Ngoenz ronghcingx raeujrub ndeu, Daegmingz caeuq dahcej de bae gunghyenz guhcaemz.

Gyoengqde youq ndaw gunghyenz doq menhmenh byaij, doq yawj gij gingjsaek gyaeundei ndaw gunghyenz. Sawqmwh, raq sing roeg heuh ndeidingq ndeu, dazyinx gyoengqde haeuj giz dieg gyaeundei daemxdingj ndeu bae lo. Gyoengqde riengz gij sing roeg heuh ra raen duz roeghenj dwggyaez ndeu, de cingq doq ciengqgo doq youq gwnz nyefaex angq dwk diuq bae diuq dauq ne! Gij bwn duz roeghenj henjndongq henjndongq, lumj daengx ndang nem gim nei hawj vunz sim maez, de miz doiq da iq ndongqliglig ndeu caeuq aen gyapbak youh henj youh iqet ndeu, geijlai gyaeundei ha!

Daegmingz daj ndaw daeh mbon ok aen danzgung caeuq gij lwgyienz vanzgi doiqcinj duzroeg, ngamq yaek nyingz okbae, dahcej caemjcangj haeddingz de:“Duzroeg dwg baengzyoux ndei raeuz, duzroeg gawq ndaej daeuq raeuz riu, youh ndaej bang raeuz gaeb duz nonhaih, raeuz wnggai baujhoh duzroeg!”

Daegmingz dingq le naj nding lo, najmong dwk sou dauq aen danzgung oet haeuj ndaw daeh bae, sim siengj: Dahcej gangj ndaej deng, raeuz wnggai baujhoh duzroeg.

Daegmingz caeuq dahcej mbouj ok sing ndwn youq laj gofaex, laebdaeb bae dingq gij sing roeg heuh.

(sam nienzgaep Vungh Yijyinh raiz Dahdingz hoiz)