Gou mbouj leixlangh de. Seizde gou gag siengj, Danghnaeuz ding- gyujsae lij mbouj honz dem, gou couh aeu fagcuiz dub de dek bae.

youh daeuj cauz gou:

“Mwngz nyinhnaeuz dujva……”

“Gaej cam lo! Gaej cam lo! Gou mbouj rox go! Gou luenh han mwngz ndwi! Gou lij guhhong go!”

De doeksaet dwk yawj gou naeuz: “Hong?”

De cim gou, ndaw fwngz gou gaem fagcuiz, lwgfwngz gyuek youz uq liux, boemz youq gwnz aen doxgaiq Lwgvuengziq raen yakyawj neix.

“Mwngz gangjvah lumj gyoengq bouxlaux ityiengh!”

Coenz vah neix hawj gou najmong liux, hoeng de baksoem dwk laebdaeb gangj dem:

“Mwngz gijmaz cungj baen mbouj cingcuj……Mwngz gijmaz cungj gauj luenh liux……”

De hozhwnj dangqmaz, bi gyaeuj fidfid, byoemgyaeuj henjrwgrwg de deng rumz ci mbinfoenfoen.

“Gou daengz gvaq aen singhgiuz ndeu, gwnz de miz boux sai najnding ndeu. De mbouj mup gvaq saek duj va, mbouj raen gvaq saek aen ndaundeiq, de mbouj gyaez gvaq saek boux vunz. Ciuhvunz de, cawzle suenqsoq, mbouj guh gvaq gijwnq. De cix lumj mwngz nei, ngoenzngoenz cungj naeuz bae naeuz dauq: ‘Gou guhhong cingqging go!’Lij ndaengndiengq dangqmaz dem. De mbouj dwg vunz, dwg goraet ndeu!”

“Dwg gijmaz?”

“Goraet!” Lwgvuengziq ndatheiq raixcaix, “Geij bak fanh bi doxdaeuj, dujva cungj miz oen, geij bak fanh bi doxdaeuj, duzyiengz lij ciuqyiengh gwn dujva. Yaek gauj cingcuj, dujva vih maz baenz dwgrengz cauh doengh- gij oen mbouj miz saek di yungh hawj de bonjfaenh, neix nanzdauh mbouj dwg saeh cingqging ha? Nanzdauh duzyiengz gwn dujva mbouj youq- gaenj? Gijneix nanzdauh mbouj youq- gaenj gvaq gij suenqsoq bouxnajnding de ma? Danghnaeuz lajmbwn dan miz duj va ndeu, gizwnq cungj mbouj miz, gag baihgou miz ndwi, duzyiengz mwnhsaengsaeng gaemz ndeu couh gwn bae seuqsat, gijneix mbouj youq- gaenj ma?”

De hozbongz najnding liux, laeb- daeb gangj:

“Danghnaeuz boux vunz ndeu gyaez hwnj duj va ndeu, duj va neix youq ndaw ikfanh aen ndaundeiq dan miz duj ndeu ndwi, yienghneix, boux vunz de mwh yawj gij ndaundeiq neix couh roxnyinh vuenyungz lai lo. De ndaej gag vubvub vebveb naeuz: ‘Dujva gou couh youq gyoengq ndau- ndeiq neix ndawde aen ndeu……’ Hoeng Danghnaeuz dujva deng duzyiengz gwn bae le, doiq de daeuj gangj, lumjbaenz doenghgij ndaundeiq neix cungj laepsaengsaeng liux……Mwngz naeuz gijneix nanzdauh goj mbouj youqgaenj ma?”

De daejnga’nga, gangj mbouj roengzbae lo.

Mbwn laep lo, gou cuengq gij hongdawz ndaw fwngz roengzdaeuj. Seizde, fagcuiz、dinggyujsae roxnaeuz hozhawq、dai bae lij miz gijmaz youqgaenj ne? Youq gwnz aen singhgiuz neix, couhdwg aen singhgiuz gou youq neix, youq gizneix miz boux Lwgvuengziq ndeu caj gou bae nai de.

Gou got de haeuj ndaw rungj daeuj, nai de naeuz:

“Gaej lau, dujva gaiqmwngz mbouj miz saeh law, gou veh aen momh ndeu hawj duzyiengz gaiq- mwngz, gou veh led hawj dujva gaiqmwngz, gou……”

Gou huk lai, gou mbouj rox caeuq de gangj gijmaz lo, mbouj rox guhlawz cij nai ndaej de, mbouj rox guhlawz byaij haeuj ndawsim de bae……Ai, raemxda caen dwg geizheih lai lo!（9）