Mwh hwnj dangzraizsaw, cihsaw duzbit raiz haenx gig mbouj ndeiyawj, geujgeuj ngengngeng. De yawjyawj cihsaw duzgaeq raiz haenx, ha! Cihsaw duzgaeq raiz ndaej caen ndei, de hozhaenz dangqmaz.

Duzbit naemj:“Vihmaz cihsaw duzgaeq raiz ndaej baenzneix cingq, gou cix raiz mbouj ndei ne?” Sawqmwh, de lwgda baez rongh, gonj gangbit moq duzgaeq youq laj ronghndit ronghmyagmyag. “A! Gou rox lo”, duzbit angqyangz hemq hwnjdaeuj:“Dwg gonj gangbit duzgaeq ndei, cihsaw de cij raiz ndaej ndei ne.” Duzbit laeglemx doiq duzgaeq naeuz:“Cingj aeu gonj gangbit mwngz ciq hawj gou raizraiz, ndaej lwi?”“Mwngz mbouj dwg miz bit ha?” Duzgaeq geizheih cam. “Gonj bit gou mbouj ndei, cihsaw raiz okdaeuj hix mbouj ndeiyawj.” Duzbit naeuz. Duzgaeq aeu gonj bit ciq hawj de.

Duzbit gaem dawz gonj bit duzgaeq raiz hwnjdaeuj, geizheih? Baenzlawz lijdwg raiz mbouj ndei? Seizneix, lauxsae byaij gvaqdaeuj, rox gienh saeh neix le. Lauxsae doiq duzbit naeuz: “Naemj raiz ndei cihsaw, youqgaenj mbouj baengh gonj bit, aeu baengh bonjfaenh roengzrengz、nyinhcaen bae lienh.” Duzbit seizneix cij caencingq rox le gij yienzaen cihsaw raiz mbouj ndei, ndigah de gietdingh ndeindei lienh raiz saw.

(ngeih nienzgaep Suh Yiz raiz Dahdingz hoiz)