Gaxgonq miz song boux vunz, boux ndeu singq Goz, lingh boux singq Soh. Miz ngoenz ndeu, song boux vunz doxeuq hwnjdaeuj. Boux singq Soh naeuz:“Simvunz yaek soh cij ndei, guh vunz soh cij ndaej.” Boux singq Goz naeuz:“Soh couh hoj ra gwn. Sim vunz aeu goz cij baenz, boux vunz goz miz bonjsaeh!” Song boux vunz ceng bae ceng dauq cungj mbouj faen sawhingz, couh bae ra bouxwnq daeuj bingzleix.

Gyoengqde ndij diuz loh hung sohsoh byaij, byaij daengz haenz naz raen boux vunz he cingq cae naz. Couh cam de:“Daegbeix, mwngz naeuz bouxvunz soh ndei roxnaeuz goz ndei?” Bouxcaenaz naemj yaep he le han naeuz:“Gou yawj dwg goz ndei, sou yawj, fagcae gou noegcae goz, ek vaiz caemh goz, ndei cae naz bw. Danghnaeuz mbouj goz, couh cae mbouj ndaej naz lo!” Boux singq Goz angq dangqmaz, riu dwk doiq Boux singq Soh naeuz:“Gou naeuz goz ndei, mwngz lij euq dai euq lix, seizneix mwngz nyinh saw lo ba!”

Boux singq Soh sim mbouj fug, songde youh laebdaeb byaij baenaj, daengz haenz reih, yawjraen meh- mbwk he cingq raemj faex. Youh cam:“Beixnangz, dou cam mwngz, boux vunz goz ndei roxnaeuz soh ndei?” Bouxraemjfaex naeuz:“Fagcax gou sohlwd ndei raemj faex, dangyienz dwg soh ndei lo. Danghnaeuz fagcax gou goz, couh mbouj ndei raemj faex lo. Gou yawj lijdwg soh ndei!” Boux singq Soh coh boux singq Goz ndiengq naeuz:“Ne, lijdwg gou gangj ndaej deng ba!”

Boux singq Goz hix mbouj fug, song boux youh laebdaeb byaij, byaij daengz henz rij, yawjraen boux vunz he cingq ep bya, gyoengqde youh cam:“Daegbeix, mwngz nyinhnaeuz goz caeuq soh yienghlawz ndei?” Boux- epbya naeuz:“Ciuq gou gangj, mbangj- seiz goz di ndei, mbangjseiz soh di ndei. Beijgangj aen bakset gou couh- dwg goz ndei, diuz ganjset couhdwg soh ndei lo.”

Songde dingq le vanzlij boux mbouj fug boux, lij gwq byaij gwq euq, byaij daengz henz Dahbanq, euq bak ndat le youh doxceng, cengceng couh doxmoeb hwnjdaeuj. Boux singq Goz hung sang miz rengz, yaep he couh moeb ndaej boux singq Soh laemx gwnz dieg hwnj mbouj daeuj, sat le youh vet lwgda boux singq Soh okdaeuj, vit roengz ndaw Dahbanq bae.

Boux singq Soh yawj mbouj raen saek yiengh lo, saemxsaemx saxsax lumh daengz ndaek rin hung he, naengh youq gwnz rin daejww hwnj- daeuj.

Baeuqroxdoh gwnz mbwn gaem- guenj gij mingh ciencien fanhfanh vunz Mbanjcuengh. Moix boux vunz cungj miz diuz sienq he lienz daengz gwnz fwngz de. Ngoenzneix, de sawq- mwh roxnyinh gwnz fwngz miz diuz sienq he soeng lo, couh heuh dahsien henz ndang cimh diuz sienq roengz lajbiengz bae yawjyawj. Dahsien daeuj daengz henz Dahbanq, yawjraen gwnz rin miz boux vunz he daej haemz daej hoj, couh byaij gvaqbae cam. Boux singq Soh couh gangj ok gij saeh bonjfaenh caeuq boux singq Goz baenzlawz doxceng, doeklaeng deng moeb deng vet lwgda. Dahsien sik- haek dauqma gwnz mbwn bauqlwnh Baeuqroxdoh, Baeuqroxdoh gangj:“Gienh saeh neix gig youqgaenj, gou yaek gag roengzbae cawqleix cij ndaej.”

Gangj sat, couh bienqbaenz goenglaux he bae daengz henz Dah- banq, doiq boux singq Soh naeuz:“Mwngz gaej daej lai, gou daeuj bang mwngz!” Gangj sat daj ndaw Dahbanq vax dawz song lwgda de hwnjdaeuj, bang de dauqcungz cang ndei, youh cam de:“Ranz mwngz miz gij haeuxcid gaeuq ce 3 bi lwi?” Boux singq Soh han naeuz:“Miz.” Baeuqroxdoh youh cam:“Miz mbouj miz gij laeujhaeux ce baenz 3 bi?” Boux singq Soh naeuz:“Miz.” Baeuqroxdoh naeuz:“Mwngz baema le, heuh yah mwngz aeu gij haeuxnaengj gaeuq cawj moj haeux he, caiq dawz gij laeujhaeux ce baenz 3 bi baij hwnj gwnz daiz. Mwngz swhgeij vaiq bae raemj faexcuk, humx ndei raepgaeq、songzmou caeuq rienghvaiz. Aihaemh couh mbouj dauqma ranzhaz ninz lo, caeuq lwg- yah mwngz bae ranznden doz ninz haemh he. Byonghhwnz danghnaeuz dingqnyi sing maz, ciengeiz gaej okdaeuj ndomq yawj, hix gaej ok sing. Mwngz baema ba!”

