Cib Sam

Youq gwnz aen singgiuz daihseiq miz boux guh gaicawx ndeu. Boux vunz neix nyaengqnyatnyat, mbouj ndaej vangq ngiengx gyaeuj saek mbat.

“Gyanghaet ndei!” Lwgvuengziq naeuz dwk de, “Ien mwngz ndaep bae lo!”

“Ngeih gya sam ndaej haj, haj gya caet ndaej cibngeih, cibngeih gya sam ndaej cibhaj. Gyanghaet ndei! Cibhaj gya caet ndaej ngeih cibngeih, ngeihcib ngeih gya roek ndaej ngeihcib bet. Gou mbouj ndaej vangq citdawz ien baezmoq go. Ngeihcib roek gya haj ndaej samcib it. Va! Haj ik lingz it bak roekcib ngeih fanh song cien caet bak samcib it.”

“Haj ik gijmaz ne?”

“W? Mwngz lij youq gizneix ha? Haj ik lingz it bak fanh……Gou goj mbouj rox dwg gijmaz……Gou nyaengqnyatnyat, gou lij miz haujlai saeh yaek guh bw, gou mbouj ndaej vangq caeuq mwngz doxgangj lai, ngeih gya haj ndaej caet……”

“Haj ik lingz it bak fanh gijmaz ne?” Lwgvuengziq cam de dem. De cam gijmaz cungj yaek cam goek cam rag.

Boux guh gaicawx neix ngiengx gyaeuj hwnjdaeuj.

“Gou youq gwnz aen singgiuz neix ndaej hajcib seiq bi gvaq, hajcib seiq bi neix gou deng vunz gauxca sam mbat gvaq ndwi. Baez daih’it dwg ngeihcib ngeih bi gaxgonq, miz duz mboenj ndeu mbouj rox daj gizlawz doek roengzdaeuj. De swenjyatyat dwglau lai, yienghneix gou suenqsoq cix suenq loeng seiq giz bae. Baez daihngeih dwg cib’it bi gaxgonq, gou baenz binghfungcaep, in lai guhhong mbouj ndaej, aenvih gou gyaez lienhndang, mbouj ndaej vangq youz- langh liuhlah guhcaemz. Baez daih- sam……W, couhdwg baez neix lo! Haxbaenh gou suenq daengz haj ik lingz it bak aen……”

“It bak fanh gijmaz ne?”

Boux guh gaicawx neix roxndeq, langhnaeuz mbouj han Lwgvuengziq, de cix dinghsim roengzdaeuj guhhong mbouj ndaej lo.

“Geij bak fanh aen doxgaiq neix, mbangjseiz youq gyangmbwn yawj ndaej raen gyoengqde go.”

“Dwg nengznyaen ha?”

“Mbouj dwg go! Dwg doxgaiq rox rongh go.”

“Dwg duzrwi ha?”

“Mbouj dwg go! Cungj doxgaiq de hawj vunz gikgyanggyang bae go, lij rox hawj vunz gyangngoenz loqfangz- hwnz dem bw. Gou cix nyaengq lai lo, gyangngoenz mbouj ndaej vangq loq- fangzhwnz nauq.”

“O! Dwg ndaundeiq ha?”

“Wgo! Dwg ndaundeiq go!”

“Mwngz aeu haj ik aen ndau- ndeiq guhmaz ne?”

“Haj ik lingz it bak roekcib ngeih fanh song cien caet bak caetcib it aen ndaundeiq. Gou naebsim guhhong, gou suenq ndaej dengcinj dahraix lo.”

“Mwngz aeu doenghgij ndau- ndeiq neix guh gijmaz ne?”

“Mbouj guh gijmaz ne. Gyoengq- de dwg duh gou go.”

“Doenghgij ndaundeiq neix dwg duh mwngz ha?”

“Wgo! Gyoengqde dwg duh gou go!”

“Hoeng gou roeb boux guek- vuengz ndeu, de……”

“Doenghgij ndaundeiq neix mbouj dwg duh guekvuengz bw, guekvuengz guenj gyoengqde ndwi bw.”(16)