Seizgonq, miz song boux laux- doengz, mbouj rox coh gyoengqde, boux ndeu cingqcig simswnh caemh- caiq lauxsaed gaenx guh, vunz heuh de Daegcig; lingh boux ganvad gvaidiuq, gyaez gwn gik guh, vunz heuh de Daegdiuq.

Miz ngoenz ndeu, Daegdiuq caeg duzma he bae gwnz haw gai, ndaej geij liengx ngaenz. De dawz gij cienz neix bae bouqlaeuj gwn laeuj fiz, byaij loh soemxsoemx saxsax. Lij lw di ngaenz, de youh dawz bae doj, yaep he couh saw ndaej seuqsat. Mbouj miz ngaenz yungh, de cijndaej byaijngoeng- ngoeng maranz. Youq buenq loh de ngamj bungz Daegcig. Raen Daegcig rap rap haeuxgok he, de doq hwnjbae naeuz:“Lauxdoengz ha, mwngz baeg loba, hawj gou bang mwngz rap cawz he.” Daegcig mbouj rox dwg Daegdiuq yaek maeuz de, couh dawz rap hawj de. Daegdiuq ndaej rap haeux le, lumj gip ndaej bauj nei, baez siengj daengz de youh yaek miz ngaenz yungh lo, nyaenx mbouj ndaej riu’ij. Songde mbouj rox mbouj nyinh byaij daengz henz dah hung he. Ngoenzhaenx mbwn oem’am lai, gyoengqde youh hozhawq youh ndang baeg, couh caez bae henz dah gwn raemx. Byawz rox Daegdiuq swnh Daegcig maeuq roengz gop raemx gwn seiz, haenqrengz baez nyoengx Daegcig, “boem” sing ndeu, Daegcig deng laemx roengz gyangdah bae. Daegdiuq doq rap hwnj aenrap buetdeuz lo.

Daegcig mbouj rox dajcaemx geijlai, deng langhraemx gunjfoedfoed cung daengz haenzhamq aen daujfwz bae, de cukcak bin hwnj hamq, seizde gaenq mbwnlaep lo. De nyaenx dungxiek, dauqdaej ra ndaej aen conghfaex hung he, couh ndoj haeuj- bae gvaqhwnz. Gvaq yaep he de sawqmwh dingqnyi baihrog miz song duz guk cingq sing iq gangjgoj. Duz ndeu naeuz:“Daeggo, danghnaeuz raeuz dwg bouxvunz couh ndei ha! Mbanjdoeng miz boux Lij yenzvai he, de miz lwgsau dog he, maj ndaej gyaeundei raixcaix, bineix ngamq ndaej 18 bi, vunzranz ndiep de lumj caw gwnz fwngz nei. Hoeng seizneix de baenz bingh geizheih, baeq yw cungj mbouj ndei, bohmeh de you ndaej haeux noh cungj gwn mbouj roengz. Ngoenzlwenz ranz de nem buengj okdaeuj, naeuz miz vunz yw ndei bingh siujcej, couh hawj siujcej haq hawj de, lij soengq gim fanh liengx dem.” “Caen ha? Hoeng miz maz banhfap yw ndei bingh siujcej ne?” Lingh duz guk cam. “Miz maz nanz, daemzva’ngaeux ranz de miz duz byaleix henjrwg he, ndaw dungx miz naed caw ndeu, muh naedcaw baenz mba, cung laeuj le hawj siujcej gwn, doq ndaej ndei.” Duzguk daih’it dap.

Gij vah song duz guk gangj, Daegcig dingq ndaej cingcing cujcuj caemhcaiq geiq haeujsim. Mbwn ngamq rongh, Daegcig couh bin ok conghfaex, cig buet Mbanjdoeng, ra daengz ranz Lij yenzvai. Gangj de rox yw bingh siujcej le bouxhendou couh hawj de haeujbae lo. Cijraen song bouxlaux najsaep najhaemz naengh youq gyang ding, Daegcig couh hwnjbae baiq naeuz:“Yenzvai gaej you, gou yw ndaej ndei bingh siujcej. Hoeng mbouj rox yenzvai haeujceij lwi?” “Danghnaeuz mwngz yw ndaej lwgsau dou, mwngz couhdwg aenvunz dou, itdingh haeujceij mbouj yaeuh mwngz!” Yenzvai naeuz. Daegcig naeuz:“Baenz! Cingj yenzvai heuh vunz coq gij raemx daemzva’ngaeux ranz gaeq hawq bae, gou miz yungh.”

Yenzvai dingq le, sikhaek heuh vunzhoiq bae guh, raen miz duz byaleix henjrwg ndeu dahraix. Daeg- cig gaeb daeuj buq hai dungx, caen miz naed caw hung he. De dawz naedcaw muh baenz mba, cung buenq cenj laeuj roengz hawj siujcej gwn. Siujcej gaemz ndeu ndoet roengzbae le, doq sim swnh uk singj, saeknaj hoengzmaeq, gyoengqvunz raen le cungj vuenheij. Lij yenzvai raen Daegcig caen gouq ndaej dahlwg, vunz hix lauxsaed simsoh, gangj daengz guh daengz, ngoenzde couh baij daizlaeuj haq lwgsau, lij soengq fanh liengx gim hawj Daegcig.

Daegcig daiq yah angqvauvau maranz. Daj neix hwnj, songde mwngz ndaemnaz gou daemjrok, doxgyaez doxndiep, gvaq gij saedceij vuenyungz.

Gij siusik Daegcig raen bouxsien coux ndaej yah gyaeundei cienz doh gyae’gyawj. Daegdiuq ndaej nyi le roxnyinh geizheih raixcaix, buet bae ranz Daegcig cang daeuj hoh, lij mbouj aeu naj coh Daegcig boizlaex naeuz:“Lauxdoengz ha, ngoenzde mwngz mbouj haeujsim doek roengz dah, gou mbouj rox youzraemx, mbouj gamj roengzbae gouq mwngz, caen doiq mbouj hwnj. Gou caen lau ciuhneix caiq mbouj ndaej raen mwngz.” Gangj sat, lij cang daej- nganga hwnjdaeuj. Daegcig raen de daej ndaej gig siengsim, laih caen, couh mbouj gvaiq Daegdiuq lo, lij sim’ unq bak byoiq lwnh de youq daujfwz raen sien hawj Daegdiuq. Daegdiuq dingq ndaej sim humz, de naemj: Lij miz saehndei baenzneix, gou hix bae sawq mbat ndeu, gangj mbouj dingh seizheiq gou engq ndei. Siengj daengz neix, de baenzlaenz caeuq Daegcig doxbiek, lienzhwnz ganj bae henz dah, diuq roengz gyangdah bae, youz hwnj daujfwz, ndonj haeuj conghfaex, daengz gyanghwnz miz duzguk daeuj dahraix.

Duz guk ndeu naeuz:“Daeggo, mbouj rox byawz caeg dingq gij vah raeuz ngoenzbonz gangj, siujcej ranz singq Lij gaenq bingh ndei haq vunz lo.” Seizde Daegdiuq aenvih lienz- hwnz youzraemx dwgliengz, nyaenx mbouj ndaej haetcwi sing he. Duzguk doeksat, coh gij sing fatok baez yawj, raen miz boux vunz dumzsoebsoeb he cingq ndoj youq ndaw conghfaex, songde doq coemj gvaqbae, song sam baez couh sik Daegdiuq soiq. Daeg- diuq couh baenzneix baenz gijgwn feih duzguk.

Ouh Caijfangh hoiz