq ciet gingciengz miz vunz gwn bya deng gangj gaz hoz daeuj yihyen gipyw. Mehyah gou vihmaz gaenjcieng ne? De lau dah vaihseng coz lai, caengz miz gingniemh geijlai, daj ndaw hoz nep gangj mbouj yungzheih, guh mbouj ndei dauq deng gangj doek haeuj hoz laeg bae couh ok saeh hung lo.

Baihgwnz gangj gij saeh 3 bouxcoz gvaq ciet gyaban haenx, mbouj miz gienh saeh lawz daegbied hung, hix mbouj miz gienh saeh lawz daegbied mizyinx, hoeng gij saeh gyaban gyoengqde dauq ndaej gangj aen dauhleix neix: Ok rengz guh hong cij ndaej youq ndei gwn van.

Gangj daengz neix le, gou aeu gangj coenz vah daxmeh gou haenx dwg gijmaz eiqsei lo.

40 bi gonq, miz ngoenz ndeu, daxmeh daiq gou bae ndoi goenx nywj. Seizdaih haenx lij miz swnghcanjdui, raemxnaz、duzvaiz cungj dwg swngh- canjdui caez ndaem caez ciengx, vunzmbanj aeu doxlwnz bae goenx nywj ma gueng vaiz. Ngoenzhaenx, gou nem daxmeh byaij song aen lai cungdaeuz cij daengz ndoi, byaij baegfofo caengz ndaej yietnaiq saekdi couh deng goenx nywj lo. Daxmeh heuh gou siujsim di, ndaw nywj miz cungj haz raeh lai gat fwngz…… Vah daxmeh ngamq gangj liux, gou couh deng gat fwngz lo, fwngzswix gou ok lwed le manh raixcaix, gou cungj yaek daej lo, hoeng daxmeh dauq hat naeuz:“Deng gat di fwngz suenq maz, caiq goenx gvaq!”

Ngoenzhaenx, gou doq doek raemxda doq goenx nywj, daengzlaeng goenx ndaej gij nywj haenx cungj nem miz di lwed……

Seiz rap nywj maranz, daxmeh doq gangj doq raemxda doek:“Lwg ha, mwngz deng gat fwngz in daengz sim daxmeh. Hoeng daxmeh nyengh aeu mwngz goenx nywj, dwg siengj son mwngz rox —— hong goenx nywj mbouj yungzheih guh.”

Daxmeh caiq son gou naeuz:“Bouxlaux cungj gangj, ‘guh lai di, mbouj yungh goenx nywj gueng’! Seizneix mwngz rox dwg maz eiqsei luha?”

Gangj caen, seizhaenx gou caengz rox geijlai.

Seizneix gvaqbae geijcib bi le, gou cij rox gij eiqsei caeuq sam boux bouxcoz gvaq ciet gyaban doxdoengz: Ok rengz guh hong, cij ndaej youq ndei gwn van.