第05版:banj hagseng
3上一版  下一版4
 
Geiq Gienh Saeh Iq Nanz Lumz Ndeu
Daxboh Nyaengqnyat
Lwgvuengziq
版面导航     
3上一期  下一期4
新闻搜索:  
下一篇4 2018年5月30日 放大 缩小 默认        

Geiq Gienh Saeh Iq Nanz Lumz Ndeu
记一件难忘的小事
 

Seizcin sam nyied, mbwn ngamq roengz gvaq ciengz naehung ndeu. Gyang hongh、gwnz faex、laj yiemh cungj bienq ndaej hausaksak liux, hoengheiq hix daegbied seuqsangj. Geij duz roeglaej iq hawj daxmeh daiqdaz dwk, cingq angqfwngfwng lienh mbin ne. Gyoengq duzde mbin hwnj mbin roengz, cici caca heuh ndaej ndei dingq lai lo.

Gou cingq youq gyang fuengz sij cozvwnz ne, fwt dingqnyi buz hemq gou:“Daegyangz, vaiq daeuj vaiq daeuj!”Gou gipmuengz cuengq bit roengz, buet ok rog bae yawj. Cijraen buz angqfwngfwng, gyang fwngz de bungj dwk duz roeglaej iq ndeu. “Hw! Gou ngamq naemj bae bok labsab, lwg iq neix couh bungq haeuj gwnz ndang gou daeuj lo. Ne, mwngz yawj, bwn de lij caengz maj ndei ne, vaiq bae aeu aenhab daeuj coux de hwnjdaeuj.” Bingzciengz, buz rox gou gyaez doenghduz lai, ndaw ranz ciengx miz duzmeuz、duzbya、duznonsei, yaek baenz aen dungvuzyenz iq lo! Buz ciengz gangj:“Luenh buet gijmaz ne, hagsib baenzneix gaenj, ndaejhoengq couh caeuq doenghduz guhcaemz, aenndang ndaej yietnaiq, simcingz hix ndaej bienq ndei, ndei gvaq guh gijmaz bae.” Gou daj gyang fwngz buz ciep gvaq duzroeglaej, ndawsim angqvauvau, sikhaek buet bae coh daihloh. Baihlaeng cienz daeuj coenz vah buz “haeujsim, gaej hawj de doek roengz”, gou gaenbonj goq mbouj hwnj lo, cij naemj aeu bae hawj doengzdoih gou yawj, hawj gyoengqde rox gou miz duz roeglaej gyaeundei dwggyaez ndeu bw. Gou doq naemj doq buet……duzroeglaej swnh gou mbouj siujsim, daj gyang fwngz gou yat roengz deih bae, mbitmbit mbiengmbieng, doq diuq doq buet deuz bae baihnaj. Gou gaenjgip bae gyaep, ndawsim gip raixcaix, caen siengj sikhaek gaeb ndaej de daeuj. Sawqmwh, duzroeglaej nyeux gyaeuj cigsoh buet coh gou daeuj, gou bienq mbouj gib, ga ndeu caij roengz ndang de bae lo! Gou ngawz liux, duzroeglaej youq haenx ning cungj mbouj ning. Buz ganj gvaqdaeuj yawj, hw, duzroeglaej gaenq dai lo. De huj dwk caengz gou, raemxda gou lae okdaeuj lo, gou caen dwg ienqhoij yaek dai ha.

Daj neix hwnj, buz couh ciengzseiz son gou, baezlaeng mboujlwnh roebdaengz gijmaz saeh cungj yaek caemdingh, gaej cangjmangx, aeu gyaezhoh doenghduz.

Doeklaeng, moix baez gou youh miz doengzdoih moq, gou cungj naemj hwnj duz roeglaej cojgvaq neix. Neix couh dwg gienh saeh iq caensaed fatseng youq ndang gou, hawj gou haujlai nanz cungj lumz mbouj ndaej.

bouxsij Cinz Ciz bouxhoiz Ouh Caij- fangh

 
下一篇4  
 
   
   
   


版权所有 广西民族报

联系电话:0771-5528076 5559552
传真:0771-5528087 电子邮箱:gxmzbw@163.com
地址:广西南宁市桂春路16号 邮政编码:530028
 

关闭