Bet

Haemq vaiq, gou couh lai rox duj va Lwgvuengziq gangj haenx lo. Youq gwnz aen singhgiuz Lwgvuengziq, doenghbaez cungj itcig maj doengh gij va haemq genjdanh haenx, gij va neix dan miz caengz limqva ndeu ndwi. Gij va neix haemq iq, mbouj hah dieg geijlai, caemhcaiq mbouj gauxca bouxwnq dem. Haetromh dujva youq ndaw byoznywj hai dwk, daengz gyanghaemh couh loenq lo. Hoeng miz ngoenz ndeu, mbouj rox rumz daj gizlawz boq naed ceh ndeu daeuj, naedceh did ngaz lo. Lwgvuengziq couh ngoenzngoenz haeujsim yawj go va neix, aenvih go va neix caeuq gova wnq gwnz aen singhgiuz de mbouj doxlumj. Lwgvuengziq gag naemj, go va neix aiq dwg lingh cungj faexlwg faexceizlingz bw.

Hoeng go va neix gvaq mbouj nanz couh mbouj maj lo, yaek hai va lo. Yawjraen go va neix maj ok aen valup lauxlaux ndeu, Lwgvuengziq couh roxnyinh daengz aen valup neix yaek miz saeh mbouj bingzciengz lubw. Hoeng dujva neix ndoj youq ndaw rug heuswdswd de cangndang, nanznanz mbouj okdaeuj. De saeqsim genj gij saek de, menhmenh cang- ndang, baenz dip baenz dip dapboiq limqva de. De mbouj nyienh lumj vamakien yienghde, nyungqnyangq daeujdaengz gwnzbiengz. De yaek ronghlwenq gyaeundei hailangh.

De yungh haemq nanz seizgan daeuj dajcang, doeklaeng, miz ngoenz ndeu haetromh, daengngoenz ngamq- ngamq ok congh, de hai va lo.

De gaenq yungh haemq nanz seizgan sijsaeq dajcang, hoeng de cix ietgyanx raurumz naeuz:

“Gou ngamqngamq ninz ndiu, doiq mbouj gvaq lo, byoemgyaeuj gou lij nyungqnyatnyat……”

Lwgvuengziq hozgyaez duj va neix dahraix, haenh naeuz:

“Mwngz gyaeundei lai lo!”

“Dahraix ga?” Dujva de daekeiq naeuz, “Gou caeuq daengngoenz caemh doekfag bw!”

Lwgvuengziq roxnyinh duj va neix ndaenggon lai, hoeng de cingqcaen gyaeundei dangqmaz!

Dujva de riengzlaeng youh naeuz:

“Seizneix daengz seiz gwn haet luba, cingj mwngz bwh ndei ngaizhaet hawj gou……”

Lwgvuengziq najnding lo, yienghneix couh dawz aen huzrwed- raemx coux raemxsaw daeuj rwed dujva neix.

（10）