De rwed raemx hawj dujva mbat doeksat seizde, de yaek dawz dujva yo hwnjdaeuj, seizde de raemxda yaek doek roengzdaeuj lo.

“Dauqlaeng raen.” De doiq dujva naeuz.

Dujva mbouj han de.

“Dauqlaeng raen lo.” De youh naeuz baez dem.

Dujva ae geij mbat, hoeng mbouj dwg aenvih dwgliengz.

Dujva doiq de naeuz: “Gou haxbaenh huk lai, mwngz gaej gvaiq gou lai, muengh mwngz gvaq ndaej angqyangz.”

Dujva mbouj ienq de saek di, de roxnyinh doeksaet lai. De gingz aenhab, ndwn youq baihde mbouj rox guhlawz ndei. De mbouj rox dujva vih maz unqswnh hozndei baenzneix.

“Cingqcaen, gou gyaez mwngz!” Dujva doiq gangj, “Hoeng aenvih gou guh loek, mwngz daengz seizneix lij caengz roxndeq. Di neix cungj mbouj youqgaenj saek di. Mboujgvaq mwngz goj huk lumj gou nei. Muengh mwngz ngoenzlaeng vuenyungz. Aenhab cuengq youq baihde couh ndaej lo, gou yungh mbouj daengz de nauq.”

“Rumz daeuj guhlawz guh ne?”

“Gou dwgliengz mbouj naek geijlai……Rumz gyanghaemh doiq gou dauqfanj ndei dem. Gou dwg dujva, gou mbouj lau go.”

“Miz duznon duznyaen daeuj ne?”

“Danghnaeuz gou yaek siengj roxnaj mbungqmbaj, dingj mbouj ndaej saek song sam duz nonnyaiq mbouj ndaej bw. Dingqgangj Mbungq- mbaj gyaeundei lai. Mboujnex lij miz bouxlawz daeuj yaemq gou dem? Mwngz yaek bae dieggyae lo……Gou mbouj lau duznyaen, gou miz rib miz nyauj go.”

De gvaigvetgvet aj seiq gaiq oen gwnz ndang okdaeuj, liuxle naeuz: “Gaej yupyat lai lo, yaek deuz cix deuz lovei.”

De dwg lau Lwgvuengziq yawjraen de daej. Dujva neix ndaengndiengq lai……

Cib

Youq henzgyawj aen singhgiuz Lwgvuengziq lij miz singhgiuziq 325, 326, 327, 328, 329 caeuq 330 daengj. Vihliux hawj bonjfaenh lai miz sawmaeg, de hainduj bae daengz doenghgij singhgiuz neix, siengj ra di saeh guh, caemhcaiq hagsib hagsib dem.

Aen singhgiuz daih’it miz boux guekvuengz ndeu. Gwnz ndang de longz geu buhbauz saekgyaemq aeu naeng doenghduz guh baenz ndeu, naengh youq gwnz aen daengqvuengzdaeq genjdanh youh vifung ndeu.

Guekvuengz yawjraen Lwg-

vuengziq le hemq naeuz:

“O, miz boux vunzbiengz ndeu daeuj lobw.”

Lwgvuengziq ngeix dwk: “De mbouj raen gvaq gou, de guhlawz roxnaj gou ne?”

De gizlawz rox lo, youq ndaw da guekvuengz, lajmbwn neix genjdanh raixcaix: Bouxboux vunz cungj dwg vunzbiengz de.

“Mwngz byaij gvaqdaeuj gyawj di, hawj gou sijsaeq yawjyawj mwngz vei.” Guekvuengz doiq Lwgvuengziq naeuz. Guekvuengz ndaenggon dangq- maz, aenvih seizneix miz boux vunzbiengz ndeu daeuj hawj de guenj, de baenz boux guekvuengz dahraix lo.

Lwgvuengziq yawjyawj seiqhenz, siengj ra dieg naengh roengzdaeuj, hoeng daengx aen singhgiuz deng geu buhbauzraez gyaqseiq duh guekvuengz hah rim liux lo, de mbouj miz dieg naengh, cijndei ndwn youq gizhenx. De naiq raixcaix, aj bak raurumz lo.

“Youq dangqnaj guekvuengz raurumz vaih najda lai.” Guekvuengz doiq de naeuz, “Gou mbouj cinj mwngz yienghneix guh.”

“Hoiq dingj mbouj ndaej lo.” Lwgvuengziq han de naeuz, de najmong lai, “Hoiq byaij gvaq dah byaij gvaq ndoi daeujdaengz gizneix, caengz ndaej ninz saek yaep ne……”

Guekvuengz naeuz: “Yienghneix ha, yienghneix gou couh minghlingh mwngz raurumz. Gou haujlai bi mbouj ndaej raen gvaq saek boux vunz raurumz lo, raurumz noix raen raixcaix. Daeuj! Raurumz baez dem! Gou minghlingh mwngz!”

“Hoiq lau lai vueng lai, hawj hoiq raurumz baez dem hoiq rau mbouj ok lo……” Lwgvuengziq najnding dwk gangjsebseb.

“W! W!” Guekvuengz han naeuz: “Nyaenx gou minghlingh mwngz mbangjseiz raurumz……mbangjseiz mbouj raurumz……”

Guekvuengz vubvub vebveb, miz di hozhwnj.

（12）