Gou heuhguh Yaujlungz, cib bi lo, daxboh senq couh lizhai gou caeuq daxmeh, dai lix mbouj rox. Daxmeh ne, caenh naebsim haeuj guhhong bae, mbouj ndaej hoengq buenx gou. Daj iq daengz hung, haujlai saeh cungj dwg gou gag guh.

Ngoenzneix, dwg ngoenz singh- giz, daxmeh youh youq fuengzsaw nyaengq gij hong de. Gou naengh youq gwnz sahfaz yawj densi, miz di naet lo, moengjmoengj doengjdoengj, gou lumjbaenz yawjraen duz mui iq ndeu. Mbouj! Haenx mbouj dwg duz mui bingzciengz ndeu, haenx dwg duz muicaetsaek ndeu! Duz mui haenx sawqmwh hai bak naeuz: “Yaujlungz, daeuj ba, riengz gou daeuj ba! Gou rox daxboh mwngz youq gizlawz!”

Duzmui yied buet yied riengj, mbouj dwg boux vunz bingzciengz naengz gyaep ndaej hwnj, hoeng fajdin gou lumjbaenz daenj haizriengjret, riengz ndaet duz mui haenx.

Duzmui sawqmwh dingz roengz- daeuj, gou muenghmuengh dangqnaj, dwg rangh haij hung ndeu, muengh mbouj raen hamq, gou doiq de naeuz: “Mwngz heuhguh gijmaz ya, mui iq?” “Muicaetsaek.” Gou ndawsim baez saenq, gou mumjgyumq geiq ndaej, youq gou seiz haj bi, daxboh doiq gou naeuz gvaq, aen bitmingz de dwg “muicaetsaek”, de dwg boux cozgyah ndeu.

Gou ngaezngwd lo, muicaetsaek menhmenh bek gou baez he, gou ndiu gvaqdaeuj lo. baez vad fwngz, okdaeuj aen ruz iq ndeu, de rag gou hwnj ruz, dou naengh onj le, ruz sawqmwh lumj mbin nei hai bae, gou deng hwk lo, hoeng muicaetsaek cix naengh onjup.

“Dou yaek daengz lo, naengh ndei.” Ngamq geij faen cung couh daengz! Dingqnyi gij sing muicaetsaek, gou ngiengx gyaeuj baez yawj, dangqnaj raen aen dauj iq ndeu. “Daengz lo.” Gou daj gwnz ruz saet roengzdaeuj, muenghyawj rangh ndoengfaex haenx, gag naemj: Muicaetsaek vih gijmaz daiq gou daeuj giz dieg neix ne? De youh dwg gijmaz saenfaenh ne? Daiq baenz roix ngeizvaeg neix, gou riengzlaeng muicaetsaek byaij haeuj ndoengfaex bae lo.

Ndaw ndoengfaex faexcaz vet- vang, nye lai mbaw mwn, hai rim gij va’ndoi mbouj rox mingz haenx, saekseiz lij miz doenghduz iq buet gvaqbae. Ndonj gvaq ndoengfaex, dangqnaj raen miz rangh diegnywj yawj mbouj daengz henz ndeu. Muicaetsaek daiq gou haeuj aen ranzfaex iq ndeu bae, ndaw ranz doxgaiq yienghyiengh cungj miz. Gou ngamq yaek cam muicaetsaek, de gaenq mbouj raen lo. Couh yiengh- neix, gou gag youq gizneix youq ngoenz ndeu, song ngoenz, sam ngoenz……

Ngoenzneix gyanghaemh, rongh- ndwen gig luenz gig rongh, wnggai dwg haemh cibngux ba, gou lumj bingzciengz ityiengh naengh youq gwnz diegnywj rog ranz, ngaezngwd muenghyawj gwnzmbwn. Sawqmwh, gwnz mbaq gou deng bek mbat ndeu, ngeux gyaeuj baez yawj, miz vunz! Gou mbajmbwdmbwd naeuz:“Mwngz…… mwngz dwg …… dwg byawz?”

“Yaujlungz, gaej lau.”

“Mwngz baenzlawz rox gij coh gou?”

“Yaujlungz, gou couh dwg daxboh mwngz.”

“Baenzlawz ndaej cingqmingz?”

“Mwngz yawj!” Boux vunz haenx iet fwngz daengz dangqnaj gou, gwnz goenhfwngz raek diuz lienhfwngz haenx, mbouj cingq dwg daxboh yaek byaij seiz gou soengq hawj de ma? “Daxboh!” Gou raemxda rihnangnang bamq haeuj ndaw rungj daxboh bae, caen haisim! Caen utheiq! Caen vuenyungz! Gaenq siengj gvaq haujlai vah cungj mbouj yungh naeuz lo, ndaw rungj daxboh hawj gou roxdaengz daxboh rox gou da, gijmaz cungj rox.

Baez yaepda, mbwn rongh lo, gou cij fatyienh gou dwg umjdawz muicaetsaek. “Yaujlungz, gou dwg muicaetsaek, hix dwg daxboh mwngz.” Gou daej ndaej engq rem lo. “Yaujlungz, daxboh mbouj ndaej buenx mwngz lo, mboujgvaq, deq mwngz cibhaj bi bihaenx seizhah, gou couh dauqma. Diuz lienhfwngz neix dwg gou aeu nywjsaenz san baenz, mwngz raek youq gwnz fwngz, mbouj ndaej duet roengzdaeuj bw!” Gou ciep gvaq lienhfwngz raek youq gwnz fwngz, “Lij miz, caj gou dauqma ra mwngz seiz, couh aeu diuz lienhfwngz guh cingqmingz! Mwngz ma ranz le, itdingh yaek dingq vah.” Gou doq daej doq han. Daxboh youh daiq gou daeuj daengz henz haij, aenruz lij youq, daxboh umj gou hwnj ruz, baez nyoengx, aenruz hai bae lo, daxboh youq gwnz hamq vad fwngz coh gou, gou youq ndaw ruz daej ha daej, mbouj roxnyinh daengz ninz ndaek lo.

Gou ndiu gvaqdaeuj le, seiqcawq yawjyawj, neix mbouj cingq dwg gyangding ranz gou ma? Caiq yawjyawj gwnz fwngz, gwnz fwngz cingqcaen raek diuz lienhfwngz daxboh soengq hawj gou haenx.

Daj baezneix gvaqlaeng, gou moix ngoenz cungj maqmuengh, ngoenz seizhah cibhaj bi haenx……

(bouxraiz Yez Sinhyaz boux- hoiz Goenggen)

Muicaetsaek