Byoemgyaeuj ndaemndwd- ndwd, fouq meizda lumj faggiemq nei, baihlaj miz fouq da hung ndeu cingsaenz gvaekgvaek, gwnz giuzndaeng sangvidvid haenx gaq miz fouq nganxgingq ndeu, aenbak ciengzseiz riunyumj. De dwg byawz? Mbouj loek, de couh dwg daxboh youh yiemzleih youh swnhheiq gou.

Miz ngoenz ndeu cuengq- hag le, gou cingqcaih guh cozyez, hoeng baez ngonz aen lanzgiuz laj din, ndaw hoz couh humz- nyubnyub, caen siengj vaiqdi guh cozyez liux le couh bae dwk giuz! Yienghneix, gou seizbienh youq gwnz cozyez raiz geij bit, couh umj aen lanzgiuz, bae ranzding bek lanzgiuz lo.

Daxboh youq ranzcauq daj- cawj, dingqnyi gij sing “bobbob” haenx, couh hemq naeuz:“Cozyez guh liux caengz?” “Guh liux lo!” Gou han naeuz, ndaw hoz gag daekeiq vauvau.

Daxboh byaij gvaqdaeuj genjcaz cozyez, yaep he, couh cienz daeuj gij sing fok de: “Laeq lwggik neix, mwngz vaiq daeuj yawjyawj! Gij cih mwngz raiz haenx byawz yawj ndaej ok!” Gou laulumlum byaij gvaqbae. “Gij cih mwngz baenzneix gyauj! Byaij lij caengz hag rox, couh siengj hag buet? Vaiq! Gij cozyez ngoenz- neix cienzbouh dauq guh!” Gangj sat, hujdengdeng dauq haeuj ranzcauq bae cawj byaek lo, caenh lw gou youq gizhaenx, doq uet raemxda doq raiz cozyez……

Gvaq mbouj geij nanz, gou dingqnyi daxboh heuh gou: “Lwg ha, gwn haeux lo!” Gou buet daengz ranzgwnhaeux, homfwd- fwd! Dwg gijmaz doxgaiq ni? Va! Gingqyienz dwg gij nohvaizcauj gou ceiq haengj gwn haenx!

Youq gwnz daizhaeux, dax- boh doiq gou naeuz:“Lwg ha, mwngz seizneix dwg siuj hagseng lo! Raiz cozyez mbouj ndaej dam vaiq, aeu raiz ndei! Deq mwngz dabdab saedsaed lienh raiz cih ndaej ndei, cograwz raiz cozyez couh raiz ndaej youh vaiq youh ndei lo!” Baezneix gou dingqvah ngaek gyaeuj digdig. Daxboh mbaeumbengmbeng lax aen- gyaeuj gou, gou yawjraen gokbak de youh menhmenh mbe doxhwnj, daxboh youh riu lo.

Daj baezhaenx le, gou gaijcingq gij vaih sibgvenq sij cih gyauj lo, gij cih gou raiz ndaej youh cingq youh seuq! Youq lauxsae bangcoh caeuq gou bonj- faenh roengzrengz baihlaj, gou lij aeu ndaej daengx guek lwgnyez suhfaz gimciengj ne! Doengh gij- neix, cungj yaekaeu gyo’mbaiq“bohguk” dwggyaez gou.

(bouxraiz Liuz Cwzyij bouxhoiz Goenggen)