Ngoenzneix, boux “canghcuz” ranz Dahliq miz saeh, heuh de roengzban couh swnh loh cawx byaek baema. Dahliq dwg boux dinfwngz vaiq ndeu, guh maz saeh cungj haengj guh ndei giva gonq, baez guh couh aeu baenz saeh. Ndigah, vihliux mienx- ndaej ra dieg cuengq ci, de couh haici heux gvaq aenhaw, coh aen bakloh cibcih henz ranz hai bae.

Dieg neix, caeuq aen yozyau hung doxgaenh, youh youq henz geij aen siujgih hung, ngoenznaengz cungj miz cien fanh vunz daj gizneix baebae dauqdauq. Ndigah, gizneix seng’eiq gig ndei guh. Gyoengq canghbuenq caeuq gyoengqvunz lajmbanj ndaem ndaej byaek mak gwn mbouj liux, cungj haengj rap daengz gizneix daeuj gai. Daegbied dwg gij byaek mak gyoengq beixnuengx lajmbanj haengj dwk haexgaeq nyouhmou, cungj maj ndaej unqnumnum、ronghsagsag, aeu daeuj cawj gwn, gig miz feihdauh. Dahliq hix gig haengj caeuq gyoengqde cawx huq, bengz di hix simgam.

Ci de ngamq hai gaenh bakloh seiz, Dahliq couh deng rap byaek heuswtswt gizgyae ciuyinx gvaqbae lo. Rap byaek haenx miz byaekgat caeuq byaekhau, song cungj neix cungj dwg de ceiq haengj gwn bw. Gij byaek haenx miz di daegbied, baez yawj couh rox dwg byaek lajmbanj ndeigwn.

Boux dancawj gyae’gyae raen Dahliq songda yawj rap byaek de da mbouj yaep, couh rox yaek miz seng- eiq daeuj lo. De riunyum coh Dahliq vadfwngz mbouj dingz, eiqsei dwg heuh Dahliq haici gvaq naj dan de bae dingz ci cawx byaek.

Dahliq raen de baenz simndat, dingz ci roengz ci le, couh coh rap byaek haenx byaij bae. Gaenh yawj, gij byaek de engq maez vunz, gij byaek lumj gwn raemx imq nei, baez bungq couh yaek rad raemx okdaeuj, ga de caiq hix sij mbouj ndaej yamq deuz lo.

“Boh’au, gij byaek neix baenz- lawz gai ne?” Dahliq riunyum cam naeuz.

“A, A, A……” De doq ok geij sing, doq iet 3 aen lwgfwngz okdaeuj, hix riunyum dwk, yienghsiengq gig sienh. De gingqyienz dwg boux nuk- ngoemx he! Dahliq rox le: Gij byaek neix gaem he 3 maenz.

Sim Dahliq baez anj, seizneix cij sijsaeq cimyawj bouxsai neix. De nienzgeij daihgaiq miz 60 bi baedauq nei. Aenvih ngoenznaengz cungj dajndaem, ndit dak fwn rwed, naj de caeuq dinfwngz de cungj deng dak ndaej youh ndaem youh nyaeuq. Yienghsiengq de caeuq vunz doengz- ban doxbeij, damlaux haujlai bi. De boux vunzlaux youh nukngoemx he, mboujdan roengzrengz gaenx guh dajndaem, vanzlij rap daeuj gai dem. Hwnj haw gai byaek doiq haujlai vunz daeuj gangj, dwg saeh yungzheih, hoeng doiq boux nukngoemx daeuj gangj, caen dwg…… Dahliq daj ndawsim boiqfug de dahraix!

Dahliq gungj hwet genj hwnj gaem byaekgat caeuq gaem byaek- hau, couh hawj de cang daeh, youh daj ndaw daeh mbon ok mbaw 10 maenz ngaenz hawj de.

De mbouj gaenj coux aeu ngaenz Dahliq, dauqfanj gaenjgip dawz daeh byaek cuengq hwnj ci Dahliq bae. Youh cienqndang bae dan cangh- buenq henz de, daj daeh lingh mbon ok 10 maenz ngaenz bae caeuq dancawj vuenh cienzlingz. Dahliq baez daih’it raen boux guh seng’eiq baenzneix simsoh, raen cienz mbouj gaenj ciep. Gij hengzdoengh de hawj sim Dahliq miz di saenqdoengh lo.

“Mwngz dwg yaek aeu cienz hawj gou lwi?” Boux dancawj haenx caeuq de gangjriu naeuz. De hix “he he” gaen riu geij sing, ngauzngauz gyaeuj, youh iet fwngz dawz 10 maenz hawj doiqfueng. De daj biujcingz gyoengq- vunz yawj rox, boux dancawj neix dwg caeuq de gangjriu hane, de caeux couh sibgvenq lo.

“Mbwn o, caezgya cungj dwg gai byaek, dou daeuj buenq ngoenz lo, lij caengz gai ndaej saek gaem, de boux nukngoemx he, ngamq daeuj daengz, dauq gai ndaej vaiqvetvet bw!” Lingh boux canghbuenq henz dan youh caeuq gyoengqvunz gangjriu naeuz.

De vuenh ndaej cienz le, couh sikhaek buet daengz baihnaj Dahliq, ciep aeu 10 maenz ngaenz le, youh doq bouj 5 maenz ngaenz hawj de.

Dahliq ngauzngauz gyaeuj, naeuz de bouj loek cienz lo, coh de iet 4 lwgfwngz, swnh fwngz dawz 5 maenz haenx ndenq dauq hawj de.

De dauqfanj riuhaha hwnjdaeuj, mbouj ciep ngaenz Dahliq ndenq, ceij song gaem byaek, iet fajfwngz okdaeuj, eiqsei naeuz: Cawx song gaem, cij aeu 5 maenz ngaenz.

Sim Dahliq gig raeuj, gamj- doengh dangqmaz. Bingzseiz de caeuq gij canghbuenq cawx doxgaiq, lai raen sou lai, noix miz aeu noix, saekseiz vanzlij deng gwn dacaengh dem. Boh- au neix caen dwg ndei!

Dahliq yo ndei ngaenz, docih gvaq boux dancawj neix le, couh cienqndang bae gai doiqmienh dan nohmou cawx di ndokmou.

Caj Dahliq dauq daengz baihneix yaek haici dauq seiz, sawqmwh yawjraen boh’au haenx ndwn youq baihgvaz henz ci swhgeij. De caeuq Dahliq riu le riu, ceij diuz yaekseiz gwnz ci Dahliq. Laxlawz Dahliq lumz dawz yaekseiz ok, de cingq bang Dahliq hen ci ne!

Sawqmwh, Dahliq raemxda rim gvaengz, de youh deng Boux nuk- ngoemx swnzsienh、lauxsaed、simsoh neix saenqdoengh lo! De song da moengzloengz yawj aen ngaeuz boh’au miz di saemxsax byaij gvaq dan byaek bae, ndawsim youh foekfan hwnj- daeuj ……