Aen mbanjranz gou dauqcawq miz bya hung. Gyoengq bya goengq nem goengq, ndaw bya miz haujlai gamj, gij gamj hung iq mbouj doxdoengz. Liz aen mbanj gou mbouj gyae miz goengq bya ndeu heuhguh Byaliengz, Byaliengz ndawde miz aen gamj ndeu daegbied hung, heuhguh Gamjliengz, ndawde miz baenz 3 caengz hung.

Doenghbaez gou doeg siujyoz seiz, aenvih seizhaenx gungzhoj lai lo, mbouj ndaej lumj seizneix miz cienz bae baihrog lijyouz, moix aen yozgiz lauxsae couh daiq dou bae youz Gamjliengz mbat ndeu. Gou geiq ndaej haeuj gamj seiz dwg daj aen congh ndeu haeujbae, ok gamj seiz dwg daj lingh aen congh okdaeuj. Youz gamj aeu song diemj lai cung cij ndaej youz sat. Lauxsae daiq dou youz caengz daih’it, caengz daih- ngeih、caengz daihsam yungyiemj lai, lauxsae coengzlaiz mbouj daiq dou bae youz gvaq. Ndaw gamj vwnhdu baujmaenh youq 20 doh baedauq, mboujguenj seizlawz haeuj gamj cungj ndangsoeng. Ndaw gamj gij rinraemx- ndik geizheih dangqmaz, miz lumj doenghduz, miz lumj doenghgo, miz lumj bouxvunz, gij ndaek rin aeu soujdendungz bae ciuq couh mig- myanmyan, ndeiyawj raixcaix.

Gamjliengz hawj vunz ndaejgeiq mbouj dwg aenvih gij hung roxnaeuz gij rin geizheih, dwg aen gojriuz ndaw gamj. Dingq vunzlaux gangj gaxgonq miz goeng caizcawj ndeu miz gim- ngaenz daixbaj, aeu gang aeu sieng daeuj coux, daengx ranz rim caez. Goeng caizcawj neix lau vunz daeuj caeg gij gimngaenz de, couh baij geij boux vunz youq gyanghwnz dawz gij gimngaenz ndaw ranz yo haeuj Gamj- liengz bae. Daengz bang vunz yo gij gimngaenz sat, goeng caizcawj couh gaj bang vunz neix bae, yienghneix couh mbouj miz vunz rox gij gimngaenz de yo youq gizlawz. Aen cienzgangj neix couh daihdaih cienz roengzdaeuj. Yinx ndaej gyoengqvunz nanz mbouj nanz couh haeuj gamj bae ra gim, bouxboux cungj siengj: Danghnaeuz miz ngoenz ndeu ra ndaej raen gij gim goeng caizcawj yo couh fatcaiz lo. Hoeng, daengz seizneix lij mbouj miz bouxlawz ra ndaej gvaq. Gou nyinhnaeuz, sai rengz bae ra gim cienzgangj, mboujyawx bae gaenx guh, baenzneix ndaej ngaenz lij vaiqdi.