Boux singq Soh cien docih fanh docih Baeuqroxdoh le, couh baema lo. De dauq daengz ranz le couh ei vah Baeuqroxdoh gangj, baenz diuz baenz diuz ciuq guh, daiq lwgyah bae ranznden ciq dieg ninz. Ninz daengz byonghhwnz, dingqnyi mou swenj vaiz hemq、vunz cauz max swenj luenh faenfaen. Ngoenzlaeng maranz baez yawj, raepgaeq gaeq doxnep, songz- mou mou rimsad, rienghvaiz vaiz ndaetndet. Byaij haeuj ranzhaz baez yawj, moj haeuxnaengj bienqbaenz moj gim he, doengj laeujhaeux bienq- baenz doengj ngaenz he. Daj seiz- haenx hwnj, gij ndwenngoenz boux singq Soh daengx ranz couh ndaej youq ndei gwn van lo.

Miz ngoenz ndeu, boux singq Goz daj baihnaj ranz boux singq Soh byaij gvaq, yawjraen boux singq Soh mbouj- dan caengz dai, lwgda de gingqyienz dauq ndei lo, lij fatcaiz dem! Boux singq Goz roxnyinh gig geizheih, couh cam boux singq Soh vihmaz. Boux singq Soh lauxlaux saedsaed gangj ok gij saeh swhgeij bungq daengz dahsien caeuq goenglaux.

Boux singq Goz dingq le hoz- haenz dangqmaz, couh heuh boux singq Soh daiq de bae gaiq rin henz Dahbanq, vet mbon lwgda okdaeuj vit roengz ndaw dah bae, hix naengh gwnz rin cangyiengh daej haemz daej hoj. Yaep he, caen miz dahsien ndeu daeuj cam de dahraix. Boux singq Goz couh doiq dahsien naeuz:“Gou caeuq boux singq Soh miz cenx, de seizneix miz cienz le, heuh vunz hoenx gou laemx youq gizneix, lij vet lwgda gou okdaeuj vit roengz ndaw dah bae!” Gvaq yaep ndeu youh caen miz bouxlaux he daeuj dahraix, de cam boux singq Goz vihmaz daej, boux singq Goz youh ciuq gaeuq gangj gij vahbyangz lwnh hawj goenglaux. Goenglaux naeuz:“Gaej yousim, gou itdingh ndaej bang mwngz!” Gangj sat daj ndaw dah lauz lwgda hwnjdaeuj bang de cang ndei, youh son de baenzlawz cawj haeux- naengj gaeuq ce 3 bi, baij laeujhaeux ce baenz 3 bi okdaeuj, gven ndei raepgaeq、songzmou caeuq rienghvaiz, bae ranznden doz ninz haemh he. Lij lwnh de:“Byonghhwnz danghnaeuz dingqnyi sing maz ciengeiz gaej okdaeuj yawj, hix gaej ok sing.”

Boux singq Goz gipmuengz maranz, yienghyiengh ei goenglaux gangj bae guh. Vihliux ndaej aeu lai di gimngaenz, couh dawz gij haeuxnaengj moq ngamq sou ma cawj ok 3 moj haeux, cung sam seiq mbai raemxdah haeuj ndaw laeujhaeux bae, gaeg raepgaeq、songzmou caeuq rienghvaiz ndeindei, baenzneix le cij daiq lwg- yah bae ranznden doz haemh. Daengz byonghhwnz, youh caen miz mou swenj vaiz hemq、vunz cauz max swenj dahraix. Boux singq Goz riu lo:“Baezneix daengz gou fatcaiz lo, yaek ak gvaq boux singq Soh geijlai boix bae!” Yied siengj yied ninz mbouj ndaek, yied siengj yied roxnyinh hoj deq daengz ranzrongh, couh caegcaeg byaij okdaeuj youq rog donghhumx ndomq yawj ndawde gaenq miz geijlai gaeq geijlai mou geijlai vaiz, caenh raen ndaw ranz rimrwdrwd, ndawsim youh angqfwngfwng, de yomjyomj byaij ma caeuq yah de gangj. Song gvanbaz daengx haemh ninz mbouj ndaek, gaeq ngamqngamq haen sing he couh gaenjgip lon ok baema yawj.

Ngamq haeuj daengz bakdou, cij raen ndaw raepgaeq caenh dwg haex- gaeq, songzmou caenh dwg haexmou, ndaw rienghvaiz hix caenh dwg haexvaiz, bin hwnj gwnz laeuzfaexcuk baez yawj, 3 aen moj haeuxnaengj dwg 3 moj haexvunz rimsad, geij doengj laeuj cang rim nyouhvunz henjrwg bauxboemh!