Ngoenz singgiz roek banringz, gou ninz ndaej diemzsisi, loq raen gou aeu ciemyaekheuj camz bitgangq gwn, lij nam naeuz:“Bitgangq homfwdwd, naengbit caen ndei gwn.”

Sawqmwh dingqnyi daxmeh swenj:“Linzlinz, hwnqdaeuj, mwngz bae gwnz haw cawx bitgangq ma gwn caeuz.” Gou baez doeksaet dwk naeuz:“Meh ha, gou cingq loq gwn bitgangq ne. Mwngz loengh bitgangq gou mbouj miz lo.” Daxmeh riu naeuz:“Gvaiq mbouj ndaej gwnz swiz dumz lo. Yenzlaiz dwg duzmeuz iq siujgvij loq raen bitgangq.” Gou najmong naeuz:“Vaiq dawz cienz hawj gou.” Daxmeh hawj gou 30 maenz ngaenz, gou riengx bak swiq naj le couh coh gwnz haw buet bae.

Gou doq buet doq diuq, yaep he couh daengz diemq gai bitgangq lo. Gou byaij gvaqbae naeuz:“Lauxbanj, daxmeh gou hawj gou 30 maenz ngaenz daeuj cawx bitgangq.” “Ndei ha!” Cijraen de fwngzgvaz gaem fagcax sugsed dwk “dak dak dak” raemj bitgangq. Yaep he couh ndaej lo. Lauxbanj dawz gij bitgangq cang ndei ndenq hawj gou, gou fwngzswix aeu bitgangq, fwngzgvaz mbon daeh yaek dawz cienz hawj de. Dai lo, cienz mbouj raen lo. Ndawsim gou gaenj dangqmaz, byonj daeh buh daeh vaq ndaej gij hanh moenq cungj conh caez hix mbouj raen cienz, gou cijndei saeq sing dwk gangj:“Daxnax, cienz gou deng doek lo.” Lauxbanj yawjyawj gou naeuz:“Mbouj youqgaenj, mwngz dawz bae gonq, cienz doeklaeng caiq hawj. Gou saenq mwngz.” Gou dawz bitgangq sim naekgywg dwk maranz, gou doq byaij doq naemj, gou deng cienz doek lo, daxmeh itdingh ndaq gou, hixnaengz mbouj hawj daxmeh rox. Caiq gangj, lauxbanj gai bitgangq youh mbouj roxnaj gou, gvaq nanz le de couh lumz gienh saeh neix. Siengj dwk siengj dwk mbouj rox seizlawz gou couh ma daengz ranz lo.

Gwn caeuz seiz, caezgya doq gwn doq gangj gwn ndaej diemzsisi. Hoeng, gou muengh gwnz daiz bitgangq homfwdfwd, baenzlawz hix ndwnj mbouj roengz, seizde yawj coh lwgda bitgangq, lumj de ndaq gou:“Mwngz dahlwg neix daj iq couh yaeuh vunz!” Gou ngaezngwd, mbouj geiq gwn, daxmeh raen le caenciet dwk cam:“Linzlinz, mwngz lumj miz maz simsaeh!” Gou dingj mbouj ndaej, raemxda laedikdik naeuz:“Daxmeh, gij cienz cawx bitgangq gou …… gou loengh doek lo. Gou yaeuh lauxbanj naeuz aeu bitgangq dauqranz gonq, yaep he couh dawz ngaenz hawj de. Hoeng, gou lau mwngz ndaq gou mbouj yo ngaenz haeujsim, ndigah mbouj siengj gangj hawj mwngz. Hoeng, seizneix ndawsim gou hojsouh lai.”

Siengj mbouj daengz daxmeh mboujdanh mbouj ndaq gou, lij vah- unq nai naeuz:“Linzlinz, haeujceij cij dwg boux lwgnyez ndei. Seizneix mbwn lij caengz laep, raeuz caez dawz cienz bae hawj lauxbanj ba.” Daengz diemq gai bitgangq, gou dawz 30 maenz ngaenz hawj lauxbanj, de riu danq:“Daxmeh mwngz miz dahnyez ndei!” Gou dingq le najmong raixcaix, youq ndawsim gag naemj: Doeklaeng aeu haeujceij, mbouj caiq yaeuh vunz.