6 nyied 9 hauh dwg guek raeuz “ngoenz vwnzva caeuq swyenz yizcanj”, Sanhgyangh Dungcuz Swciyen youq aen ranzsiuq Cinghvah banh aen hozdung Siuqdung vwnzva cauxguh “Mbanjdung mehsiuq langh fungcaij·youq ranz guhhong daiq baenzfouq”, aeu Siuqdung cauxguh、beizyin gisuz dajsiuq、langhbaij Siuqdung、gai Siuqdung daengj hozdung, langhyienj rengzhoengh “feihyiz” Siuqdung.

Siuqdung dwg gij dinfwngz conzdungj Dungcuz gag miz, lizsij gyaenanz, 2009 nienz ndaej lied guh Gvangjsih Bouxcuengh Swcigih feihvuzciz vwnzva yizcanj. Geij bi neix daeuj, Sanhgyangh daihlig doidoengh Siuqdung dinfwngz swnjcienz, cujciz boux swnjcienz dinfwngz dawz gij dinfwngz Siuqdung cienz hawj mehmbwk dangdieg, lij dawz gij Siuqdung gyoengqde siugai daengz ndaw guek rog guek, aeu dinfwngz feihyiz swnjcienz bangcoh vunzlai vutgungz demsou.

(Vuz Lencinh/吴练勋)